Kurnool|ఘనంగా రాజ్యాంగ దినోత్సవ వేడుకలు
Kurnool|కర్నూలు బ్యూరో, ఆంధ్రప్రభ : ఆంధ్రప్రదేశ్ కాలుష్య నియంత్రణ మండలి కర్నూలు కార్యాలయంలో బుధవారం 76వ జాతీయ రాజ్యాంగ దినోత్సవం (సంవిధాన్ దివస్) ఘనంగా నిర్వహించారు. ఈ కార్యక్రమంలో సీనియర్ ఎన్విరాన్మెంటల్ ఇంజనీర్ ఎస్. శంకర్ నాయక్, సీనియర్ ఎన్విరాన్మెంటల్ సైంటిస్ట్ ఆర్. వీరేంద్ర కుమార్, జోనల్ ల్యాబొరేటరీ ప్రతినిధులు పి. లక్ష్మీనారాయణ, జి. నరసింహులు, పి.వి. కిషోర్ రెడ్డి, విశ్లేషకుడు వి. సుధాకర్, వి. నారాయణరావు తదితరులు పాల్గొన్నారు. ఈ సందర్భంగా అధికారులు రాజ్యాంగ ప్రాధాన్యతపై మాట్లాడుతూ.. నవంబర్ 26, 1949న రాజ్యాంగ సభ భారత రాజ్యాంగాన్ని ఆమోదించగా, అది జనవరి 26, 1950 నుంచి అమల్లోకి తేచ్చి దేశాన్ని సార్వభౌమ ప్రజాస్వామ్య గణతంత్రంగా మార్చిందని గుర్తుచేశారు. భారత రాజ్యాంగం కేవలం చట్టపరమైన పత్రం మాత్రమే కాకుండా, బిలియన్ల మంది ప్రజల ఆశయాలను ప్రతిబింబించే జీవంత దస్తావేజని పేర్కొన్నారు.
డాక్టర్ బి.ఆర్. అంబేద్కర్ నేతృత్వంలో దాదాపు మూడు సంవత్సరాల చర్చలు, నిర్మాణాత్మక వాదోపవాదాలతో ముసాయిదా సిద్ధమైనదని, ఆయన దూరదృష్టి భారత వైవిధ్య సమాజాన్ని ఒకే గట్టులో కట్టిపడేసేలా రాజ్యాంగాన్ని తీర్చిదిద్దిందని అధికారులు తెలిపారు. రాజ్యాంగ ప్రవేశికలోని “మేము, భారత ప్రజలు” అనే పదాలు ప్రజాస్వామ్యానికి మూలస్తంభమని, అందులో న్యాయం, స్వేచ్ఛ, సమానత్వం, సోదరభావం వంటి విలువలు ప్రతి పౌరుడి జీవన విధానాన్ని నిర్దేశిస్తాయని వారు పేర్కొన్నారు. ప్రాథమిక హక్కులు, ప్రాథమిక విధులు దేశ ప్రజలందరికీ మార్గనిర్దేశికలుగా నిలుస్తున్నాయని వివరించారు.
రాజ్యాంగ దినోత్సవం ఆత్మపరిశీలనకు అవకాశం కల్పించే రోజు అని, వ్యవస్థాపకులు చూపిన మార్గంలో నడవడం ప్రతి పౌరుడి బాధ్యత అని అధికారులు అభిప్రాయపడ్డారు. హక్కులు, విధులు రెండూ సమానంగా పాలన వ్యవస్థకు పునాది అని గుర్తు చేశారు. రాజ్యాంగ విలువలను ప్రతి రోజూ ఆచరించాలనే పిలుపునిచ్చారు. డాక్టర్ రాజేంద్ర ప్రసాద్ వ్యాఖ్యానించిన “రాజ్యాంగం దాన్ని అమలు చేసే వారిపైనే ఆధారపడి ఉంటుంది” అనే భావనను అధికారులు స్మరించారు. అనంతరం కార్యక్రమంలో పాల్గొన్న వారందరూ రాజ్యాంగ దినోత్సవ ప్రతిజ్ఞ చేశారు.
