Bhogapuram | ప్రధాని పర్యటనకు ముమ్మర ఏర్పాట్లు

• ఆనందపురంలో పార్కింగ్, భోజనం, ప్రజా సౌకర్యాలపై క్షేత్రస్థాయి పరిశీలన
• హోంమంత్రి వంగలపూడి అనిత, మంత్రి బీసీ జనార్దన్ రెడ్డి అధికారులకు కీలక ఆదేశాలు

విశాఖపట్నం, ఆంధ్రప్రభ: ప్రధానమంత్రి నరేంద్ర మోదీ విశాఖపట్నం పర్యటన నేపథ్యంలో జిల్లా యంత్రాంగం చేపడుతున్న ఏర్పాట్లను రాష్ట్ర హోంమంత్రి వంగలపూడి అనిత, మంత్రి బీసీ జనార్దన్ రెడ్డి శుక్రవారం క్షేత్రస్థాయిలో పరిశీలించారు. ఆనందపురం మండలంలో ఏర్పాటు చేసిన పార్కింగ్ ప్రాంతాలు, ప్రజలకు కల్పిస్తున్న సౌకర్యాలు, భోజన ఏర్పాట్లు, తాగునీటి సదుపాయాలు, పారిశుద్ధ్య చర్యలు, భద్రతా ఏర్పాట్లపై అధికారులతో సమీక్ష నిర్వహించారు.

ప్రధాని సభకు పెద్ద సంఖ్యలో ప్రజలు హాజరయ్యే అవకాశం ఉన్నందున వాహనాల పార్కింగ్, రాకపోకల నిర్వహణ, ప్రజల రద్దీ నియంత్రణపై ప్రత్యేక దృష్టి సారించాలని హోంమంత్రి సూచించారు. ట్రాఫిక్ సమస్యలు తలెత్తకుండా ముందస్తు కార్యాచరణ రూపొందించి, వాహనాల మళ్లింపు, ప్రత్యామ్నాయ మార్గాలపై ప్రజలకు ముందుగానే సమాచారం అందించాలని అధికారులను ఆదేశించారు.

సభకు వచ్చే ప్రజలకు ఎలాంటి ఇబ్బందులు కలగకుండా తాగునీరు, భోజనం, వైద్యసేవలు, మరుగుదొడ్లు, విశ్రాంతి ప్రాంతాలు వంటి మౌలిక సౌకర్యాలను సమృద్ధిగా అందుబాటులో ఉంచాలని సూచించారు. ముఖ్యంగా మహిళలు, వృద్ధులు, చిన్నారుల అవసరాలను దృష్టిలో ఉంచుకుని అన్ని ఏర్పాట్లు ఉండేలా చర్యలు తీసుకోవాలని చెప్పారు.

భద్రతా పరంగా పోలీసు, రెవెన్యూ, రవాణా, వైద్య ఆరోగ్య, విద్యుత్, పంచాయతీరాజ్ తదితర శాఖలు పరస్పర సమన్వయంతో పనిచేయాలని, ప్రతి అంశాన్ని నిరంతరం పర్యవేక్షిస్తూ ఎక్కడా లోపాలు తలెత్తకుండా అప్రమత్తంగా వ్యవహరించాలని అధికారులను ఆదేశించారు.

ప్రధాని పర్యటన రాష్ట్రానికి ప్రతిష్ఠాత్మకమైన కార్యక్రమమని పేర్కొన్న మంత్రి అనిత, ప్రతి శాఖ బాధ్యతాయుతంగా వ్యవహరించి కార్యక్రమాన్ని విజయవంతం చేయాలని సూచించారు. మంత్రి బీసీ జనార్దన్ రెడ్డి కూడా ఏర్పాట్లపై అధికారులతో చర్చించి అవసరమైన సూచనలు చేశారు.

ఈ సందర్భంగా జిల్లా యంత్రాంగం చేపడుతున్న ఏర్పాట్లపై అధికారులు మంత్రులకు వివరాలు తెలియజేయగా, పలు అంశాలపై అక్కడికక్కడే సూచనలు, ఆదేశాలు జారీ చేశారు. ప్రజలకు ఎలాంటి అసౌకర్యం కలగకుండా, ప్రధాని పర్యటన సజావుగా జరిగేలా అన్ని చర్యలు చేపట్టాలని అధికారులు, సంబంధిత శాఖల సిబ్బందికి స్పష్టం చేశారు.