మోడీ కనిపించేందుకే సాఫ్ట్.. కానీ… : ట్రంప్

• భారత్‌కు వైట్‌హౌస్‌లో మంచి మిత్రుడు ఉన్నాడు
• పశ్చిమాసియాలో భారత్ పాత్ర పెరుగుతోంది

ఆంధ్రప్రభ, వెబ్‌డెస్క్ : ఫ్రాన్స్‌లో జరుగుతున్న జీ7 సదస్సు సందర్భంగా భారత ప్రధాని నరేంద్ర మోడీపై అమెరికా అధ్యక్షుడు డొనాల్డ్ ట్రంప్ ప్రశంసల వర్షం కురిపించారు. మోడీ వ్యక్తిత్వం ప్రశాంతంగా, స్నేహపూర్వకంగా కనిపించినప్పటికీ.. దేశ ప్రయోజనాల విషయంలో మాత్రం ఆయన అత్యంత కఠినంగా వ్యవహరించే నాయకుడని ట్రంప్ వ్యాఖ్యానించారు. భారత్-అమెరికా సంబంధాలపై స్పందించిన అమెరికా అధ్యక్షుడు డొనాల్డ్ ట్రంప్, ఇరు దేశాల మధ్య స్నేహపూర్వక బంధం మరింత బలపడుతుందని అన్నారు. నేను అధ్యక్షుడిగా ఉన్నంతకాలం భారత్‌కు వైట్‌హౌస్‌లో ఒక మంచి మిత్రుడు ఉంటాడు అంటూ భారత పట్ల తన మద్దతును మరోసారి స్పష్టం చేశారు.

జీ7 సదస్సు పక్కనే జరిగిన భారత్-అమెరికా ద్వైపాక్షిక సమావేశంలో ట్రంప్ మాట్లాడుతూ.. “మోడీ చాలా మంచి వ్యక్తిలా కనిపిస్తారు. కానీ చర్చల విషయానికి వస్తే ఆయన చాలా గట్టి చర్చాకర్త. భారత్ ప్రయోజనాల విషయంలో ఎలాంటి రాజీ పడరు. ఆయన గొప్ప నాయకుడు” అని కొనియాడారు.

భారత్-అమెరికా వాణిజ్య సంబంధాలపై కూడా ట్రంప్ సానుకూలంగా స్పందించారు. ఇరు దేశాల మధ్య వాణిజ్య ఒప్పందాలపై చర్చలు కొనసాగుతున్నాయని, ఆర్థిక భాగస్వామ్యం మరింత బలపడుతోందని చెప్పారు. అమెరికా ఆర్థిక వ్యవస్థకు భారత పెట్టుబడులు కీలకంగా మారుతున్నాయని కూడా పేర్కొన్నారు.

పశ్చిమాసియాలో భారత్ పాత్ర పెరుగుతోంది…

ప్రపంచ వ్యవహారాల్లో భారత్ ప్రభావం మరింత విస్తరిస్తోందని అమెరికా అధ్యక్షుడు డొనాల్డ్ ట్రంప్ అభిప్రాయపడ్డారు. ముఖ్యంగా ప్రధాని నరేంద్ర మోడీ నాయకత్వంలో పశ్చిమాసియా (Middle East) ప్రాంతంలో భారత్ అత్యంత కీలక పాత్ర పోషించబోతోందని ఆయన స్పష్టం చేశారు. ద్వైపాక్షిక సమావేశంలో ట్రంప్ మాట్లాడుతూ.. “భారత్ ఇప్పటికే అనేక అంతర్జాతీయ సంక్షోభాలు, వ్యూహాత్మక అంశాల్లో ముఖ్యమైన పాత్ర పోషిస్తోంది. మోడీ సమర్థవంతమైన నాయకత్వంలో ప్రపంచ వేదికపై భారత్ ప్రాధాన్యం రాబోయే రోజుల్లో మరింత పెరగడం ఖాయం” అని వ్యాఖ్యానించారు. పశ్చిమాసియా దేశాలతో భారత్‌కు ఉన్న చారిత్రక, ఆర్థిక సంబంధాలు ఆ ప్రాంతంలో శాంతి, స్థిరత్వాలకు మరింత దోహదపడతాయని ఈ సందర్భంగా దౌత్య వర్గాలు భావిస్తున్నాయి.