ipl2026sensation | కోహ్లీ–హెడ్ మధ్య అసలు ఏమైంది…
ipl2026sensation | కోహ్లీ–హెడ్ మధ్య అసలు ఏమైంది…
ipl2026sensation | మైదానంలో మొదలైన ఉద్రిక్తత
కోహ్లీ వ్యాఖ్యలపై సోషల్ మీడియాలో వైరల్ చర్చ
“నో హ్యాండ్షేక్” వీడియోతో పెరిగిన సంచలనం
అభిమానుల్లో రెండు వర్గాలుగా మారిన డిబేట్
మ్యాచ్ హీట్ మాత్రమేనా..? లేక నిజంగానే వివాదమా?
ipl2026sensation | ఆంధ్రప్రభ ప్రత్యేక కథనం:
ఐపీఎల్లో మ్యాచ్లు ఎంత ఉత్కంఠగా సాగుతాయో.. కొన్ని సందర్భాల్లో మ్యాచ్ తర్వాతి ఘటనలే అంతకంటే పెద్ద సంచలనంగా మారిపోతుంటాయి. ప్రస్తుతం అలాంటి వివాదంగానే విరాట్ కోహ్లీ–ట్రావిస్ హెడ్ “నో హ్యాండ్షేక్” వ్యవహారం సోషల్ మీడియాలో వైరల్ అవుతోంది.
“కోహ్లీ కావాలనే ట్రావిస్ హెడ్కు హ్యాండ్షేక్ ఇవ్వలేదా?”, “మైదానంలోని వాగ్వాదమే దీనికి కారణమా?”, “లేక ఇది సోషల్ మీడియా అతిశయోక్తేనా?” అనే ప్రశ్నలు ఇప్పుడు క్రికెట్ అభిమానుల్లో పెద్ద చర్చకు దారితీశాయి. ఈ ఘటనపై దేశీయ, అంతర్జాతీయ మీడియా కథనాలు, మ్యాచ్ వీడియోలు, మాజీ క్రికెటర్ల వ్యాఖ్యలు పరిశీలిస్తే.. కొన్ని విషయాలు స్పష్టంగా కనిపిస్తున్నాయి.
అసలు వివాదం ఎలా మొదలైంది?
ఐపీఎల్ 2026లో సన్రైజర్స్ హైదరాబాద్ , రాయల్ చాలెంజర్స్ బెంగళూరు మధ్య జరిగిన మ్యాచ్లో ఈ ఘటన చోటుచేసుకుంది. మ్యాచ్ సందర్భంగా కోహ్లీ, ట్రావిస్ హెడ్ మధ్య మైదానంలో మాటల యుద్ధం జరిగినట్లు పలు మీడియా సంస్థలు పేర్కొన్నాయి.
ముఖ్యంగా ట్రావిస్ హెడ్ “ఇంపాక్ట్ ప్లేయర్”గా ఎక్కువగా వస్తున్నాడనే విషయాన్ని ఉద్దేశించి కోహ్లీ వ్యంగ్యంగా “కిందకు వచ్చి బౌలింగ్ చేయి” అన్నట్లుగా వ్యాఖ్యానించినట్లు కామెంటేటర్ ఇర్ఫాన్ పఠాన్ వివరించారు.
ఈ మ్యాచ్లో ఆర్సీబీ భారీ లక్ష్యాన్ని ఛేదించే ప్రయత్నంలో ఒత్తిడిలో ఉండగా.. కోహ్లీ త్వరగానే ఔటయ్యాడు. ఆ తర్వాత కూడా ఇద్దరి మధ్య ఉద్రిక్తత కొనసాగినట్లు వీడియోల్లో కనిపించింది.
వైరల్ అయిన “నో హ్యాండ్షేక్” వీడియో..
మ్యాచ్ ముగిసిన తర్వాత ఆటగాళ్లు సాధారణంగా చేసుకునే హ్యాండ్షేక్ సమయంలో.. ట్రావిస్ హెడ్ చేయి చాపగా కోహ్లీ అతడిని పట్టించుకోకుండా ముందుకు వెళ్లినట్లు వైరల్ వీడియోల్లో కనిపించింది.
ఈ వీడియో సోషల్ మీడియాలో భారీగా వైరల్ అయింది. కొందరు అభిమానులు దీన్ని “కోహ్లీ ఆగ్రహం”గా అభివర్ణించగా.. మరికొందరు “అది కేవలం మ్యాచ్ హీట్లో జరిగిన చిన్న ఘటన మాత్రమే” అని అభిప్రాయపడ్డారు.
click here to read 2010 FIFA World Cup | స్టెప్పులతో హీట్పుట్టిస్తున్న షకీరా
