CCS | మహిళలకు ఆర్థిక ప్రయోజనమే లక్ష్యం..

• రాష్ట్రంలో కామన్ సర్వీస్ సెంటర్ల విస్తరణ
• నెలకు రూ.30 వేల వరకు ఆదాయం
• శ్రీ సత్యసాయి జిల్లాలో 242 కేంద్రాలు
• ఒకే చోట మొత్తం 250 సేవలు

శ్రీ సత్యసాయి బ్యూరో, (ఆంధ్రప్రభ): రాష్ట్రంలో మహిళలకు ఆర్థిక స్వావలంబన కల్పించేందుకు ముఖ్యమంత్రి నారా చంద్రబాబు నాయుడు చేపట్టిన అభివృద్ధి కార్యక్రమాల్లో భాగంగా కామన్ సర్వీస్ సెంటర్లు ( సిఎస్సిలు) ముఖ్యపాత్ర పోషించనున్నాయి. డిజిటల్ సేవలను గ్రామ, పట్టణ స్థాయికి మరింత చేరువ చేసేందుకు, అలాగే పట్టణాల్లో విద్యావంతులైన మహిళలకు ఉపాధి అవకాశాలు కల్పించేందుకు ప్రభుత్వం ధృడసంకల్పంతో ముందుకు సాగుతోంది. కుటుంబ అభ్యున్నతికి మహిళే మూలస్తంభం అన్న దృక్పథంతో, వారిని ఆర్థికంగా బలపరచితే సమాజం మొత్తం అభివృద్ధి చెందుతుందన్న ఆలోచన ఆధారంగా ఈ ప్రాజెక్టును వేగంగా అమలు చేయబోతున్నారు.

మహిళలే కేంద్రం నిర్వాహకులు, మెప్మా ద్వారా ప్రత్యేక ఎంపిక..

పట్టణ పేదరిక నిర్మూలన సంస్థ ( మెప్మా) ఆధ్వర్యంలో పట్టణాల్లో అర్హత కలిగిన, విద్యావంతులైన, డిజిటల్ సేవలపై ఆసక్తి ఉన్న మహిళలను ఎంపిక చేసి వారికి కామన్ సర్వీస్ సెంటర్ల నిర్వహణ బాధ్యతలు అప్పగించనున్నారు. ఇంతవరకు మీసేవల ద్వారా సేవలు అందించడంలో ఆలస్యం, సాంకేతిక సమస్యలు, ప్రైవేట్ నిర్వహణ వల్ల ప్రజల్లో వచ్చిన అసంతృప్తిని దృష్టిలో ఉంచుకుని, సర్వీసులను నేరుగా ప్రభుత్వ ఆధీనంలో అందించేందుకు ప్రణాళిక సిద్ధమైందని చెప్పవచ్చు.

ఉమ్మడి జిల్లాకు 580 కేంద్రాలు, శ్రీ సత్యసాయి జిల్లాకు 242…

ఉమ్మడి జిల్లాలో మొత్తం 580 కామన్ సర్వీస్ సెంటర్లు ఏర్పాటు చేయాలని ప్రభుత్వం నిర్ణయించింది. ఇందులో శ్రీ సత్యసాయి జిల్లాకు 242 సెంటర్లు కేటాయించబడటం ప్రత్యేకతగా నిలిచింది. ఈ సెంటర్ల పంపిణీని మున్సిపల్ పట్టణాలు, నగర పంచాయతీల ఆధారంగా ఖరారు చేశారు. హిందూపురంలో 78, ధర్మవరంలో 63, కదిరిలో 43, పుట్టపర్తిలో 23, పెనుకొండలో 20, మడకశిరలో 15 సెంటర్లు ఏర్పాటు చేయనున్నారు. ప్రతి పట్టణంలోని జనాభా, అవసరాలు, ట్రాఫిక్‌, ప్రభుత్వ సేవల డిమాండ్‌ వంటి అంశాలను పరిగణలోకి తీసుకుని సెంటర్ల సంఖ్యను నిర్ణయించినట్లు అధికారులు తెలిపారు.

250 సేవలు… ఒక్కచోటే…

కామన్ సర్వీస్ సెంటర్లు ప్రజలకు ఒకే చోట సుమారు 250 రకాల సేవలు అందించే విధంగా రూపుదిద్దుకుంటున్నాయి. ఈ సెంటర్లు ప్రభుత్వ సేవలను మరింత చేరువ చేయడంతో పాటు, గ్రామీణ, పట్టణ ప్రాంతాల ప్రజలకు వేగవంతమైన సేవలందించడం లక్ష్యంగా ఏర్పాటవుతున్నాయి.

ఈ కేంద్రాల్లో ప్రధానంగా ప్రభుత్వ పథకాలు, ధృవీకరణ పత్రాల జారీ, ఆధార్ సేవలు, ఓటరు సేవలు, జనన–మరణ ధృవీకరణ పత్రాలు, రేషన్ కార్డు సంబంధిత సేవలు అందించబడతాయి. అదనంగా, సామాజిక సంక్షేమ పథకాల నమోదు, పర్యవేక్షణ, పెన్షన్‌కు సంబంధించిన సేవలు, వివిధ రకాల సర్టిఫికేట్‌లకు అప్లికేషన్లు వంటి కీలక సేవలను కూడా ఈ సెంటర్లు సమగ్రంగా అందించనున్నాయి.

ఈ సెంటర్లు పూర్తిగా పనిచేయడం ప్రారంభమైతే, ప్రజలు ఒక్కొక్క పని కోసం వేర్వేరు కార్యాలయాలు తిరగాల్సిన అవసరం లేకుండా, ఒకే చోట అన్ని ప్రభుత్వ సేవలు పొందే అవకాశం కలుగుతుంది.

బ్యాంకింగ్, ఆర్థిక సేవలు…

చిన్న మొత్తపు బ్యాంకింగ్ సేవలు, ఖాతా ప్రారంభం, నగదు జమ/డబ్బుతీసుకోవడం.సూక్ష్మ రుణాలు,బీమా పాలసీలు, పెట్టుబడి సేవలు,డిజిటల్ చెల్లింపులు,వ్యవసాయ సేవలు, ఇన్‌పుట్ సబ్సిడీ సమాచారం. పంటల రిజిస్ట్రేషన్, రైతు పథకాలు, మార్కెట్ సమాచారం,ఆరోగ్య సేవలు, ఆరోగ్య కార్డులు,ఆరోగ్య పథకాల నమోదు, ఆరోగ్య పరీక్షలు/టెలీమెడిసిన్ అపాయింట్‌మెంట్లు, చట్టపర సేవలు, న్యాయ సలహాల రిజిస్ట్రేషన్,ప్రజా సమస్యల కోసం అప్లికేషన్లు తదితరాలు ఉంటాయి.

పర్యటనలు, ట్రావెల్…

రైల్వే, బస్సు టిక్కెట్లు, హోటల్ బుకింగ్, యాత్రా ప్యాకేజీలు, నైపుణ్య అభివృద్ధి & విద్య, ఆన్లైన్ కోర్సులు, నైపుణ్య ధృవీకరణలు, విద్యాసంస్థల ఫీజుల చెల్లింపులు, అదనంగా ఈ-స్టోర్, బి2బి సేవలు, ఈ-మొబిలిటీ వంటి డిజిటల్ ఆధారిత పలు సేవలను ప్రజలకు అందించనున్నారు.

మహిళలకు నెలకు 30 వేల వరకు ఆదాయం…

కామన్ సర్వీస్ సెంటర్ నిర్వహణ బాధ్యత చేపట్టిన మహిళలకు సేవల ఆధారంగా రుసుము లభిస్తుంది. జిల్లా అధికారులు అంచనా ప్రకారం, రోజుకు 20–30 ట్రాన్సాక్షన్లు జరిగితే, సెంటర్ నిర్వాహకురాలికి నెలకు సుమారు 25,000–30,000 రూపాయల వరకు ఆదాయం రావచ్చని అంచనా.డిజిటల్ లావాదేవీలు పెరుగుతున్న ఈ కాలంలో ఇలాంటి కేంద్రాలకు భారీ డిమాండ్ ఉండటంతో మహిళలకు నిలకడైన ఆదాయ వనరుగా మారుతుందని అంచనా వేస్తున్నారు.

ప్రభుత్వ సేవలు – ప్రజలకు మరింత చేరువ….

గతంలో మీసేవల ద్వారా పత్రాలు, ధృవీకరణలు పొందే సమయంలో జాప్యం, టోకెన్ల సమస్యలు, లైన్లలో వేచి ఉండడం వంటి అసౌకర్యాలు ఎదురయ్యేవి.కొత్తగా ఏర్పాటు చేస్తున్న కామన్ సర్వీస్ సెంటర్లు ప్రజలకు:త్వరితగతినతక్కువ ఖర్చుతోనాణ్యమైన,పారదర్శకసేవలు అందించడానికి సహాయపడతాయి. ఇంకా ఈ కేంద్రాలు ప్రభుత్వ పథకాలు ప్రజలకు ఎంతవరకు చేరుతున్నాయో పర్యవేక్షణకు కూడా ఉపయుక్తంగా ఉండనున్నాయి.

విద్యావంతులైన మహిళలకు పెద్ద అవకాశం…

ప్రస్తుతం పట్టణాల్లో అనేక విద్యావంతులైన మహిళలు నిరుద్యోగంగా ఉన్నారు. కుటుంబ కారణాలు, ఉద్యోగ అవకాశాల కొరత వల్ల బయటకు వెళ్లే పరిస్థితులు లేవు.వారిని ఉద్దేశించి ప్రభుత్వం ఈ కామన్ సర్వీస్ సెంటర్లు ప్రత్యేకంగా ప్రారంభించటం అభినందనీయం.ఇవి:ఇంటి దగ్గరే ఉద్యోగం,కనీస పెట్టుబడితో ప్రారంభం.శాశ్వత ఆదాయ వనరు.డిజిటల్ నైపుణ్యాల అభివృద్ధి.సామాజిక గౌరవం అందించే అవకాశం ఉంది.

డిజిటల్ ఆంధ్రప్రదేశ్‌కు దారితీసే అడుగు….

ప్రభుత్వం లక్ష్యం ఏంటంటే, ప్రతి పౌరుడు తనకు అవసరమైన సేవను దూర ప్రాంతాలకు వెళ్లకుండా, తన పట్టణంలో లేదా తన పరిసరాల్లోనే పొందాలి. అదే సమయంలో డిజిటల్ లావాదేవీలను ప్రోత్సహించడం, సేవలను సులువుగా, వేగంగా అందించడమే.ముఖ్యమంత్రి చంద్రబాబు నాయుడు ఎప్పుడూ టెక్నాలజీ ఆధారిత పరిపాలనకు ప్రాముఖ్యత ఇచ్చిన నేత. ఈ కామన్ సర్వీస్ సెంటర్లు కూడా అదే దిశగా తీసుకున్న మరో ముందడుగు అని అధికారులు చెబుతున్నారు.

మొత్తం మీద…కామన్ సర్వీస్ సెంటర్ల ఏర్పాటు ద్వారాప్రజలకు సేవలు చేరువవ్వడం, మహిళలకు ఆర్థిక స్థిరత్వం లభించడం,ప్రభుత్వ పథకాల అమలు వేగవంతం కావడం, డిజిటల్ సర్వీసుల్లో పారదర్శకత పెరగడం,మొత్తం మీద ప్రజా పరిపాలనలో పెద్ద మార్పు చోటుచేసుకోనుంది. ప్రభుత్వం చేపట్టిన ఈ కార్యక్రమం ద్వారా శ్రీ సత్యసాయి జిల్లాలోని పట్టణాల్లో మహిళల ఆర్థిక స్థితి మెరుగుపడటమే కాకుండా, పౌరులకు నాణ్యమైన సేవలు అందే అవకాశాలు మరింతగా పెరుగనున్నాయి.