వెల‌గ‌పూడి – ఏపీ డిప్యూటీ సీఎం పవన్ కల్యాణ్ ప్రధానమంత్రి నరేంద్ర మోదీపై తనకున్న ప్రగాఢ విశ్వాసాన్ని, అభిమానాన్ని మరోసారి చాటుకున్నారు. ప్రధాని మోదీని “అనికేత్” అంటూ అభివర్ణిస్తూ, ఆయన నిస్వార్థ సేవానిరతిని కొనియాడారు. అదే సమయంలో, ఉగ్రవాదంపై కేంద్ర ప్రభుత్వం తీసుకుంటున్న కఠిన చర్యలకు, ముఖ్యంగా “ఆపరేషన్ సిందూర్”కు ఆయన సంపూర్ణ మద్దతు ప్రకటించారు. ఈ మేరకు పవన్ కల్యాణ్ తన ఎక్స్ (ట్విట్టర్) ఖాతా ద్వారా పలు కీలక వ్యాఖ్యలు చేశారు.
ప్రధాని నరేంద్ర మోదీని “అనికేత్”గా పేర్కొంటూ పవన్ కల్యాణ్ ఆసక్తికరమైన విశ్లేషణ చేశారు. “‘అనికేత్’ ఒక పేరు, ఒక సంకల్పం. ప్రధానమంత్రి నరేంద్ర మోదీ తన సన్యాస జీవితంలో ‘అనికేత్’ అని పిలువబడ్డారు. అనికేత్ అంటే ‘ఇల్లు లేనివాడు’ అని అర్థం” అని వివరించారు. సృష్టికి శాశ్వత సన్యాసి అయిన శివునికి కూడా “అనికేత్” ఒక పేరని గుర్తుచేశారు. “వారికి (శివునికి) విశ్వంలోని ప్రతి కణం ఒక ఇల్లు. అయినప్పటికీ వారికి సొంత ఇల్లు లేదు. నేడు కశ్మీర్ నుండి కన్యాకుమారి వరకు, కామాఖ్య నుండి ద్వారక వరకు మొత్తం భారతదేశాన్ని తనదిగా భావించిన అదే ‘అనికేత్’ (మోదీ), స్వయంగా ఇల్లు లేనప్పటికీ, ‘ప్రధాన మంత్రి ఆవాస్ యోజన’ కింద కోట్లాది మందికి ఇళ్లను అప్పగించారు” అంటూ ప్రశంసించారు.
