మత్తు మాఫియాకు ముచ్చెమటలు

గంజాయి అక్రమ రవాణాదారుల వెన్నులో వణుకు

గంజాయి కట్టడికి ప్రత్యేక కార్యాచరణ

29 కేసుల్లో పట్టుబడిన 687.409 కిలోల గంజాయి దహనం

రూ.3.43 కోట్ల మత్తు పదార్థాల ధ్వంసం

జూన్‌ వరకు 44 కేసులు.. 98 మంది అరెస్టు

248.589 కిలోల గంజాయి స్వాధీనం

గంజాయి రహిత ఖమ్మం లక్ష్యంగా కార్యాచరణ

అక్రమ రవాణా ముఠాలపై పీడీ యాక్ట్‌కు రంగం సిద్ధం

ఖమ్మం, ఆంధ్రప్రభ : గంజాయి అక్రమ రవాణాపై ఖమ్మం పోలీస్ కమిషనర్ సునీల్‌దత్‌ ఉక్కుపాదం మోపుతున్నారు. మత్తు పదార్థాల నిర్మూలనను అత్యంత ప్రాధాన్య అంశంగా తీసుకుని ఆయన ప్రత్యేక దృష్టి సారించారు. గంజాయి సాగు, రవాణా, విక్రయాలపై నిఘాను పటిష్ఠం చేసి అక్రమార్కులపై వరుసగా కేసులు నమోదు చేయిస్తున్నారు. అనుమానాస్పద కదలికలపై నిఘా పెట్టడంతో పాటు గంజాయి సరఫరా వెనుక ఉన్న నెట్‌వర్క్‌ను గుర్తించేలా పోలీసు యంత్రాంగాన్ని అప్రమత్తం చేస్తున్నారు. ఆయన ఆదేశాలతో జిల్లాలో గంజాయి రవాణాపై తనిఖీలు, దాడులు ముమ్మరమయ్యాయి. పట్టుబడిన గంజాయిని కేసుల వారీగా నిబంధనల ప్రకారం ధ్వంసం చేయిస్తూ అక్రమ రవాణాదారులకు గట్టి హెచ్చరిక పంపుతున్నారు. జిల్లాను మత్తు పదార్థాల రహిత ప్రాంతంగా మార్చే లక్ష్యంతో సునీల్‌దత్‌ తీసుకుంటున్న చర్యలు ఇప్పుడు గంజాయి ముఠాలకు గుబులు పుట్టిస్తున్నాయి.

రూ.3.43 కోట్ల గంజాయి దహనం

సునీల్‌దత్‌ పర్యవేక్షణలో ఖమ్మం పోలీస్ కమిషనరేట్ పరిధిలో పట్టుబడిన భారీ మొత్తంలో గంజాయిని కోర్టు ఆదేశాల మేరకు దహనం చేశారు. వివిధ పోలీస్ స్టేషన్లకు సంబంధించిన 29 కేసుల్లో స్వాధీనం చేసుకున్న 687.409 కిలోల ఎండు గంజాయిని శాస్త్రీయ పద్ధతిలో ధ్వంసం చేశారు. దీని విలువ సుమారు రూ.3 కోట్ల 43 లక్షలు ఉంటుందని పోలీసులు తెలిపారు. తల్లాడ మండలం గోపాల్‌పేటలోని ఏడబ్ల్యూఎం కన్సల్టెన్సీ లిమిటెడ్‌లో ఈ ప్రక్రియను నిబంధనలకు అనుగుణంగా నిర్వహించారు. కేంద్ర, రాష్ట్ర ప్రభుత్వాల గెజిట్ నోటిఫికేషన్లు, ఉన్నతాధికారుల సూచనల మేరకు దహనం చేపట్టారు. ఇంత భారీ మొత్తంలో గంజాయిని ఒకేసారి ధ్వంసం చేయడం ద్వారా అక్రమ రవాణాపై పోలీసుల కఠిన వైఖరి స్పష్టమైంది. గంజాయి రవాణా చేసి పట్టుబడితే దాని వెనుక ఉన్న ఎవరినీ ఉపేక్షించబోమన్న సందేశాన్ని సునీల్‌దత్‌ చర్యలు చాటుతున్నాయి.

జూన్‌ వరకు 44 కేసులు

సునీల్‌దత్‌ ప్రత్యేక దృష్టితో గంజాయి అక్రమ రవాణాపై పోలీసుల నిఘా మరింత పెరిగింది. జూన్‌ వరకు ఖమ్మం కమిషనరేట్ పరిధిలో గంజాయికి సంబంధించి 44 కేసులు నమోదయ్యాయి. ఈ కేసుల్లో 158 మంది నిందితులు ఉన్నట్లు పోలీసులు గుర్తించారు. వారిలో 98 మందిని అరెస్టు చేసి రిమాండ్‌కు తరలించారు. నిందితుల నుంచి 248.589 కిలోల గంజాయిని స్వాధీనం చేసుకున్నారు. పట్టుబడిన గంజాయి విలువ రూ.1,24,13,910గా నమోదైంది. కేసులు నమోదు చేయడంతో ఆగకుండా నిందితుల నెట్‌వర్క్‌ను ఛేదించేలా దర్యాప్తు కొనసాగుతోంది. గంజాయి అక్రమ వ్యాపారానికి మూలాలను గుర్తించి కట్టడి చేయాలన్న సునీల్‌దత్‌ వైఖరితో మత్తు ముఠాలపై పోలీసుల ఒత్తిడి పెరుగుతోంది.

సాగు చేసినా.. తరలించినా వదలం

గంజాయి సాగు చేసినా, అక్రమంగా రవాణా చేసినా కఠిన చర్యలు తప్పవన్నది సునీల్‌దత్‌ స్పష్టమైన వైఖరి. గంజాయి విక్రయాలకు పాల్పడే వారిపైనా చట్టపరంగా కఠిన చర్యలు తీసుకునేలా ఆయన పోలీసు యంత్రాంగాన్ని ఆదేశిస్తున్నారు. మత్తు పదార్థాల నిర్మూలనలో భాగంగా జిల్లావ్యాప్తంగా తనిఖీలను మరింత ముమ్మరం చేయాలని స్పష్టం చేశారు. గంజాయి అక్రమ రవాణాకు పాల్పడే వారిపై అవసరమైన సందర్భాల్లో పీడీ యాక్ట్ వంటి కఠిన చట్టాలను ప్రయోగించేలా చర్యలు చేపడుతున్నారు. గంజాయి రవాణా మార్గాలు, విక్రయ కేంద్రాలు, సరఫరా ముఠాలపై ప్రత్యేక నిఘా కొనసాగుతోంది. యువతను మత్తు పదార్థాలకు దూరంగా ఉంచేందుకు గంజాయి విక్రయాలను అడ్డుకోవడంపై ప్రత్యేక దృష్టి సారించారు. ‘గంజాయికి చోటు లేదు’ అన్న రీతిలో సునీల్‌దత్‌ తీసుకుంటున్న నిర్ణయాలు మత్తు ముఠాలకు గట్టి హెచ్చరికగా మారుతున్నాయి.

ఐపీఎస్ సునీల్‌దత్‌ స్పెషల్ ఫోకస్

ఖమ్మం కమిషనరేట్‌లో గంజాయి నిర్మూలనకు సునీల్‌దత్‌ ప్రత్యేక కార్యాచరణ అమలు చేస్తున్నారు. కేసులు నమోదైన ప్రాంతాలకే పరిమితం కాకుండా గంజాయి రవాణా జరిగే మార్గాలు, అనుమానిత ప్రాంతాలపై కూడా నిఘా పెట్టిస్తున్నారు. గంజాయి రవాణాదారులను గుర్తించడంతో పాటు వారి వెనుక ఉన్న ప్రధాన వ్యక్తులపై దృష్టి సారిస్తున్నారు. నిందితులను అరెస్టు చేయడం, గంజాయిని స్వాధీనం చేసుకోవడం, కేసులను పటిష్ఠంగా దర్యాప్తు చేయడం వంటి అంశాలపై ప్రత్యేకంగా దృష్టి పెట్టారు. పట్టుబడిన గంజాయిని కోర్టు ఆదేశాల మేరకు నిబంధనల ప్రకారం ధ్వంసం చేయడం ద్వారా అక్రమ వ్యాపారానికి ఎలాంటి అవకాశం లేదని స్పష్టం చేస్తున్నారు. జూన్‌ వరకు నమోదైన 44 కేసులు, 98 అరెస్టులు, 248.589 కిలోల గంజాయి స్వాధీనం ఆయన ప్రత్యేక నిఘాకు నిదర్శనంగా నిలుస్తున్నాయి. ఇక రూ.3.43 కోట్ల విలువైన 687.409 కిలోల గంజాయిని దహనం చేయడం గంజాయిపై సునీల్‌దత్‌ ఉక్కుపాదానికి మరో స్పష్టమైన సంకేతంగా మారింది.