Kurnool | వలసలు ఆపాలి..
- ఉపాధి హామీ పనులు కల్పించాలి
- జిల్లాలో పెండింగ్ వేతనాలు చెల్లించాలని డ్వామా పీడీకి వినతి
Kurnool | కర్నూలు బ్యూరో, ఆంధ్రప్రభ : జిల్లాలో తీవ్ర వర్షాభావ పరిస్థితుల వల్ల వ్యవసాయ పనులు లేక గ్రామీణ ప్రాంతాల ప్రజలు (people) సుదూర ప్రాంతాలకు వలసలు పోతున్నారు. వలసలు అరికట్టి ఉపాధి హామీ పనులు కల్పించాలని ఆంధ్రప్రదేశ్ వ్యవసాయ కార్మిక సంఘం జిల్లా ప్రధాన కార్యదర్శి కేవీ. నారాయణ అన్నారు. క‌లెక్ట‌రేట్‌లోని జిల్లా నీటి యాజమాన్య సంస్థ ప్రాజెక్టు డైరెక్టర్ వెంకట రమణయ్యకు ఆంధ్రప్రదేశ్ వ్యవసాయ కార్మిక సంఘం జిల్లా ప్రధాన కార్యదర్శి కేవీ. నారాయణ, జిల్లా సహాయ కార్యదర్శి బి నాగన్న, నాయకులు కే.మధు కలిసి వినతిపత్రం అందజేశారు.
ఈ సందర్భంగా వారు మాట్లాడుతూ.. జిల్లాలో వ్యవసాయ పనులు లేక గ్రామీణ పేదలు (Rural poor) సుదూర ప్రాంతాలకు వలసలు పోతున్నారని తెలిపారు. వలస వెళ్లిన సందర్భంగా ప్రమాదాల బారిన పడి ప్రమాదవశాత్తు ప్రాణాలు కోల్పోతున్నారని ఆవేద‌న వ్య‌క్తం చేశారు. అదేవిధంగా వారి కుటుంబాల పిల్లలు విద్యకు దూరమవుతున్నారని తెలిపారు. వలసల నివారణ కోసం జాతీయ గ్రామీణ ఉపాధి హామీ చట్టం ఉన్న ఆ పథకం సక్రమంగా అమలు కావడం లేదన్నారు. ఉపాధి హామీ చట్టంలో రాజకీయ జోక్యం పెరిగిందని క్షేత్రస్థాయి సిబ్బందిపై వేధింపులు జరుగుతున్నాయని, తద్వారా పనులు సరిగా కల్పించలేకపోతున్నారని వారు అన్నారు. అలాగే కేంద్ర ప్రభుత్వం ఉపాధి హామీ పథకంలో రెండుపూటల పని విధానాన్ని తీసుకువచ్చి పేదలను పనికి దూరం చేస్తుంద‌న్నారు. పనిచేసిన కూలీలకు వారంలోగా వేతనాలు ఇవ్వాలని, ఐదు నెలలుగా పెండింగ్ వేతనాలు ఇవ్వకపోవడం దారుణ‌మ‌న్నారు. పనిచేసిన కూలీలకు వేతనాలు రాకపోతే ఏం తిని బతకాలని వారు ప్ర‌శ్నించారు.
వేసవిలో గ్రామీణ పేదల వలసలు పోకుండా ఉపాధి హామీ పథకం ద్వారా పనులు క‌ల్పిస్తుంటే దానిని రాజకీయం చేస్తున్నారని ఆరోపించారు. ఇప్పటికైనా ఈ విష‌యాన్ని రాష్ట్ర ప్రభుత్వం దృష్టికి తీసుకెళ్లి జిల్లాలో వలసల నివారణకు చ‌ర్య‌లు (Preventive measures) తీసుకోవాల‌న్నారు. అడిగిన వారందరికీ పనులు కల్పించి, పనిచేసిన వారంలోపు వేతనాలు వచ్చేలా చూడాలన్నారు. అలాగే రెండు పూటల పని విధానం రద్దు చేయాలని వారు కోరారు. జిల్లా డ్వామా పీడీ మాట్లాడుతూ వ్యవసాయ కార్మిక సంఘం ఇచ్చిన డిమాండ్లను కలెక్టర్ ద్వారా రాష్ట్ర ప్రభుత్వం దృష్టికి తీసుకెళ్తామ‌ని తెలిపారు.
