వాహనాల నిర్వహణ పకడ్బందీగా ఉండాలి

పెద్దపల్లి జిల్లా గోదావరిఖని, ఆంధ్రప్రభ: ప్రజలకు అందించే పోలీసు సేవల్లో ఎలాంటి ఆటంకాలు కలగకుండా చూడాలని, పోలీసు వాహనాల నిర్వహణ పకడ్బందీగా ఉండేలా చర్యలు తీసుకోవాలని రామగుండం పోలీస్ కమిషనర్ అంబర్ కిశోర్ ఝా అధికారులను ఆదేశించారు.

బుధవారం కమిషనరేట్ పరిధిలోని పెద్దపల్లి, మంచిర్యాల జోన్ల పోలీస్ స్టేషన్లకు చెందిన పోలీసు వాహనాల పనితీరు, నిర్వహణను కమిషనరేట్ ప్రధాన కార్యాలయంలో సీపీ పరిశీలించారు.

ఈ సందర్భంగా సీపీ మాట్లాడుతూ పెద్దపల్లి, మంచిర్యాల జోన్ల పరిధిలోని పోలీస్ స్టేషన్లకు చెందిన వాహనాలు నిరంతరం అందుబాటులో ఉండేలా, ప్రజలకు అందించే సేవలకు ఎలాంటి ఆటంకం కలగకుండా సక్రమంగా నిర్వహించాలని సూచించారు.

వాహనాల్లోని సమాచార ప్రసార పరికరాల పనితీరును పరిశీలించారు. ప్రతి పోలీసు వాహనంలో ప్రథమ చికిత్స పెట్టె, అత్యవసర దీపం, తాళ్లు, ట్రాఫిక్ కోన్లు, నేరస్థుల రక్షణ రిబ్బన్లు అందుబాటులో ఉండాలని ఆదేశించారు.

అదేవిధంగా రక్షణ సామగ్రి కిట్లో భాగంగా హెల్మెట్, రాళ్ల దాడి నుంచి రక్షణ కవచం, లాఠీ, శరీర రక్షణ కవచం, ప్రతిఫలించే భద్రతా జాకెట్లు తప్పనిసరిగా ఉండేలా చూడాలని సూచించారు.

వాహనాల నిర్వహణలో లోటుపాట్లను ఎప్పటికప్పుడు గుర్తించి సరిదిద్దాలని, వాహనాలను క్షుణ్ణంగా తనిఖీ చేసి సమగ్ర నివేదికను ప్రతి నెలా సమర్పించాలని మోటారు వాహనాల అధికారులను ఆదేశించారు.

పోలీసు వాహనాలపై ప్రత్యేక శ్రద్ధ వహిస్తూ వాటిని ఎల్లప్పుడూ మంచి స్థితిలో ఉంచాలని వాహన డ్రైవర్లకు సూచించారు. పోలీసు అధికారుల ఆధీనంలో ఉన్న వాహనాలను సొంత వాహనాల మాదిరిగా జాగ్రత్తగా నిర్వహించాలని తెలిపారు.

నిర్ణీత వ్యవధిలో వాహనాల మరమ్మతులు, ఇంజిన్ నూనె మార్పు, టైర్ల నిర్వహణ తదితర అంశాల్లో నాణ్యతా ప్రమాణాలను తప్పనిసరిగా పాటించాలని పేర్కొన్నారు.

వాహనాల నిర్వహణపై డ్రైవర్లకు ప్రత్యేక శిక్షణ తరగతులు నిర్వహించి, వాహనాల పనితీరు, భద్రతా ప్రమాణాలపై వారికి అవగాహన కల్పించాలని అధికారులను ఆదేశించారు.