Hyderabad | భద్రతా వైఫల్యంపై కేసు..
Hyderabad | ఆంధ్రప్రభ, వెబ్ డెస్క్ : హైదరాబాద్లోని కూకట్పల్లి హౌసింగ్ బోర్డు (కేపీహెచ్బీ) పోలీస్ స్టేషన్ పరిధిలో ఉన్న లులు మాల్లో గన్ కలకలం చోటుచేసుకుంది. మాల్ పార్కింగ్ ప్రాంతంలో రెండు కుటుంబాల మధ్య జరిగిన ఘర్షణతో పరిస్థితి ఉద్రిక్తంగా మారింది. సమాచారం అందుకున్న కేపీహెచ్బీ పోలీసులు వెంటనే అక్కడికి చేరుకుని ఇరువర్గాలను శాంతింపజేశారు.
ఈ సందర్భంగా పాతబస్తీకి చెందిన సిద్దిఖీ అనే వ్యక్తి వద్ద తుపాకీ ఉన్నట్లు పోలీసులు గుర్తించారు. అప్రమత్తమైన కేపీహెచ్బీ సీఐ రాజశేఖర్ రెడ్డి వెంటనే ఆయుధాన్ని స్వాధీనం చేసుకుని సదరు వ్యక్తిని అదుపులోకి తీసుకుని విచారించారు. విచారణలో సిద్దిఖీ వద్ద ఉన్న తుపాకీకి చట్టబద్ధమైన లైసెన్స్ ఉన్నట్లు తేలింది. అయితే లైసెన్స్ ఉన్న ఆయుధంతో అతడు మాల్లోకి ఎలా ప్రవేశించగలిగాడనే అంశంపై పోలీసులు దృష్టి సారించారు.
ప్రాథమిక విచారణలో మాల్ ప్రవేశ ద్వారం వద్ద భద్రతా సిబ్బంది తగిన తనిఖీలు నిర్వహించకపోవడం వల్లే ఆయుధంతో లోపలికి ప్రవేశించినట్లు పోలీసులు గుర్తించారు. సాధారణంగా షాపింగ్ మాల్స్లో మెటల్ డిటెక్టర్లు, బ్యాగేజ్ స్కానింగ్, భద్రతా తనిఖీలు తప్పనిసరిగా నిర్వహించాల్సి ఉన్నప్పటికీ, ఈ ఘటనలో భద్రతా ప్రమాణాల అమలులో లోపాలు ఉన్నట్లు తేలిందని అధికారులు తెలిపారు.
దీంతో భద్రతా నిబంధనలను ఉల్లంఘించినందుకు లులు మాల్ యాజమాన్యంపై పోలీసులు కేసు నమోదు చేశారు. భవిష్యత్తులో ఇలాంటి ఘటనలు పునరావృతం కాకుండా భద్రతా వ్యవస్థను మరింత పటిష్ఠం చేయాలని ఆదేశించారు. ఈ ఘటనతో నగరంలోని షాపింగ్ మాల్స్లో భద్రతా ఏర్పాట్లపై మరోసారి చర్చ మొదలైంది. ప్రజల భద్రతను దృష్టిలో ఉంచుకుని అన్ని మాల్స్లో తనిఖీలు కచ్చితంగా నిర్వహించాలని పోలీసులు సూచిస్తున్నారు.
