CPI | పోటీకి సిద్ధం..
చెన్నారావుపేట, ఆంధ్రప్రభ : గ్రామ పంచాయతీ ఎన్నికల్లో మండలంలో రెండు మూడు గ్రామాల్లో పోటీకి సీపీఐ (CPI) పార్టీ సిద్ధంగా ఉందని అందుకు పార్టీ శ్రేణులు సమాయత్తం కావాలని సీపీఐ పార్టీ జిల్లా కార్యదర్శి షేక్ భాషుమియా అన్నారు. ఆదివారం మండల కేంద్రంలో జరిగిన విలేకరుల సమావేశంలో ఆయన మాట్లాడుతూ… డబ్బులే ప్రామాణికంగా కాంగ్రేస్, భారాస, బీజేపీ పార్టీలు ఎన్నికల్లో పోటీ చేస్తున్నాయని, కానీ ప్రజలు విజ్ఞతతో ఆలోచించి ప్రజా సమస్యలు పరిష్కరించే నాయకుడినే సర్పంచ్ గా ఎన్నుకోవాలని అన్నారు.
గత భారాస ప్రభుత్వ హయాంలో నిధులు లేక, చేసిన పనులకు బిల్లులు రాక సర్పంచులు అనేక ఇబ్బందులు పడ్డారని అన్నారు. కాంగ్రేస్ (Congress) తో అసెంబ్లీ ఎన్నికల్లో పొత్తు పెట్టుకున్నామని, కావున సర్పంచ్ ఎన్నికల్లో చెన్నారావుపేట, గొల్లపల్లి, అక్కలచెడ గ్రామాల్లో సీపీఐకి కాంగ్రెస్ మద్దతు ఇస్తే వారికి మిగతా గ్రామాల్లో పార్టీ సంపూర్ణ మద్దతు ఇస్తుందని అన్నారు. ఈ కార్యక్రమంలో సీపీఐ రాష్ట్ర సమితి సభ్యులు పంజాల రమేష్, జిల్లా సమితి సభ్యులు అక్బర్ పాషా, మండల కార్యదర్శి పత్తి అనంత్ రెడ్డి,మండల కమిటీ సభ్యులు గుగులోత్ రామచందర్ పాల్గొన్నారు.
