చిత్తూరు రైల్వే స్టేషన్లో విషాదం.. రైలు కింద పడి గుర్తుతెలియని మహిళ మృతి
విల్లుపురం–తిరుపతి ప్యాసింజర్ రైలు కింద పడి దుర్మరణం
మృతురాలి వివరాల కోసం గాలిస్తున్న రైల్వే పోలీసులు
ప్రమాదమా..? ఇతర కారణాలా..? దర్యాప్తు కొనసాగింపు
చిత్తూరు, జూలై 5 (ఆంధ్రప్రభ): చిత్తూరు రైల్వే స్టేషన్లో ఆదివారం విషాదకర ఘటన చోటుచేసుకుంది. విల్లుపురం–తిరుపతి ప్యాసింజర్ రైలు కింద పడి గుర్తుతెలియని ఓ మహిళ మృతి చెందింది. ఈ ఘటనతో రైల్వే స్టేషన్లో ఒక్కసారిగా విషాద వాతావరణం నెలకొంది. ప్రత్యక్ష సాక్షుల కథనం ప్రకారం, రైలు స్టేషన్కు చేరుకుంటున్న సమయంలో పట్టాల సమీపంలో ఉన్న మహిళ ఒక్కసారిగా రైలు కిందకు వెళ్లింది. తీవ్ర గాయాలపాలైన ఆమె అక్కడికక్కడే మృతి చెందినట్లు సమాచారం. ఈ ఘటనను గమనించిన ప్రయాణికులు వెంటనే రైల్వే అధికారులకు, రైల్వే పోలీసులకు సమాచారం అందించారు.
సమాచారం అందుకున్న రైల్వే పోలీసులు సంఘటనా స్థలానికి చేరుకుని మృతదేహాన్ని స్వాధీనం చేసుకున్నారు. ఘటనాస్థలాన్ని పరిశీలించి ప్రత్యక్ష సాక్షుల నుంచి వివరాలు సేకరించారు. అనంతరం మృతదేహాన్ని పోస్టుమార్టం నిమిత్తం చిత్తూరు ప్రభుత్వాసుపత్రికి తరలించారు. మృతురాలి పేరు, వయస్సు, చిరునామా వంటి వివరాలు ఇంకా తెలియరాలేదని పోలీసులు తెలిపారు. ఆమె వద్ద ఎలాంటి గుర్తింపు పత్రాలు లభించకపోవడంతో మృతురాలి ఆచూకీ కోసం సమీప పోలీస్ స్టేషన్లకు సమాచారం పంపించారు. ఇటీవల నమోదైన గల్లంతు కేసుల వివరాలను కూడా పరిశీలిస్తున్నట్లు వెల్లడించారు.
ఈ ఘటన ప్రమాదవశాత్తూ జరిగిందా లేదా ఇతర కారణాల వల్ల జరిగిందా అనే అన్ని కోణాల్లో రైల్వే పోలీసులు దర్యాప్తు చేపట్టారు. పోస్టుమార్టం నివేదికతో పాటు దర్యాప్తులో లభించే ఆధారాల ఆధారంగా పూర్తి వివరాలు వెల్లడయ్యే అవకాశం ఉందని అధికారులు తెలిపారు.
