tg | జీవన్రెడ్డి చేరికతో బీఆర్ఎస్లో ముసలం
tg | జీవన్రెడ్డి చేరికతో బీఆర్ఎస్లో ముసలం
జగిత్యాల ఎమ్మెల్యే డాక్టర్ సంజయ్
tg | ఆంధ్రప్రభ వెబ్ డెస్క్ : జగిత్యాలలో బీఆర్ఎస్ నిర్వహించనున్న బహిరంగ సభపై స్థానిక ఎమ్మెల్యే డాక్టర్ సంజయ్ ఘాటు వ్యాఖ్యలు చేసి రాజకీయ వాతావరణాన్ని వేడెక్కించారు. కేసీఆర్ నేతృత్వంలో భారీ సభ అంటూ ప్రచారం చేస్తున్నప్పటికీ, చిన్న గ్రౌండ్లోనే కార్యక్రమం నిర్వహించడం వారి బలం ఏంటో చూపుతోందని ఆయన విమర్శించారు.
జీవన్రెడ్డి బీఆర్ఎస్లో చేరబోతున్న నేపథ్యంలో పార్టీ లోపలే విభేదాలు ముదురుతున్నాయని సంజయ్ వ్యాఖ్యానించారు. “జీవన్రెడ్డి చేరికతో బీఆర్ఎస్లో ముసలం పుట్టినట్టే” అని ఆయన అన్నారు. ఇప్పటికే ఈ చేరికపై పార్టీ నేతలలో అసంతృప్తి నెలకొన్నట్లు పేర్కొన్నారు.
ముఖ్యంగా మాజీ మంత్రి హరీష్ రావు ఈ సభకు హాజరు కావడం లేదనే ప్రచారం జరుగుతుండటం వెనుక కూడా ఇదే కారణమని సంజయ్ ఆరోపించారు. “హరీష్ రావు ఢిల్లీకి వెళ్లి బీజేపీ నేతలతో సంప్రదింపులు జరుపుతున్నారని సమాచారం” అని ఆయన వ్యాఖ్యానించారు. అంతే కాదు, ఇప్పటికే కవిత పార్టీ నుంచి దూరమయ్యారని, ఇప్పుడు హరీష్ రావు కూడా అదే దారిలో వెళ్లకుండా ఉండాలని కొందరు కోరుతున్నారన్న ప్రచారం కూడా ఉందని పేర్కొన్నారు.
జీవన్ రెడ్డి రాజకీయ ప్రస్థానంపై కూడా సంజయ్ తీవ్ర వ్యాఖ్యలు చేశారు. “జీవన్ రెడ్డి ఏ పార్టీలో ఉంటే ఆ పార్టీకి మనుగడ ఉండదు” అంటూ ఆయన విమర్శించారు. గతంలో కాళేశ్వరం ప్రాజెక్టును నిర్మించిన కేసీఆర్, హరీష్ రావులపై జీవన్రెడ్డి తీవ్ర వ్యాఖ్యలు చేసిన విషయాన్ని గుర్తుచేశారు. “అప్పుడు ఉరి తీయాలని అన్న వ్యక్తిని ఇప్పుడు బీఆర్ఎస్లో చేర్చుకోవడం హాస్యాస్పదం” అని అన్నారు.
ఈ చేరికతో బీఆర్ఎస్లో చీలికలు తప్పవని సంజయ్ అభిప్రాయ పడ్డారు. “హరీష్ రావు సహా పలువురు ఎమ్మెల్యేలు జీవన్ రెడ్డి చేరికను వ్యతిరేకిస్తున్నారు” అంటూ పార్టీ అంతర్గత పరిస్థితులపై కూడా ఆయన పరోక్షంగా వ్యాఖ్యానించారు.
జగిత్యాల సభ నేపథ్యంలో వచ్చిన ఈ వ్యాఖ్యలు ఇప్పుడు తెలంగాణ రాజకీయాల్లో చర్చనీయాంశంగా మారాయి. ఒకవైపు భారీ సభ అంటూ బీఆర్ఎస్ శక్తి ప్రదర్శనకు సిద్ధమవుతుండగా, మరోవైపు ఇలాంటి ఆరోపణలు పార్టీ ఐక్యతపై ప్రశ్నలు లేవనెత్తుతున్నాయి.
మొత్తానికి… జీవన్ రెడ్డి చేరిక, హరీష్రావు గైర్హాజరు, ఢిల్లీ రాజకీయాల ప్రచారం—ఈ మూడు అంశాలు కలిసి బీఆర్ఎస్లో కొత్త సమీకరణాలకు దారితీస్తాయా? లేక ఇవన్నీ కేవలం రాజకీయ ఆరోపణలేనా? అన్నది జగిత్యాల సభతో స్పష్టమయ్యే అవకాశం ఉంది.
