సమానత్వ సమాజ నిర్మాణానికి పూలే మార్గదర్శి

సమానత్వ సమాజ నిర్మాణానికి పూలే మార్గదర్శి

• ప్రభుత్వ సలాహాదారు షబ్బీర్ అలీ

కామారెడ్డి ప్రతినిధి, ఆంధ్రప్రభ ; ప్రముఖ సంఘ సంస్కర్త, సామాజిక విప్లవ జ్యోతి మహాత్మా జ్యోతిరావు పూలే 200వ జయంతి ఉత్సవాలు కామారెడ్డి పట్టణంలోని మున్సిపల్ ఆవరణలో ఘనంగా నిర్వహించారు.

ఈ కార్యక్రమానికి ప్రభుత్వ సలహాదారు మహమ్మద్ అలీ షబ్బీర్ ముఖ్య అతిథిగా హాజరై, జ్యోతిబా పూలే విగ్రహానికి పూలమాల వేసి ఘనంగా నివాళులర్పించారు. అనంతరం ఏర్పాటు చేసిన సభలో ఆయన ప్రసంగించారు. సమానత్వ సమాజ నిర్మాణానికి పూలే మార్గదర్శి అని వివరించారు.

ఈ సందర్భంగా షబ్బీర్ అలీ మాట్లాడుతూ…మహాత్మ జ్యోతిరావు పూలే భారతదేశంలో సామాజిక మార్పుకు శ్రీకారం చుట్టిన మహనీయులలో అగ్రగణ్యుడని పేర్కొన్నారు. కుల వివక్ష, అణచివేత, అసమానతలకు వ్యతిరేకంగా ఆయన జీవితాంతం పోరాడారని చెప్పారు. సమానత్వం, స్వేచ్ఛ, సోదరభావం అనే విలువలను సమాజంలో నాటిన మహోన్నత సంస్కర్తగా ఆయన నిలిచారని కొనియాడారు. విద్య ద్వారానే సమాజ అభివృద్ధి పూలే విద్యను సామాజిక మార్పుకు ఆయుధంగా ఉపయోగించారని షబ్బీర్ అలీ తెలిపారు.

ముఖ్యంగా బాలికల విద్యాభివృద్ధికి ఆయన చేసిన కృషి చిరస్మరణీయమని అన్నారు. తన సహచరురాలు సావిత్రిబాయి పూలేతో కలిసి దేశంలోనే తొలి బాలికల పాఠశాలను స్థాపించడం చారిత్రాత్మక ఘట్టమని గుర్తుచేశారు. సమాజంలోని వెనుకబడిన వర్గాల అభ్యున్నతికి ఆయన చేసిన సేవలు తరతరాలకు ఆదర్శమని పేర్కొన్నారు.

రాజ్యాంగ స్ఫూర్తికి పూలే ఆలోచనలు పునాది అని తెలిపారు. డాక్టర్ బి.ఆర్. అంబేద్కర్ వంటి మహానుభావులపై పూలే ఆలోచనలు ప్రభావం చూపాయని ఆయన తెలిపారు. భారత రాజ్యాంగంలో ప్రతిఫలించిన సమానత్వం, సామాజిక న్యాయం వంటి సిద్ధాంతాలకు పూలే భావజాలం పునాదిగా నిలిచిందని అన్నారు.

ప్రస్తుత సమాజంలో కూడా కులవివక్ష, అసమానతలు పూర్తిగా తొలగిపోలేదని పేర్కొన్న షబ్బీర్ అలీ యువత మహాత్మ పూలే ఆశయాలను ఆదర్శంగా తీసుకుని సమాజ నిర్మాణంలో భాగస్వాములు కావాలని పిలుపునిచ్చారు. విద్య, సామాజిక చైతన్యం ద్వారా సమానత్వ సమాజాన్ని నిర్మించడం ప్రతి ఒక్కరి బాధ్యత అని సూచించారు. ప్రభుత్వం సామాజిక న్యాయానికి కట్టుబడి ఉందన్నారు. కామారెడ్డి నియోజకవర్గంలో ఇంటిగ్రేటెడ్ రెసిడెన్షియల్ స్కూల్ 25 ఎకరాలలో మంజూరు కావడం జరిగింది త్వరలో దానికి శంకుస్థాపన చేస్తాం అన్నారు

ప్రభుత్వం వెనుకబడిన వర్గాల సంక్షేమం, విద్యాభివృద్ధి కోసం అనేక సంక్షేమ పథకాలను అమలు చేస్తోందని తెలిపారు. మహాత్మ పూలే ఆశయాలకు అనుగుణంగా బలహీన వర్గాల అభ్యున్నతికి నిరంతరం కృషి చేస్తామని స్పష్టం చేశారు. ఈ కార్యక్రమంలో అడిషనల్ కలెక్టర్ విక్టర్, గ్రంథాలయ చైర్మన్మ ద్ది చంద్రకాంత్ రెడ్డి, ఇంద్రకరణ్ రెడ్డి, మున్సిపల్ చైర్ పర్సన్ ఇప్ప ఉమాశ్రీనివాస్, పండ్ల రాజు, గూడెం శ్రీనివాస్ రెడ్డి, అనంతరెడ్డి, భీమ్ రెడ్డి, నౌసిలాల్, పాత రాజు, లక్ష్మీ రాజా గౌడ్, ఐరేనీ సందీప్, కారంగుల అశోక్ రెడ్డి, మున్సిపల్ కౌన్సిలర్లు సర్పంచులు, కాంగ్రెస్ పార్టీ నాయకులు కార్యకర్తలు ప్రజాప్రతినిధులు, మున్సిపల్ అధికారులు, వివిధ రాజకీయ పార్టీల నాయకులు, విద్యార్థి సంఘాల ప్రతినిధులు, సామాజిక కార్యకర్తలు, పట్టణ ప్రజలు పెద్ద సంఖ్యలో పాల్గొన్నారు