Fake Facebook | సైబర్ చోరుల నయా దందా!
Fake Facebook | సైబర్ చోరుల నయా దందా!
Fake Facebook |ఆంధ్రప్రభ, వెబ్ డెస్క్: రాకేశ్ ఆఫీస్ వర్క్లో బిజీగా ఉన్నాడు. అప్పుడే తన ఫేస్బుక్ మెసెంజర్లో వరుసగా నోటిఫికేషన్లు వస్తున్నాయి. “అరే, ఏంటి ఇన్ని మెసేజ్లు వస్తున్నాయి?” అని వెంటనే ఫోన్ ఓపెన్ చేసి చూడగా.. తన ఫ్రెండ్ రాజు నుంచి మెసేజ్లు కనిపించాయి. “హాయ్ రా మామా! నాకు అర్జెంట్గా డబ్బులు కావాలిరా, ఎమర్జెన్సీ!” అంటూ వరుసగా మెసేజ్లు వస్తూనే ఉన్నాయి.
వాడికి ఏం అవసరం వచ్చిందో ఏంటో అని ఏమాత్రం ఆలోచించకుండా, వెంటనే రాకేశ్ తన అకౌంట్ నుంచి రాజు అడిగినంత డబ్బు పంపించేశాడు. కాసేపటి తర్వాత రాకేశ్కు రాజు దగ్గర నుంచి ఫోన్. “మామా! ఫేస్బుక్లో నా పేరుతో ఎవరో ఫేక్ ప్రొఫైల్ క్రియేట్ చేసి డబ్బులు అడుగుతున్నారు. అది నా అకౌంట్ కాదు, మోసం!” అని చెప్పాడు. ఆ మాటతో రాకేశ్ ఒక్కసారిగా షాక్కు గురయ్యాడు. వెంటనే ఫేస్బుక్ ఓపెన్ చేసి చూడగా.. ఆ ప్రొఫైల్లో ఉన్నది తన మిత్రుడి ఫోటోనే, వివరాలూ అతడివే.. కానీ అది తన స్నేహితుడి అసలు అకౌంట్ కాదు!
ఇలా సోషల్ మీడియాలో నకిలీ ప్రోఫైల్ లతో సైబర్ నేరగాళ్లు కొత్త మోసాలకు తెర లేపుతున్నారు. సోషల్ మీడియా అకౌంట్లను క్లోన్ చేసి, అదే ఫోటోలు, అదే పేరు ఉపయోగించి డూప్లికేట్ ప్రొఫైళ్లు సృష్టించి ఈ నకిలీ అకౌంట్ల ద్వారా స్నేహితులు, బంధువులకు మెసేజ్లు పంపి డబ్బులు అడగడం, వ్యక్తిగత సమాచారం సేకరించడం వంటి మోసాలు ఈ మధ్య కాలంలో చాలా పెరిగిపోతున్నాయి. వీటిపై అప్రమత్తంగా ఉండాలని పోలీసు అధికారులు సూచిస్తున్నారు. ఒక వేళ సైబర్ మోసాలకు గురైనట్లయితే వెంటనే 1930 సైబర్ క్రైమ్ హెల్ప్లైన్కు కాల్ చేయడం లేదా సైబర్ క్రైమ్ పోర్టల్లో ఫిర్యాదు నమోదు చేయండి.
ఇలాంటి నకిలీ ఫ్రోఫైల్ లను ఎలా గుర్తించాలి..
డబ్బులు కావాని మీకు తెలిసిన బంధువులుగానీ, మిత్రలుగానీ మెసేజ్ చేస్తే… ఈ విషయాలను తప్పక గమనించండి.
- ప్రొఫైల్ ఎప్పుడు క్రియేట్ అయిందో చెక్ చేయండి.
- ఫ్రెండ్స్ లిస్ట్ లో సంఖ్య, పోస్టుల సంఖ్యను గమనించండి.
- ముఖ్యంగా మ్యూచువల్ ఫ్రెండ్స్ ఉన్నారా లేదా చెక్ చేయండి.
- మీకు ఇంకా అనుమానంగా అనిపిస్తే అసలు వ్యక్తిని ఫోన్ చేసి నిర్ధారించుకోండి.
ఎలాంటి జాగ్రత్తలు తీసుకోవాలి?
- ఇప్పటికే ఫ్రెండ్గా ఉన్న వ్యక్తి నుంచి మళ్లీ రిక్వెస్ట్ వస్తే వెంటనే యాక్సెప్ట్ చేయొద్దు.
- డూప్లికేట్ అకౌంట్గా అనిపిస్తే వెంటనే రిపోర్ట్ చేయండి.
- సోషల్ మీడియాలో వచ్చిన మెసేజ్ల ఆధారంగా డబ్బులు పంపే ముందు తప్పనిసరిగా ధృవీకరించండి.
. మీ కుటుంబ సభ్యులు, స్నేహితులను కూడా ఈ మోసాల గురించి అప్రమత్తం చేయండి.
