100dail | అసలు ఏం జరుగుతోంది?
100dail | అసలు ఏం జరుగుతోంది?
100dail | నగరమంతా కనిపిస్తున్న సంచలన పోస్టర్లు
బండి సంజయ్ కుమారుడిపై ఆరోపణల నేపథ్యం
రాజకీయ వర్గాల్లో వేడెక్కిన విమర్శలు
పోస్టర్లపై పోలీసుల దర్యాప్తు
తెలంగాణ రాజకీయాల్లో కొత్త ఒరవడి?
100dail | ఆంధ్రప్రభ, వెబ్ డెస్క్ : హైదరాబాద్ నగరంలో ఎక్కడ చూసినా ఇప్పుడు ఒకే రకమైన పోస్టర్లు కనిపిస్తున్నాయి. “పోక్సో (POCSO) కేసు నిందితుడు, కేంద్ర మంత్రి బండి సంజయ్ కుమారుడు కనిపించడం లేదు.. ఎక్కడైనా కనిపిస్తే 100కు డయల్ చేయండి” అంటూ వెలసిన ఈ పోస్టర్లు ప్రజల్లో ఆసక్తిని, రాజకీయ వర్గాల్లో చర్చను రేకెత్తిస్తున్నాయి.
ముఖ్యంగా జనం ఎక్కువగా ఉండే ప్రాంతాలను లక్ష్యంగా చేసుకుని ఈ ప్రచారం సాగుతోంది. సికింద్రాబాద్ రైల్వే స్టేషన్ పరిసర ప్రాంతాలు,
జూబ్లీ బస్ స్టాండ్, మహాత్మా గాంధీ బస్ స్టేషన్ , నగరంలోని ప్రధాన కూడళ్ల వద్ద గోడ పత్రికలు దర్శనమిస్తున్నాయి. మెట్రో సైతం బండి భగీరథ కనిపించడం లేదంటూ ఎవరికైనా కనిపిస్తే 100 కాల్ చేయాలని సామాజిక కార్యకర్తలు ప్రచారం చేస్తున్నారు.
గతంలో బండి భగీరథ్పై ఒక మైనర్ బాలిక పట్ల అసభ్యంగా ప్రవర్తించారనే ఆరోపణలతో పోలీసులు కేసు నమోదు చేసిన విషయం తెలిసిందే. ఈ క్రమంలోనే ఆయనపై పోక్సో చట్టం కింద నిబంధనలు చేర్చారు. చట్టపరంగా ఈ కేసు విచారణలో ఉండగానే, నిందితుడు అందుబాటులో లేరని, పోలీసులు అతడిని అరెస్ట్ చేయడం లేదని విమర్శిస్తూ గుర్తుతెలియని వ్యక్తులు (ప్రజల పేరుతో) ఈ పోస్టర్ల ప్రచారానికి తెరలేపారు.
సాధారణంగా ఏదైనా కేసులో నిందితులు పరారీలో ఉంటే పోలీసులు ప్రకటనలు విడుదల చేస్తారు. కానీ, ఇక్కడ ప్రజలే నేరుగా పోస్టర్లు అంటించడం విశేషం. కేంద్ర మంత్రి కుమారుడు కావడం వల్లే పోలీసులు చర్యలు తీసుకోవడం లేదని, చట్టం అందరికీ సమానంగా ఉండాలని ప్రతిపక్ష పార్టీల కార్యకర్తలు సోషల్ మీడియా వేదికగా డిమాండ్ చేస్తున్నారు. ఇది కేవలం రాజకీయ కక్ష సాధింపు చర్య అని, బండి సంజయ్ ప్రతిష్టను దెబ్బతీయడానికే ప్రత్యర్థి పార్టీలు కుట్రపూరితంగా ఇలాంటి పోస్టర్లు వేయిస్తున్నాయని బీజేపీ శ్రేణులు మండిపడుతున్నాయి.
ఈ పోస్టర్ల వ్యవహారంపై పోలీసులు దర్యాప్తు చేస్తున్నారు. బహిరంగ ప్రదేశాల్లో అనుమతి లేకుండా పోస్టర్లు అంటించిన వారిపై చర్యలు తీసుకునే అవకాశం ఉంది. మరోవైపు, ఈ ‘మిస్సింగ్’ పోస్టర్ల ప్రచారం రాజకీయంగా బండి సంజయ్కు ఇబ్బందికరంగా మారింది.
న్యాయపరమైన అంశాలు కోర్టు పరిధిలో ఉన్నప్పటికీ, ఇలా వీధుల్లో పోస్టర్ల రూపంలో నిరసన తెలపడం తెలంగాణ రాజకీయాల్లో ఒక కొత్త ఒరవడికి దారితీసింది. ఈ అంశంపై అధికారికంగా పోలీసులు లేదా బండి సంజయ్ కార్యాలయం నుండి మరిన్ని స్పష్టత రావాల్సి ఉంది.
CLICK HERE TO READ మొక్క జొన్న కొనుగోలు ఆలస్యం జరిగితే కఠిన చర్యలు
