Vishwambhara Movie | విశ్వంభర విడుదలపై మెగా ఫ్యాన్స్లో నిరాశ!
Vishwambhara Movie | విశ్వంభర విడుదలపై మెగా ఫ్యాన్స్లో నిరాశ!
Vishwambhara Movie | ఆంధ్రప్రభ, వెబ్ డెస్క్: మెగాస్టార్ చిరంజీవి నటిస్తున్న సోషియో ఫాంటసీ విజువల్ వండర్ ‘విశ్వంభర’ అప్డేట్స్ కోసం నెటిజన్లు, అభిమానులు సామాజిక మాధ్యమాల వేదికగా పదే పదే ప్రశ్నిస్తున్నారు. చాలా రోజులుగా ఈ సినిమాకు సంబంధించిన ఎలాంటి అధికారిక సమాచారం లేకపోవడంతో, “అసలు విశ్వంభర ఏమైనట్లు?” అంటూ సామాజిక మాధ్యమాల్లో కామెంట్లు వెల్లువెత్తుతున్నాయి. క్వాలిటీ విషయంలో రాజీ పడకుండా దాదాపు భారీ ఎత్తున వీఎఫ్ఎక్స్ షాట్స్తో ఈ చిత్రాన్ని తెరకెక్కిస్తుండటమే ఈ ఆలస్యానికి ప్రధాన కారణమని తెలుస్తోంది. ప్రశంసలు దక్కేలా అత్యున్నత విజువల్స్ అందించేందుకు గ్రాఫిక్స్ పనులపై చిత్ర యూనిట్ ప్రత్యేక శ్రద్ధ పెట్టింది.
మరోవైపు, చిరంజీవి హీరోగా మాస్ డైరెక్టర్ బాబీ కొల్లి దర్శకత్వంలో రూపొందుతున్న ‘మెగా 158’ చిత్రం కూడా శరవేగంగా షూటింగ్ జరుపుకుంటోంది. పొల్లాచి షెడ్యూల్ పూర్తి చేసుకుని, ప్రస్తుతం హైదరాబాద్లో తదుపరి షెడ్యూల్ జరుపుకుంటున్న ఈ భారీ యాక్షన్ ఎంటర్టైనర్ వచ్చే ఏడాది ప్రారంభంలో విడుదలకు సిద్ధమవుతున్నట్లు సమాచారం. దీనివల్ల ఈ రెండు పెద్ద చిత్రాల మధ్య తగినంత గ్యాప్ ఉండేలా మేకర్స్ ప్లాన్ చేయాల్సిన పరిస్థితి ఏర్పడింది. ఈ నేపథ్యంలో ఈ ఏడాది దసరా సీజన్ లేదా డిసెంబర్ ఆఖరి వారం మాత్రమే ‘విశ్వంభర’ విడుదలకు ఉత్తమ ఎంపికగా కనిపిస్తోంది. అభిమానులు కూడా ఇకపై మరిన్ని వాయిదాలు లేకుండా సినిమాను త్వరగా ప్రేక్షకుల ముందుకు తీసుకురావాలని కోరుతున్నారు.
భారీ కాంబినేషన్.. భారీ బడ్జెట్!
యూవీ క్రియేషన్స్ సంస్థ అత్యంత ప్రతిష్టాత్మకంగా, భారీ బడ్జెట్తో నిర్మిస్తున్న ‘విశ్వంభర’ చిత్రానికి ‘బింబిసార’ ఫేం వశిష్ట మల్లిడి దర్శకత్వం వహిస్తున్నారు. ఈ చిత్రంలో చిరంజీవి సరసన స్టార్ హీరోయిన్ త్రిష కృష్ణన్ కథానాయికగా నటిస్తుండగా.. ఆషికా రంగనాథ్, కునాల్ కపూర్ కీలక పాత్రలు పోషిస్తున్నారు. ఆస్కార్ విజేత ఎం.ఎం. కీరవాణి ఈ చిత్రానికి సంగీతం అందిస్తున్నారు. మరోపక్క బాబీ దర్శకత్వంలో తెరకెక్కుతున్న మెగా158 చిత్రాన్ని కేవీఎన్ ప్రొడక్షన్స్ నిర్మిస్తుండగా, థమన్ సంగీతం అందిస్తున్నారు. బ్యాక్-టు-బ్యాక్ క్రేజీ ప్రాజెక్టులతో మెగాస్టార్ బిజీగా ఉన్నప్పటికీ, ‘విశ్వంభర’ విడుదలపై మేకర్స్ వీలైనంత త్వరగా ఒక స్పష్టమైన అధికారిక ప్రకటన ఇస్తే బాగుంటుందని అభిమానులు ఆశిస్తున్నారు.
