Missing case | లాకప్ డెత్ జరిగినట్లు సిట్ నిర్ధారణ
Missing case | ఆంధ్రప్రభ, వెబ్డెస్క్: విజయవాడలో సంచలనం సృష్టించిన గాదె సాయికృష్ణ మిస్సింగ్ కేసులో కీలక పరిణామాలు చోటుచేసుకున్నాయి. ఈ కేసుపై దర్యాప్తు నిర్వహిస్తున్న ప్రత్యేక దర్యాప్తు బృందం (సిట్) సాయికృష్ణ మృతి లాకప్ డెత్గా జరిగినట్లు తమ విచారణలో గుర్తించినట్లు సమాచారం. ఈ మేరకు సీఐ నాగరాజుకు సంబంధించిన రిమాండ్ రిపోర్టులో కీలక అంశాలను పొందుపరిచినట్లు తెలుస్తోంది.
సాయికృష్ణ అదృశ్యం వ్యవహారంపై రాష్ట్ర ప్రభుత్వం సిట్ను నియమించిన సంగతి తెలిసిందే. దర్యాప్తులో భాగంగా కృష్ణలంక పోలీస్ స్టేషన్ సిబ్బందితో పాటు మార్కాపురం నుంచి తీసుకొచ్చిన పోలీసు సిబ్బందిని కూడా సిట్ అధికారులు విచారించారు. ఈ విచారణలో సాయికృష్ణ పోలీసు కస్టడీలోనే మరణించినట్లు తేలినట్లు సమాచారం.
అంతేకాకుండా ఘటనకు సంబంధించిన ఆధారాలను చెరిపివేసేందుకు ప్రయత్నాలు జరిగినట్లు సిట్ గుర్తించినట్లు తెలుస్తోంది. సాక్ష్యాలను నాశనం చేసే దిశగా చర్యలు తీసుకున్నారనే ఆరోపణలను కూడా రిమాండ్ రిపోర్టులో ప్రస్తావించినట్లు సమాచారం.
కేసులో కీలక సాక్షిగా ఉన్న ఓ ఎస్సై ఇచ్చిన వాంగ్మూలంలో, సాయికృష్ణ మృతదేహాన్ని కృష్ణలంక పోలీస్ స్టేషన్లో చూసినట్లు పేర్కొన్నారని సిట్ వెల్లడించినట్లు సమాచారం. ఈ వాంగ్మూలం కేసు దర్యాప్తులో కీలక మలుపుగా మారింది.
ఇప్పటికే అరెస్టైన సస్పెండెడ్ సీఐ నాగరాజును అధికారులు కోర్టులో హాజరుపరిచారు. ఆయన రిమాండ్కు సంబంధించిన వాదనలు న్యాయస్థానంలో కొనసాగుతున్నాయి. ఈ కేసులో మరిన్ని కీలక విషయాలు వెలుగులోకి వచ్చే అవకాశం ఉందని భావిస్తున్నారు. సాయికృష్ణ కేసు రాష్ట్రవ్యాప్తంగా తీవ్ర చర్చనీయాంశంగా మారిన నేపథ్యంలో, సిట్ విచారణలో బయటపడుతున్న అంశాలు మరింత సంచలనం రేపుతున్నాయి.
