Weather | మే 28 నుంచి వర్షాల సందడి
Weather | మే 28 నుంచి వర్షాల సందడి
Weather | వర్షాల ముందస్తు హెచ్చరిక
హైదరాబాద్లో తేలికపాటి వర్షాలు
నేడు 10 జిల్లాలకు వడగాల్పుల హెచ్చరిక
ఉరుములు, మెరుపుల హెచ్చరిక జిల్లాలు
ఉష్ణోగ్రతలు తగ్గనున్నాయి
గత రికార్డు ఉష్ణోగ్రతలు
భద్రత సూచనలు
Weather | ఆంధ్రప్రభ, వెబ్ డెస్క్ : గత కొన్ని రోజులుగా తీవ్రమైన ఎండలు, వడగాల్పులతో అల్లాడిపోతున్న తెలంగాణ ప్రజలకు వాతావరణ శాఖ ఒక తీపి కబురు అందించింది. మే 28 నుంచి రాష్ట్రంలో వాతావరణం పూర్తిగా మారబోతోందని, ముందస్తు రుతుపవనాల ప్రభావంతో రాష్ట్రవ్యాప్తంగా వర్షాలు కురిసే అవకాశం ఉందని భారత వాతావరణ కేంద్రం వెల్లడించింది. ఎండల తీవ్రత నుంచి ఉపశమనం లభించనున్నా, ఉరుములు, మెరుపులు అలాగే ఈదురుగాలులతో కూడిన ముప్పు పొంచి ఉందని హెచ్చరించింది.
హైదరాబాద్లో తేలికపాటి వర్షాలు…
భాగ్యనగరంలో రాబోయే 24 గంటల్లో ఆకాశం పాక్షికంగా మేఘావృతమై ఉంటుందని ఐఎండీ తెలిపింది. సాయంత్రం లేదా రాత్రి సమయంలో నగరంలోని పలు ప్రాంతాలలో బలమైన గాలులతో కూడిన తేలికపాటి నుండి మోస్తరు వర్షాలు లేదా ఉరుములతో కూడిన జల్లులు పడే అవకాశం ఉంది. నగరంలో గరిష్ట ఉష్ణోగ్రత 41 డిగ్రీలు, కనిష్ట ఉష్ణోగ్రత 29 డిగ్రీల సెల్సియస్గా నమోదయ్యే అవకాశం ఉంది.
నేడు 10 జిల్లాలకు వడగాల్పుల హెచ్చరిక ..
వర్షాలు ప్రారంభం కావడానికి ముందు, బుధవారం నాడు రాష్ట్రంలో ఎండల తీవ్రత కొనసాగనుంది. వాతావరణ శాఖ 10 జిల్లాలకు తీవ్ర వడగాల్పుల హెచ్చరికలు జారీ చేసింది. పెద్దపల్లి, జయశంకర్ భూపాలపల్లి, ములుగు, భద్రాద్రి కొత్తగూడెం, ఖమ్మం జిల్లాల్లోని కొన్ని ప్రాంతాల్లో తీవ్రమైన వడగాల్పులు వీచే అవకాశం ఉంది.
ఆదిలాబాద్, కొమరం భీమ్ ఆసిఫాబాద్, మంచిర్యాల, నిర్మల్, నిజామాబాద్ జిల్లాలకు ఆరెంజ్ అలర్ట్ జారీ చేశారు. దీనితో పాటు ఆదిలాబాద్, ఆసిఫాబాద్, మంచిర్యాల, భద్రాద్రి కొత్తగూడెం, ఖమ్మం, నల్గొండ జిల్లాల్లో రాత్రి వేళల్లో కూడా ఉష్ణోగ్రతలు ఎక్కువగా ఉండే అవకాశం ఉంది.
ఈ జిల్లాల్లో ఉరుములు, మెరుపుల హెచ్చరిక…
మే 28 నుంచి రాష్ట్రంలోని నిర్మల్, నిజామాబాద్, జగిత్యాల, రాజన్న సిరిసిల్ల, కరీంనగర్, పెద్దపల్లి, జయశంకర్ భూపాలపల్లి, ములుగు, భద్రాద్రి కొత్తగూడెం, ఖమ్మం, నల్గొండ, సూర్యాపేట, మహబూబాబాద్, వరంగల్, హన్మకొండ, జనగాం, సిద్దిపేట, యాదాద్రి భువనగిరి, రంగారెడ్డి, హైదరాబాద్, మేడ్చల్ మల్కాజ్గిరి, వికారాబాద్, సంగారెడ్డి, మెదక్, కామారెడ్డి, మహబూబ్నగర్, నాగర్కర్నూల్, వనపర్తి, నారాయణపేట్, జోగులాంబ గద్వాల్ జిల్లాల్లో గంటకు 40-50 కి.మీ వేగంతో వీచే ఈదురుగాలులు, ఉరుములు, మెరుపులతో కూడిన వర్షాలు కురుస్తాయని ఐఎండీ అంచనా వేసింది.
తగ్గనున్న ఉష్ణోగ్రతలు..
రాబోయే మూడు రోజుల పాటు గరిష్ట ఉష్ణోగ్రతలలో పెద్దగా మార్పు ఉండకపోయినప్పటికీ, ఆ తర్వాతి నాలుగు రోజుల్లో ఉష్ణోగ్రతలు క్రమంగా 2 నుండి 3 డిగ్రీల సెల్సియస్ వరకు తగ్గుతాయని వాతావరణ శాఖ స్పష్టం చేసింది.
గత సోమవారం నమోదైన రికార్డు ఉష్ణోగ్రతలు:
తెలంగాణ డెవలప్మెంట్ ప్లానింగ్ సొసైటీ గణాంకాల ప్రకారం.. గత సోమవారం (మే 25) రాష్ట్రంలోని 12 జిల్లాల్లో ఉష్ణోగ్రతలు 46 డిగ్రీల సెల్సియస్ దాటాయి. నల్గొండ జిల్లా వేములపల్లిలో రాష్ట్రంలోనే అత్యధికంగా 46.5°C ఉష్ణోగ్రత నమోదైంది. పినపాక (భద్రాద్రి కొత్తగూడెం), ధర్మపురి (జగిత్యాల), దహేగాం (ఆసిఫాబాద్), ఆలూర్ (నిజామాబాద్), గరిడేపల్లి (సూర్యాపేట) ప్రాంతాల్లో 46.4°C నమోదైంది. ఎన్కూరు (ఖమ్మం), కన్నెపల్లి (మంచిర్యాల), అంతర్గాం (పెద్దపల్లి)లలో 46.3°C గా నమోదైంది.
వాతావరణంలో రాబోతున్న ఈ మార్పుల నేపథ్యంలో ప్రజలు అప్రమత్తంగా ఉండాలని, ముఖ్యంగా ఉరుములు, మెరుపులు వచ్చే సమయంలో చెట్ల కింద, విద్యుత్ స్తంభాల వద్ద నిలబడకుండా సురక్షిత ప్రాంతాల్లో ఉండాలని అధికారులు సూచిస్తున్నారు.
CLICK HERE TO READ TGS RTC | హైదరాబాద్లో కొత్త ఎలక్ట్రిక్ బస్సుల ప్రారంభం
