లక్షలాది భక్తులకు సమగ్ర సౌకర్యాలు..

లక్షలాది భక్తులకు సమగ్ర సౌకర్యాలు..

తుది దశకు మహా కుంభాభిషేకం ఏర్పాట్లు..
మార్చి 6 నుంది 8 వరకు మహోత్సవాలు
8న మేష లగ్నంలో ప్రధాన కుంభాభిషేకం

ఆంధ్రప్రభ ఇంద్రకీలాద్రి : విజయవాడ లోని ఇంద్రకీలాద్రిపై వెలసిన శ్రీ కనకదుర్గమ్మ ఆలయంలో 12 ఏళ్లకు ఒకసారి నిర్వహించే మహా కుంభాభిషేకం కార్యక్రమానికి ఏర్పాట్లు తుదిదశకు చేరుకున్నాయి. మార్చి 6 నుంచి 8వ తేదీ వరకు జరగనున్న ఈ మహోత్సవం కోసం ఆలయ యంత్రాంగం విస్తృత స్థాయిలో ప్రణాళిక రూపొందించి అమలు చేస్తోంది. ఆలయ కార్యనిర్వహణాధికారి వి.కె. సీనానాయక్ ఆదివారం స్వయంగా క్షేత్రస్థాయిలో పర్యవేక్షణ చేపట్టి ఏర్పాట్ల పురోగతిని సమీక్షించారు. స్థానాచార్యులు, వైదిక కమిటీ సభ్యులు, అర్చకులతో కలిసి విమాన గోపురం, ప్రాంగణం, యాగశాల ప్రాంతాలను పరిశీలించి శాస్త్రోక్త విధానాల అమలుపై దృష్టి సారించారు.

యాగశాల నిర్మాణం, విమాన గోపుర మరమ్మతులు, భక్తుల రాకపోకలకు అనుకూలంగా మార్గాల విస్తరణ వంటి పనులను సమన్వయంతో కొనసాగిస్తున్నట్లు అధికారులు తెలిపారు. ఇంజనీరింగ్ విభాగంతో జరిగిన సమీక్షలో పనుల నాణ్యత, భద్రత, గడువుల పాటింపు అంశాలపై ప్రత్యేకంగా ఆదేశాలు జారీ చేశారు. భారీ జనసందోహాన్ని దృష్టిలో ఉంచుకుని క్యూలైన్ వ్యవస్థను విస్తరించడం, తాగునీటి సరఫరా, ప్రసాద వితరణ, పారిశుధ్య ఏర్పాట్లను మెరుగుపరచడం వంటి అంశాలపై కార్యాచరణను ఖరారు చేశారు. మార్చి 8వ తేదీ ఉదయం 9:34 గంటలకు మేష లగ్నంలో ప్రధాన కుంభాభిషేకం జరగనుంది. ఈ వేడుక శంకర విజయేంద్ర సరస్వతీ స్వామి పర్యవేక్షణలో శాస్త్రోక్తంగా నిర్వహించబడనుంది.

ఆగమ శాస్త్రాల ప్రకారం నిర్వహించే ఈ మహా క్రతువు ఆలయ ఆధ్యాత్మిక ప్రాధాన్యతను మరింత పెంచనుంది. లక్షలాది భక్తులు హాజరవుతారని అంచనా వేస్తున్న నేపథ్యంలో, ఎటువంటి అవాంఛనీయ పరిస్థితులు తలెత్తకుండా భద్రతా చర్యలను కూడా కట్టుదిట్టం చేస్తున్నారు. పోలీసు, అగ్నిమాపక, వైద్య విభాగాలతో సమన్వయం చేస్తూ అత్యవసర సేవలను సిద్ధంగా ఉంచుతున్నారు. సాంప్రదాయ వైభవం, శాస్త్రోక్త పద్ధతులు, ఆధునిక నిర్వహణ పద్ధతుల సమన్వయంతో ఈ మహా కుంభాభిషేకం నిర్వహణకు ఆలయ అధికారులు ప్రాధాన్యత ఇస్తున్నారు. భక్తులందరికీ ప్రశాంత వాతావరణంలో, ఎలాంటి ఇబ్బందులు లేకుండా అమ్మవారి దివ్య దర్శనం కల్పించడం ప్రధాన లక్ష్యంగా ఏర్పాట్లు కొనసాగుతున్నాయి.