Indrakeeladri | వైభవంగా పల్లకి సేవ
Indrakeeladri | వైభవంగా పల్లకి సేవ
- ప్రత్యేక పూజల అనంతరం స్వామివార్ల దివ్య ఊరేగింపు
- భక్తి శ్రద్ధలతో పాల్గొన్న దేవస్థానం చైర్మన్ బొర్రా గాంధీ
- స్వయంగా పల్లకి మోసిన పాలకమండలి చైర్మన్
- ఆధ్యాత్మిక వాతావరణంలో భక్తుల హర్షధ్వానాలు
ఆంధ్రప్రభ ఇంద్రకీలాద్రి : విజయవాడ ఇంద్రకీలాద్రిపై కొలువై ఉన్న శ్రీ దుర్గా మల్లేశ్వర స్వామివార్ల దేవస్థానంలో ప్రతిరోజు నిర్వహించే పల్లకి సేవ అత్యంత వైభవంగా జరిగింది. ఆలయ ఆవరణ భక్తజన సందోహంతో కళకళలాడగా, వేదమంత్రాలు, మంగళ వాయిద్యాల నడుమ నిర్వహించిన ఈ సేవ భక్తులను విశేషంగా ఆకట్టుకుంది.
ముందుగా స్వామివారికి, అమ్మవారికి ఆలయ అర్చకులు ప్రత్యేక పూజలు నిర్వహించారు. అనంతరం దివ్య అలంకరణలతో సిద్ధం చేసిన పల్లకిపై ఉత్సవమూర్తులను ప్రతిష్ఠించి ఆలయ ప్రాంగణంలో భక్తి పారవశ్యంతో ఊరేగించారు. పల్లకి సేవ సందర్భంగా భక్తులు జై కనకదుర్గమ్మ నినాదాలతో ఆధ్యాత్మిక వాతావరణాన్ని మరింత భక్తిమయంగా మార్చారు.
దేవస్థానం పాలకమండలి చైర్మన్ బొర్రా రాధాకృష్ణ గాంధీ ప్రత్యేకంగా ఈ కార్యక్రమంలో పాల్గొన్నారు. అమ్మవారికి, స్వామివారికి ప్రత్యేక పూజలు నిర్వహించిన అనంతరం స్వయంగా పల్లకి మోసి భక్తి చాటుకున్నారు. చైర్మన్ పాల్గొనడం భక్తుల్లో ప్రత్యేక ఆకర్షణగా నిలిచింది.
పల్లకి సేవను దర్శించుకునేందుకు పెద్ద సంఖ్యలో భక్తులు తరలివచ్చారు. దేవస్థానం అధికారులు భక్తులకు ఎలాంటి ఇబ్బందులు తలెత్తకుండా ప్రత్యేక ఏర్పాట్లు చేసి సేవలను సమన్వయంతో నిర్వహించారు. ఇంద్రకీలాద్రిపై ప్రతిరోజూ నిర్వహించే ఈ పల్లకి సేవ భక్తుల్లో ఆధ్యాత్మిక చైతన్యాన్ని పెంపొందిస్తూ విశేష ఆదరణ పొందుతోంది.
