ఆ దర్శకుడితో ఏడడుగులు వేసిన కలర్స్ స్వాతి..
- కొత్త జీవితంలోకి అడుగుపెట్టిన కలర్స్ స్వాతి
- పెళ్లి బంధంగా మారిన ప్రేమ..
- ‘మంత్ ఆఫ్ మధు’తో మొదలైన పరిచయం..
- సోషల్ మీడియాలో వెడ్డింగ్ ఫొటోలు షేర్ చేసిన కలర్స్ స్వాతి..
- అభిమానుల శుభాకాంక్షల వెల్లువ
ఆంధ్రప్రభ, హైదరాబాద్ : టాలీవుడ్ సీనియర్ నటి, ప్రముఖ యాంకర్ ‘కలర్స్’ స్వాతి తన వ్యక్తిగత జీవితానికి సంబంధించి అభిమానులకు ఒక తీపి కబురు అందించారు. గత కొంతకాలంగా ఆమె వైవాహిక జీవితంపై వస్తున్న ఊహాగానాలకు ఫుల్స్టాప్ పెడుతూ, తను రెండో వివాహం చేసుకున్నట్లు ఆమె అధికారికంగా ప్రకటించారు. తన రీ-ఎంట్రీ మూవీ ‘మంత్ ఆఫ్ మధు’ (Month of Madhu) చిత్ర దర్శకుడు శ్రీకాంత్ నాగోతిని ఆమె పెళ్లాడారు. ఈ మేరకు తన సోషల్ మీడియా వేదికగా “హిచ్డ్” (Hitched) అంటూ వివాహ వేడుకకు సంబంధించిన అందమైన ఫోటోలను పంచుకుంటూ ఈ విషయాన్ని ధృవీకరించారు.
ఎలాంటి ఆర్భాటాలు లేకుండా, కేవలం కుటుంబ సభ్యులు, అత్యంత సన్నిహితుల సమక్షంలో సాంప్రదాయబద్ధంగా వీరి వివాహం జరిగింది. 2023లో విడుదలైన ‘మంత్ ఆఫ్ మధు’ సినిమా షూటింగ్ సమయంలోనే వీరిద్దరి మధ్య పరిచయం ఏర్పడిందని, అది కాస్తా కాలక్రమేణా ప్రేమగా మారి ఇప్పుడు పెళ్లి పీటల వరకు దారితీసిందని తెలుస్తోంది. టాలీవుడ్లో గతంలో పలువురు హీరోయిన్లు తమ చిత్రాల దర్శకులను వివాహం చేసుకోగా, ఇప్పుడు స్వాతి కూడా అదే బాటలో పయనించి నూతన జీవితాన్ని ప్రారంభించారు.
స్వాతి గతంలో 2018లో వికాస్ వాసు అనే మలయాళీ పైలట్ను ప్రేమించి వివాహం చేసుకున్న సంగతి తెలిసిందే. అయితే, కొంతకాలానికే వీరిద్దరి మధ్య మనస్పర్థలు రావడంతో పరస్పర అంగీకారంతో విడాకులు తీసుకుని విడిపోయారు. ఆ తర్వాత ‘మంత్ ఆఫ్ మధు’ సినిమా ప్రమోషన్స్ సమయంలో మీడియా ప్రతినిధులు ఆమె విడాకుల వార్తలపై ప్రశ్నించినప్పటికీ, తన వ్యక్తిగత విషయాలను పంచుకోవడానికి స్వాతి ఇష్టపడలేదు. జీవితంలో ఎదురైన ఒడిదుడుకులను అధిగమించి, సరికొత్త ఆశలతో సరికొత్త ప్రయాణాన్ని ప్రారంభించిన ఈ నూతన జంటకు చిత్ర పరిశ్రమకు చెందిన ప్రముఖులతో పాటు అభిమానులు సోషల్ మీడియా వేదికగా శుభాకాంక్షలు తెలుపుతున్నారు.
