TTD forest department | అరణ్య సంపద పరిరక్షణలో టీటీడీ సేవలు

TTD forest department | అరణ్య సంపద పరిరక్షణలో టీటీడీ సేవలు

TTD forest department | అటవీ సంరక్షణకు ఫ్లైయింగ్ స్క్వాడ్ పహారా
స్వదేశీ మొక్కల పెంపకానికి ప్రత్యేక చర్యలు
వన్యప్రాణుల రక్షణకు అప్రమత్తమైన టీటీడీ
పర్యావరణ సమతుల్యతకు అటవీ విభాగం కృషి

TTD forest department | తిరుమల, ఆంధ్రప్రభ ప్రతినిధి : తిరుమల-తిరుపతి దేవస్థానముల అటవీశాఖ 1980 నుంచి శేషాచల అరణ్య సంపదను పరిరక్షిస్తూ, పర్యావరణ సమతుల్యతను కాపాడుతూ కోట్లాది మంది భక్తుల ఆధ్యాత్మిక అవసరాలకు అనుగుణంగా సేవలు అందిస్తోంది. తూర్పు కనుమల్లో విస్తరించిన పవిత్ర శేషాచల పర్వత శ్రేణుల్లోని అరణ్య ప్రాంతాలను సంరక్షిస్తూ జీవవైవిధ్య పరిరక్షణలో కీలకపాత్రను పోషిస్తోంది.

టీటీడీ అటవీ విభాగం పరిధిలో మొత్తం 2,719 హెక్టార్ల విస్తీర్ణంలో అరణ్య ప్రాంతం ఉండగా.. తాజా ఇండియా స్టేట్ ఆఫ్ ఫారెస్ట్ నివేదిక (ఐఎస్ఎఫ్ఆర్) ప్రకారం 89.40 శాతం మేర అటవి ప్రాంతం నమోదు కావడం విశేషం. ఇది దేశంలోనే అత్యుత్తమమైన స్థానంలో టీటీడీని నిలిపింది. సుమారు 2,431 హెక్టార్లలో అటవీ ప్రాంతాలు ఉన్నాయి. ఇవి కార్బన్ నిల్వలు, వాతావరణ నియంత్రణ, జీవవైవిధ్య సంరక్షణకు దోహదపడుతున్నాయి.

వివిధ అటవీ సిబ్బంది విధులు..

టీటీడీ అటవీ విభాగాన్ని డిప్యూటీ కన్జర్వేటర్ ఆఫ్ ఫారెస్ట్ ఆధ్వర్యంలో నిర్వహిస్తున్నారు. తిరుమలలో రెండు, తిరుపతిలో రెండు చొప్పున మొత్తం నాలుగు ఫారెస్ట్ రేంజ్లు ఉన్నాయి. ప్రతి రేంజ్‌ను ఫారెస్ట్ రేంజ్ ఆఫీసర్ పర్యవేక్షిస్తున్నారు. ఫీల్డ్ స్థాయిలో డిప్యూటీ రేంజ్ ఆఫీసర్లు, ఫారెస్ట్ సెక్షన్ ఆఫీసర్లు, సిబ్బంది సమన్వయంతో అటవీ పరిరక్షణ చేపడుతున్నారు.

అటవీ సంరక్షణకు ఫ్లైయింగ్ స్క్వాడ్..

అటవీ సంపద సంరక్షణలో భాగంగా 24 గంటల ఫ్లైయింగ్ స్క్వాడ్ బృందాలు నిరంతరం పహారా నిర్వహిస్తూ చెట్ల నరికివేత, వేట చర్యలను అరికడుతున్నాయి. అటవీ అగ్నిప్రమాదాల నివారణకు ప్రత్యేక ఫైర్‌లైన్లు నిర్వహించడంతో పాటు శిక్షణ పొందిన బృందాలు వేగంగా స్పందించి వందశాతం వరకు అగ్నిమాపక చర్యలు చేపడుతున్నాయి. ప్రతి సంవత్సరం 26.5 లక్షల చదరపు మీటర్ల మేర ఫైర్ లైన్లు నిర్వహిస్తున్నారు.

576 హెక్టార్లలో స్వదేశీ మొక్కల పెంపకం..

జీవవైవిధ్య పరిరక్షణలో భాగంగా విదేశీ జాతికి చెందిన అకేషియా చెట్ల స్థానంలో స్థానిక వృక్ష సంపదను పునరుద్ధరించే కార్యక్రమాన్ని టీటీడీ చేపట్టింది. ఈ మేరకు 576 హెక్టార్లలో స్థానిక జాతులైన రావి, మర్రి, జువ్వి, మేడి, సంపంగి, మామిడి, గంధం, ఎర్రచందనం, ఉసిరి, నేరేడు వంటి మొక్కలను దశలవారీగా నాటుతున్నారు. ఇప్పటి వరకు 22 హెక్టార్లలో పనులు పూర్తయ్యాయి.

టీటీడీ పరిధిలోని నాలుగు ఫారెస్ట్ రేంజ్లలో ప్రత్యేక నర్సరీలను నిర్వహిస్తూ స్థానిక జాతుల మొక్కలు, అలంకార మొక్కలు, ఔషధ మొక్కలను పెంచుతున్నారు. అటవీ పునరుద్ధరణకు అవసరమైన మొక్కలను ఈ నర్సరీల ద్వారా సరఫరా చేస్తున్నారు.

వన్యప్రాణుల రక్షణకు చర్యలు..

శేషాచల అరణ్యాల్లో ఏనుగులు, చిరుతలు, ఎలుగుబంట్లు, పాములు వంటి అనేక వన్యప్రాణులు నివసిస్తున్నాయి. వన్యప్రాణి దర్శనాలను తగ్గించేందుకు, సాయపడిన జంతువులను రక్షించేందుకు టీటీడీ అటవీ విభాగం ప్రత్యేక చర్యలు చేపడుతోంది. వేసవి తీవ్రత దృష్టిలో ఉంచుకుని జంతువుల దాహార్తి తీర్చేందుకు సాసర్ పిట్స్ (ప్రత్యేక నీటిగుంటలు) ఏర్పాటు చేస్తున్నారు. అలాగే దర్శన క్యూలైన్ ప్రాంగణాల్లో మూడు స్నేక్ రెస్క్యూ బృందాలను అప్రమత్తంగా ఉంచారు.

భక్తుల భద్రతను దృష్టిలో ఉంచుకుని ప్రమాదకరంగా ఉన్నవి, గాలివానకు పడిపోయేలా ఉన్న చెట్ల తొలగింపు చేపట్టారు. తిరుమల, టీటీడీ ఆలయ అవసరాల కోసం శ్రీగంధం చెక్కలు, వంట చెరకు, దర్భగడ్డి, ఇతర పూజా సామగ్రిని టీటీడీ ఫారెస్ట్ విభాగం సమకూరుస్తోంది.