ఐసీసీ ర్యాంకింగ్స్‌లో భారత్ హవా.. టీ20లో ఇషాన్ నంబర్-1

• మూడు ఫార్మాట్లలోనూ భారత్ జోరు..

ఆంధ్రప్రభ, వెబ్‌డెస్క్ : ఆంధ్రప్రభ, వెబ్‌డెస్క్ : అంతర్జాతీయ క్రికెట్ మండలి (ఐసీసీ) విడుదల చేసిన తాజా పురుషుల ర్యాంకింగ్స్‌లో భారత ఆటగాళ్లు మరోసారి సత్తా చాటారు. టీ20 బ్యాటర్ల జాబితాలో భారత వికెట్‌కీపర్ బ్యాటర్ ఇషాన్ కిషన్ ప్రపంచ నంబర్-1గా నిలవగా, జట్ల ర్యాంకింగ్స్‌లో భారత్ వన్డే, టీ20ల్లో అగ్రస్థానాన్ని నిలబెట్టుకుంది.

టీ20లో ఇషాన్ నంబర్-1

భారత వికెట్‌కీపర్-బ్యాటర్ ఇషాన్ కిషన్ ఐసీసీ తాజా టీ20 అంతర్జాతీయ బ్యాటర్ల ర్యాంకింగ్స్‌లో ప్రపంచ నంబర్-1 బ్యాటర్‌గా నిలిచాడు. టీ20 బ్యాటర్ల ర్యాంకింగ్స్‌లో 876 రేటింగ్ పాయింట్లతో ఇషాన్ కిషన్ అగ్రస్థానానికి చేరుకున్నాడు. సహచర ఆటగాడు అభిషేక్ శర్మను వెనక్కి నెట్టి అగ్రస్థానాన్ని కైవసం చేసుకున్నాడు. ఈ ఏడాది జరిగిన టీ20 ప్రపంచకప్‌లో ఇషాన్ కిషన్ అద్భుత ప్రదర్శన కనబరిచాడు. టోర్నీలో 317 పరుగులు చేసి, దాదాపు 200 స్ట్రైక్‌రేట్‌తో ప్రత్యర్థి బౌలర్లపై విరుచుకుపడ్డాడు. అదే ప్రదర్శన అతడిని కెరీర్‌లో తొలిసారి ప్రపంచ నంబర్-1 టీ20 బ్యాటర్‌గా నిలబెట్టింది. మరోవైపు ఐర్లాండ్‌తో జరిగిన రెండు మ్యాచ్‌ల టీ20 సిరీస్‌లో భారత్ 0-2తో ఓడిపోయినప్పటికీ, ఇషాన్ వ్యక్తిగత ప్రదర్శనకు ఐసీసీ ర్యాంకింగ్స్‌లో మంచి గుర్తింపు లభించింది. ఇక ఇప్పటి వరకు నంబర్-1గా ఉన్న అభిషేక్ శర్మ (869) రెండో స్థానానికి పడిపోయాడు. పాకిస్థాన్‌కు చెందిన సాహిబ్‌జాదా ఫర్హాన్ మూడో స్థానంలో నిలిచాడు.

టెస్టుల్లో ట్రావిస్ హెడ్ టాప్..

టెస్టు బ్యాటర్ల జాబితాలో ఆస్ట్రేలియా స్టార్ ట్రావిస్ హెడ్ (853) తొలిసారి ప్రపంచ నంబర్-1 బ్యాటర్‌గా అవతరించాడు. ఇంగ్లండ్ బ్యాటర్లు హ్యారీ బ్రూక్, జో రూట్ వరుసగా రెండో, మూడో స్థానాల్లో ఉన్నారు.

జట్ల ర్యాంకింగ్స్‌లో భారత్ జోరు

టీ20 జట్ల ర్యాంకింగ్స్‌లో 272 రేటింగ్ పాయింట్లతో భారత్ అగ్రస్థానంలో కొనసాగుతోంది. ఇంగ్లండ్ రెండో, ఆస్ట్రేలియా మూడో స్థానాల్లో ఉన్నాయి. వన్డేల్లో కూడా 121 రేటింగ్ పాయింట్లతో భారత్ నంబర్-1గా కొనసాగుతోంది. న్యూజిలాండ్ రెండో, ఆస్ట్రేలియా మూడో స్థానాల్లో ఉన్నాయి. అయితే టెస్టు జట్ల ర్యాంకింగ్స్‌లో ఆస్ట్రేలియా (131) అగ్రస్థానంలో ఉండగా, దక్షిణాఫ్రికా రెండో, న్యూజిలాండ్ మూడో స్థానాల్లో నిలిచాయి. భారత్ 104 రేటింగ్ పాయింట్లతో నాలుగో స్థానంలో ఉంది.

బౌలర్లలో బుమ్రా టాప్

టెస్టు బౌలర్ల ర్యాంకింగ్స్‌లో భారత స్టార్ పేసర్ జస్ప్రీత్ బుమ్రా (870) ప్రపంచ నంబర్-1గా కొనసాగుతున్నాడు. న్యూజిలాండ్‌కు చెందిన మ్యాట్ హెన్రీ రెండో, ఆస్ట్రేలియా పేసర్ మిచెల్ స్టార్క్ మూడో స్థానాల్లో ఉన్నారు. టీ20 బౌలర్ల జాబితాలో అఫ్గానిస్థాన్ స్టార్ రషీద్ ఖాన్ అగ్రస్థానంలో ఉండగా, భారత స్పిన్నర్ వరుణ్ చక్రవర్తి మూడో స్థానంలో నిలిచాడు.

ఆల్‌రౌండర్లలో హార్దిక్ రెండో స్థానం

టీ20 ఆల్‌రౌండర్ల ర్యాంకింగ్స్‌లో జింబాబ్వే ఆటగాడు సికందర్ రజా తొలి స్థానంలో ఉండగా, భారత స్టార్ హార్దిక్ పాండ్యా రెండో స్థానాన్ని నిలబెట్టుకున్నాడు. టెస్టు ఆల్‌రౌండర్ల జాబితాలో రవీంద్ర జడేజా ప్రపంచ నంబర్-1గా కొనసాగుతున్నాడు.