పశువుల అక్రమ రవాణా

పశువుల అక్రమ రవాణా

బండారం బహిర్గతం
గ్రామస్తుల అప్రమత్తతతో మూడు లారీలు పట్టివేత

శ్రీ సత్యసాయి బ్యూరో, ఆంధ్రప్రభ : శ్రీ సత్యసాయి జిల్లా నంబులపూలకుంట మండల కేంద్రంలో అక్రమ పశువుల రవాణా వ్యవహారం వెలుగులోకి రావడంతో స్థానికంగా కలకలం రేగింది. మంగళవారం ఉదయం మండల కేంద్రంలోని బాలుర వసతి గృహం సమీపంలో మూడు లారీల్లో ఎద్దులు, పాడి ఆవులు, గేదెలను తరలిస్తున్నట్లు గుర్తించిన గ్రామస్తులు వెంటనే అప్రమత్తమై వాహనాలను అడ్డుకున్నారు.
స్థానికుల సమాచారం మేరకు, ఈ చర్యకు బీజేపీ మండల ఉపాధ్యక్షుడు కాసేటి రామ్మోహన్ నాయకత్వం వహించగా, పెద్ద సంఖ్యలో గ్రామస్తులు సంఘటనా స్థలానికి చేరుకుని లారీలను నిలిపివేశారు. లారీల్లో అధిక సంఖ్యలో పశువులను తరలిస్తున్నట్లు గుర్తించిన గ్రామస్తులు, వాటిని అక్రమంగా కొనుగోలు చేసి ఇతర ప్రాంతాలకు అమ్మకాల కోసం తీసుకెళ్తున్నారని ఆరోపించారు.

గ్రామస్తుల కథనం ప్రకారం, ఈ మూడు లారీలు నంబులపూలకుంట పోలీస్ స్టేషన్ పరిధిలోని ప్రధాన రహదారి గుండా ప్రయాణించినప్పటికీ సంబంధిత అధికారులు లేదా పోలీసులు వాటిని గుర్తించకపోవడం పలు అనుమానాలకు తావిస్తోంది. ఈ నేపథ్యంలో అక్రమ రవాణాపై పర్యవేక్షణలో నిర్లక్ష్యం చోటుచేసుకుందా అనే ప్రశ్నలు స్థానికుల్లో వ్యక్తమవుతున్నాయి.

సంఘటనపై సమాచారం అందుకున్న పోలీసులు సంఘటనా స్థలానికి చేరుకుని లారీలను స్వాధీనం చేసుకుని విచారణ చేపట్టినట్లు తెలుస్తోంది. లారీలలోని పశువుల రవాణాకు సంబంధించి అవసరమైన అనుమతులు, పత్రాలు ఉన్నాయా లేదా అనే అంశాలను అధికారులు పరిశీలిస్తున్నారు. పశువుల యజమానులు, డ్రైవర్లు, మధ్యవర్తుల వివరాలను సేకరించి దర్యాప్తు కొనసాగిస్తున్నారు.

ఈ సందర్భంగా స్థానిక ప్రజలు మాట్లాడుతూ, మండల పరిధిలో గత కొంతకాలంగా పశువుల అక్రమ రవాణా పెరుగుతోందని ఆరోపించారు. ముఖ్యంగా పాడి రైతులకు ఉపయోగపడే ఆవులు, గేదెలను పెద్ద ఎత్తున కొనుగోలు చేసి రాత్రి వేళల్లో లేదా తెల్లవారుజామున ఇతర ప్రాంతాలకు తరలిస్తున్నారని పేర్కొన్నారు. ఇటువంటి ఘటనలపై అధికారులు ప్రత్యేక నిఘా ఏర్పాటు చేసి కఠిన చర్యలు తీసుకోవాలని వారు డిమాండ్ చేశారు.

పోలీసు శాఖ ఉన్నతాధికారులు ఘటనపై సమగ్ర విచారణ జరిపి, అక్రమ రవాణా వెనుక ఉన్న వ్యక్తులు, ముఠాలను గుర్తించి చట్టపరమైన చర్యలు తీసుకోవాలని గ్రామస్తులు కోరుతున్నారు. గ్రామస్తుల అప్రమత్తతతో బయటపడిన ఈ ఘటన జిల్లాలో పశువుల అక్రమ రవాణా అంశాన్ని మరోసారి చర్చనీయాంశంగా మార్చింది.