దోమలపై దండయాత్ర.. సీజనల్ వ్యాధులపై నిఘా పటిష్టం
- ఎన్టీఆర్ జిల్లాలో భారీగా తగ్గిన డెంగ్యూ, మలేరియా కేసులు
- గతేడాది 23 డెంగ్యూ.. 41 మలేరియా..
- ఈ ఏడాది ఇప్పటివరకు 2, 3 మాత్రమే
- కేసులు తగ్గినా అప్రమత్తతలో రాజీ వద్దు..
- కలెక్టర్ డాక్టర్ జి.లక్ష్మీశ
- జక్కంపూడి సహా లోతట్టు, కాలువలు, నదీతీర ప్రాంతాల్లో ప్రత్యేక నిఘా
- ప్రతి జ్వర కేసుకు రక్త పరీక్ష.. నిర్ధారణ అయితే వెంటనే చికిత్స
- ప్రతి శుక్రవారం డ్రై డే.. ఇంటింటి తనిఖీలకు ఆదేశం
విజయవాడ, ఆంధ్రప్రభ: వర్షాకాలంలో సీజనల్ వ్యాధుల వ్యాప్తిని అరికట్టేందుకు అన్ని శాఖలు సమన్వయంతో పనిచేయాలని ఎన్టీఆర్ జిల్లా కలెక్టర్ డాక్టర్ జి.లక్ష్మీశ ఆదేశించారు. గతేడాదితో పోలిస్తే జిల్లాలో డెంగ్యూ, మలేరియా కేసులు గణనీయంగా తగ్గినప్పటికీ.. దోమల నియంత్రణ, వ్యాధుల నిఘాలో ఏమాత్రం నిర్లక్ష్యం చేయరాదని స్పష్టం చేశారు. బుధవారం కలెక్టరేట్ నుంచి జూమ్ కాన్ఫరెన్స్ ద్వారా సీజనల్ వ్యాధుల నియంత్రణపై అధికారులతో సమీక్ష నిర్వహించారు.
2025లో జిల్లాలో 23 డెంగ్యూ, 41 మలేరియా కేసులు నమోదుకాగా.. 2026లో ఇప్పటివరకు 2 డెంగ్యూ, 3 మలేరియా కేసులు మాత్రమే నమోదయ్యాయని కలెక్టర్ వెల్లడించారు. కేసులు తగ్గుముఖం పట్టినప్పటికీ వర్షాకాలంలో దోమల వృద్ధికి అనుకూల పరిస్థితులు ఏర్పడే అవకాశం ఉన్నందున ముందస్తు చర్యలు మరింత పటిష్టం చేయాలని సూచించారు.
జక్కంపూడిపై ప్రత్యేక నిఘా..
అధిక జనసాంద్రత, బుడమేరు కాలువ సమీపం, వ్యవసాయ ప్రాంతాల కారణంగా జక్కంపూడి కాలనీలో దోమల వృద్ధికి అనుకూల పరిస్థితులు ఉన్నందున ప్రత్యేక దృష్టి సారించాలని కలెక్టర్ ఆదేశించారు. లార్వా నియంత్రణ, జ్వరాలపై నిఘా, వ్యాధి నిర్ధారణ చర్యలను ముమ్మరం చేయాలని సూచించారు. ప్రతి వారం ప్రయోగశాల సాంకేతిక నిపుణుడిని మార్పిడి పద్ధతిలో కేటాయించాలని ఆదేశించారు. అధిక ప్రమాద ప్రాంతాల్లో జ్వరాలపై విస్తృత నిఘా చేపట్టి ప్రతి జ్వర కేసుకు సకాలంలో రక్త పరీక్షలు, వేగవంతమైన నిర్ధారణ పరీక్షలు నిర్వహించాలని తెలిపారు. డెంగ్యూ, మలేరియా నిర్ధారణ అయిన వెంటనే చికిత్సతో పాటు తదుపరి పర్యవేక్షణ చేపట్టాలని సూచించారు. నిలిచిన నీరు, పూడుకుపోయిన కాలువలు, మురుగు కాలువలు, ఖాళీ స్థలాలు, నీటి నిల్వ పాత్రలను నిరంతరం తనిఖీ చేసి శుభ్రం చేయాలని ఆదేశించారు. అవసరమైన ప్రాంతాల్లో లార్వా నియంత్రణ, పొగమందు, క్రిమిసంహారక పిచికారీ చేపట్టాలని సూచించారు.
డ్రై డే.. ఇంటింటి తనిఖీలు..
ప్రతి శుక్రవారం నిర్వహించే డ్రై డే కార్యక్రమాన్ని మరింత బలోపేతం చేసి ఇంటింటి తనిఖీలు చేపట్టాలని కలెక్టర్ ఆదేశించారు. ఏఎన్ఎంలు, ఎంపీహెచ్ఏ(ఎఫ్)లు, ఆశా కార్యకర్తలు, స్వచ్ఛంద కార్యకర్తలు, పారిశుద్ధ్య సిబ్బంది, గ్రామ, వార్డు సచివాలయ సిబ్బంది ప్రజలకు అవగాహన కల్పించడంతో పాటు దోమల వృద్ధి ప్రదేశాల తొలగింపులో చురుకుగా పాల్గొనాలని సూచించారు. రామవరప్పాడు, ప్రసాదంపాడు, యనమలకుదురు, జక్కంపూడి వైఎస్సార్ కాలనీ, ఎన్టీఆర్ లంక, నదీతీర, కొండ, లోతట్టు ప్రాంతాలు, కాలువల పరిసరాల్లో ప్రత్యేక నిఘా, దోమల నియంత్రణ చర్యలు చేపట్టాలని కలెక్టర్ ఆదేశించారు.
డిజిటల్ వేదికల ద్వారా దోమల వృద్ధి ప్రదేశాలు, అధిక ప్రమాద ప్రాంతాలను గుర్తించి క్షేత్రస్థాయి చర్యలను పర్యవేక్షించాలని సూచించారు. ప్రైవేటు ఆసుపత్రులు, వైద్యశాలలు, ప్రయోగశాలలు డెంగ్యూ కేసులను జిల్లా వ్యాధి నిఘా వ్యవస్థకు సకాలంలో నివేదించేలా చర్యలు తీసుకోవాలని తెలిపారు. జూలై–అక్టోబర్ మధ్య అన్ని శాఖలు సమన్వయంతో ముందస్తు కార్యాచరణ ప్రణాళికను అమలు చేసి సీజనల్ వ్యాధుల వ్యాప్తిని అడ్డుకోవాలని కలెక్టర్ స్పష్టం చేశారు. సమావేశంలో డీఆర్వో ఎం.లక్ష్మీనరసింహం, డీఎంహెచ్ఓ డాక్టర్ శ్రవణ్కుమార్, జిల్లా మలేరియా అధికారి డి.రాజునాయక్, వివిధ శాఖల జిల్లా అధికారులు పాల్గొన్నారు.
