సైబర్ నేరస్థులు ఆన్‌లైన్ ట్రేడింగ్, పెట్టుబడుల పేరుతో అమాయక ప్రజలను దోచుకుంటున్నారు. ప్రజలను తమ ఉచ్చులోకి లాగడానికి నకిలీ ప్లాట్‌ఫారమ్‌లు, కల్పిత లాభాల డాష్‌బోర్డ్‌లను ఉపయోగిస్తున్నారు. తాజాగా హైదరాబాద్ రెండు వేర్వేరు కేసులలో సైబర్ నేర‌గాళ్ల వ‌ల‌లో చిక్కుకున్న బాధితులు మొత్తంగా రూ.50 లక్షల రూపాయలకు పైగా పోగొట్టుకున్నారు. ఈ మేర‌కు హైదరాబాద్ పోలీసులు ఆదివారం నాడు వెల్లడించారు.
మొదటి కేసులో, నగరంలోని హిమాయత్‌నగర్‌కు చెందిన 57 ఏళ్ల వ్యక్తి ఆన్‌లైన్‌లో గోల్డ్ స్టాక్స్ ట్రేడింగ్ చేయాలనే ఆశతో మోసపోయారు. NFM క్యాపిటల్ మార్కెట్స్ అనే ఆన్‌లైన్ ట్రేడింగ్ ప్లాట్‌ఫారమ్ పేరుతో ఈ మోసం జరిగింది. అమృత రెడ్డి అనే ఏజెంట్ ఆ వ్యక్తిని ఫేస్‌బుక్, వాట్సాప్ ద్వారా సంప్రదించి, యు.ఎస్. గోల్డ్ స్టాక్స్‌లో పెట్టుబడి పెడితే భారీ లాభాలు వస్తాయని నమ్మబలికారు.
బాధితుడు మోసగాళ్లు చూపించిన కల్పిత లాభాలు నిజమని నమ్మి, అందులో రూ.6.32 లక్షల రూపాయలు జమ చేశారు. ఆ తరువాత, డబ్బు విత్‌డ్రా చేసుకునే సమయం వచ్చినప్పుడు, మోసగాళ్లు టాక్స్, విత్‌డ్రాయల్ చార్జ్‌లు చెల్లించాలంటూ అదనంగా డబ్బు డిమాండ్ చేశారు. అంతేకాకుండా, డబ్బు చెల్లించకపోతే నేర చర్యలు తీసుకుంటామని బెదిరించారు. అయితే, బాధితుడు వెంటనే 1930 సైబర్ హెల్ప్‌లైన్ కు ఫిర్యాదు చేయడంతో, నష్టపోయిన కొంత మొత్తాన్ని తిరిగి పొందగలిగినట్లు పోలీసులు తెలిపారు.
రెండవ కేసులో, 63 ఏళ్ల మరో వ్యక్తి భారీ మొత్తంలో మోసపోయారు. బాధితుడిని “AXIS Security” అనే పేరుతో WhatsApp మెసేజ్ ద్వారా సంప్రదించారు. ఈ పేరు యాక్సిస్ బ్యాంక్‌తో సంబంధం ఉన్నట్లుగా అనిపించడంతో, బాధితుడు దానిని నిజమైన పెట్టుబడి అవకాశం అని నమ్మాడు. ఫలితంగా, అతను జూలై నుండి ఆగస్టు 2025 మధ్య కాలంలో ఏకంగా రూ.43 లక్షల రూపాయల కంటే ఎక్కువ మొత్తాన్ని ఆన్‌లైన్ పెట్టుబడులలో పెట్టారు.
ఈ కేసులో కూడా మోసగాళ్లు నకిలీ డాష్‌బోర్డ్‌లను ఉపయోగించి భారీ లాభాలు వస్తున్నట్లు నమ్మించారు. అంతేకాక, QIP కోటాలో షేర్లు కేటాయించినట్లు చెప్పి, బాధితుడి బ్యాలెన్స్‌కు మించిన షేర్లను “నాన్-ఇంటరెస్ట్ లోన్”గా చూపించి, ఆ రుణాన్ని వెంటనే తిరిగి చెల్లించాలని బెదిరించారు. చివరికి, తాను పెట్టుబడి పెట్టిన “AXIS సెక్యూరిటీ” నకిలీదని గ్రహించిన బాధితుడు.. పోలీసులకు ఫిర్యాదు చేశాడు.
ఈ పెరుగుతున్న సైబర్ నేరాలపై హైదరాబాద్ సైబర్ క్రైమ్ పోలీసులు ప్రజలను హెచ్చరిస్తున్నారు. మోసగాళ్లు వాట్సాప్, టెలిగ్రామ్, ఫేస్‌బుక్, ఇన్‌స్టాగ్రామ్, X (గతంలో ట్విట్టర్) వంటి సోషల్ మీడియా ప్లాట్‌ఫారమ్‌ల ద్వారా నకిలీ ట్రేడింగ్, పెట్టుబడి వెబ్‌సైట్లు, డాష్‌బోర్డ్‌లతో ప్రజలను మోసం చేస్తున్నారని పోలీస్ కమిషనర్ V.C. సజ్జనార్ పేర్కొన్నారు. ఆన్‌లైన్‌లో కనిపించే పెట్టుబడి అవకాశాల పట్ల ప్రజలు చాలా అప్రమత్తంగా ఉండాలని పోలీసులు సూచించారు.
