ఢిల్లీ : ఉపరాష్ట్రపతి పదవికి ఇటీవల జగ్‌దీప్‌ దన్‌ఖడ్ (Jagdeep Dhankhad) రాజీనామా (resignation) చేసిన సంగతి తెలిసిందే. దీంతో ఆ పదవికి త్వరలో ఎన్నికలు జరగనున్నాయి. దీనికి సంబంధించి తాజాగా షెడ్యూల్ విడుదలైంది. సెప్టెంబర్ 9న ఉప రాష్ట్రపతి ఎన్నిక జరగనున్నట్లు కేంద్ర ఎన్నికల సంఘం (Central Election Commission) శుక్రవారం ప్రకటించింది.
ఆగస్టు 7న ఈ ఎన్నికకు నోటిఫికేషన్ విడుదల కానుంది. ఆగస్టు 21 తేదీ వరకు నామినేషన్లు స్వీకరించనున్నారు. నామినేషన్ పరిశీలన 22వ తేదిన జరగనుంది. ఇక ఆగస్టు 25వ తేదీలోపు నామినేషన్లను విత్‌డ్రా చేసుకోవచ్చు. సెప్టెంబర్ 9న ఉదయం 10 గంటల నుంచి సాయంత్రం 5 గంటల వరకు పోలింగ్ జరగనుంది.
పోలింగ్ రోజునే కౌంటింగ్‌ కూడా జరగనుంది. ఉపరాష్ట్రపతి ఎన్నికలు అనేవి భారత రాజ్యంగంలోని ఆర్టికల్ 66 ప్రకారం నిర్వహించే ఎన్నిక. ఇది రాష్ట్రపతి ఎన్నికతో చూస్తే కొంచెం భిన్నంగా ఉంటుంది. కొత్త ఉపరాష్ట్రపతిని ఎన్నుకునేందుకు ఎలక్టోరల్‌ కాలేజీ తరఫున లోక్‌సభ, రాజ్యసభకు ఎన్నికైన, అలాగే నామినేట్ చేయబడిన సభ్యులకు మాత్రమే ఓటు వేసే అవకాశం ఉంటుంది. రాష్ట్ర ఎమ్మెల్యేలకు ఇందులో ఓటు హక్కు ఉండదు. ఓటు వేసే వారు ఎన్నికల్లో బరిలోకి దిగిన అభ్యర్థులను 1,2,3 ప్రాధాన్యత క్రమంలో గుర్తిస్తారు. రహస్య బ్యాలెట్‌ ద్వారా ఈ ఓటింగ్ అనేది నిర్వహిస్తారు.
ఉప రాష్ట్రపతి పదవికి అర్హ‌త‌లు..
ఉపరాష్ట్రపతి పదవికి పోటీ చేయాలంటే భారత పౌరుడై ఉండాలి. కనీసం 35 సంవత్సరాలు వయస్సు ఉండాలి. రాజ్యసభ సభ్యుడిగా ఎన్నికయ్యే అర్హత కూడా ఉండాలి. అలాగే లాభదాయక పదవిలో ఉండకూడదు. రిటర్నింగ్ అధికారిగా లోక్‌సభ లేదా రాజ్యసభ సెక్రటరీ జనరల్ రొటేషన్ పద్ధతిలో నియమించబడతారు. అయితే నామినేషన్, పరిశీలన, ఉపసంహరణ, పోలింగ్ ఇలా మొత్తం ప్రక్రియన 32 రోజుల్లో పూర్తి చేయాలని ఆర్టికల్ 66 పేర్కొంది.
