ఘనంగా నూతన దేవాలయాల శంకుస్థాపన మహోత్సవం
సూర్యాపేట జిల్లా గరిడేపల్లి, ఆంధ్రప్రభ : గ్రామ ప్రజలందరి సహకారంతో, ఆధ్యాత్మిక శోభ ఉట్టిపడేలా మండలం లోని కొత్తగూడెం గ్రామంలో నూతనంగా నిర్మించనున్న పలు దేవాలయాలకు శనివారం అత్యంత వైభవంగా శంకుస్థాపన కార్యక్రమం నిర్వహించారు. గ్రామంలోని భక్తిభావం పెంపొందేలా ఏకకాలంలో పలు ప్రధాన ఆలయాల నిర్మాణానికి భూమిపూజ చేయడం విశేషం.
వైభవంగా భూమిపూజ – శాస్త్రోక్తంగా పూజలు..
కితవారిగూడెం శివాలయ ప్రధాన అర్చకులు శ్రీ రామయ్య శర్మ ఆధ్వర్యంలో వేదమంత్రోచ్ఛారణలు, నడుమ శాస్త్రోక్తంగా శంకుస్థాపన పూజా కార్యక్రమాలు జరిగాయి. గ్రామానికి నలుదిక్కులా రక్షణగా, ప్రజలకు ఆయురారోగ్యాలు ప్రసాదించాలని కోరుకుంటూ కింది ఆలయాలకు పునాది రాళ్ళు వేశారు. రామాలయం, ముత్యాలమ్మ తల్లి ఆలయం, సత్యమ్మ తల్లి ఆలయం, కోట మైసమ్మ తల్లి ఆలయం, పెద్దమ్మతల్లి ఆలయం త్వరలోనే ‘బొడ్రాయి’ ప్రతిష్టాపన. ఈ సందర్భంగా ఆలయ నిర్మాణ కమిటీ సభ్యులు మాట్లాడుతూ… నూతన దేవాలయాల నిర్మాణంతో పాటు గ్రామ రక్షణ దేవతగా కొలిచే బొడ్రాయి (గ్రామ నాభిశిల) ప్రతిష్టాపన కార్యక్రమాన్ని కూడా అత్యంత భక్తిశ్రద్ధలతో, వైభవంగా నిర్వహించనున్నట్లు తెలిపారు.
ఈ ఆలయాల నిర్మాణం వల్ల గ్రామానికి సకల శుభాలు కలుగుతాయని, గ్రామం సస్యశ్యామలంగా వర్ధిల్లుతుందని వారు ఆకాంక్షించారు. ”గ్రామ దేవతల అనుగ్రహం కోసమే ఈ ఆలయాల నిర్మాణం చేపడుతున్నాం. అందరి సహకారంతో త్వరితగతిన పనులు పూర్తి చేసి, మహా సంప్రోక్షణ నిర్వహిస్తాం అని ఆలయ కమిటీ సభ్యులుతెలిపారు. ఈ శంకుస్థాపన మహోత్సవంలో దేవాలయ కమిటీ నిర్వాహకులు, గ్రామ పెద్దలు, మహిళలు, యువకులు పెద్ద సంఖ్యలో పాల్గొన్నారు.
