Japan Open | అకానే యమగుచిపై వరుస గేమ్ల్లో ఘన విజయం..
Japan Open | ఆంధ్రప్రభ వెబ్డెస్క్ : భారత స్టార్ షట్లర్ పీవీ సింధూ జపాన్ ఓపెన్ సూపర్-750 బ్యాడ్మింటన్ టోర్నమెంట్లో మహిళల సింగిల్స్ టైటిల్ను కైవసం చేసుకుని చరిత్ర సృష్టించింది. ఫైనల్లో ఆతిథ్య దేశానికి చెందిన ప్రపంచ నంబర్-3 అకానే యమగుచిని 21-17, 21-17 తేడాతో వరుస గేమ్ల్లో ఓడించి విజేతగా నిలిచింది.
మ్యాచ్ ప్రారంభం నుంచే దూకుడుగా ఆడిన సింధూ శక్తివంతమైన స్మాష్లు, కచ్చితమైన డ్రాప్ షాట్లతో యమగుచిపై ఆధిపత్యం చెలాయించింది. తొలి గేమ్లో కీలక దశలో వరుస పాయింట్లు సాధించి 21-17తో గెలిచిన సింధూ, రెండో గేమ్లోనూ అదే జోరు కొనసాగిస్తూ మరోసారి 21-17తో విజయాన్ని ఖాయం చేసింది.
ఈ విజయంతో జపాన్ ఓపెన్ టైటిల్ను గెలిచిన తొలి భారత షట్లర్గా సింధూ అరుదైన ఘనతను సొంతం చేసుకుంది. అలాగే 2024లో సయ్యద్ మోదీ ఇంటర్నేషనల్ తర్వాత ఆమెకు ఇదే తొలి అంతర్జాతీయ టైటిల్గా నిలిచింది.
జపాన్ ఓపెన్ టైటిల్ విజయం అనంతరం భారత స్టార్ షట్లర్ పీవీ సింధూ తన విజయ ప్రయాణంలో అండగా నిలిచిన ఒలింపిక్ గోల్డ్ క్వెస్ట్ (OGQ) సంస్థ వ్యవస్థాపకుడు విరేన్ రస్క్విన్హాకు ప్రత్యేకంగా కృతజ్ఞతలు తెలిపింది.
సోషల్ మీడియా వేదికగా స్పందించిన సింధూ.. “విరేన్, భారత క్రీడల కోసం మీరు, ఓజీక్యూ చేసిన సేవలు అసాధారణమైనవి. దాదాపు 16 ఏళ్లుగా నాకు అండగా నిలిచినందుకు ధన్యవాదాలు. మనిద్దరం కలిసి ఎదిగినట్లుగా అనిపిస్తోంది. మరెన్నో విజయాలు, మరెన్నో మధుర జ్ఞాపకాలు, మరిన్ని టైటిళ్లు కలిసి సాధిద్దాం” అని పేర్కొంది.
సింధూ చేసిన ఈ భావోద్వేగ పోస్టు ప్రస్తుతం సోషల్ మీడియాలో వైరల్గా మారింది.
