upto94matches | ఐపీఎల్ విస్తరణ… లాభాల వెనుక ….

upto94matches |ఆటగాళ్లపై పెరుగుతున్న ఒత్తిడి… కెరీర్‌కు ప్రమాదమా?
‘వ్యూయర్ ఫెటీగ్’… పండుగే సీరియల్ అవుతుందా?
అంతర్జాతీయ క్రికెట్‌కు ఐపీఎల్ ముప్పు?
ప్రకటనల మార్కెట్‌లో ‘బబుల్’ పేలే ప్రమాదం
మ్యాచ్‌లు పెరిగితే… అవినీతి పెరిగే అవకాశమా?

upto94matches | ఆంధ్రప్రభ వెబ్ డెస్క్ : ఐపీఎల్ మ్యాచ్‌ల సంఖ్యను 74 నుండి 94కు పెంచడం అనేది వినడానికి ఒక భారీ విజయంగా అనిపించవచ్చు. కానీ, ఈ పెంపు వెనుక దాగి ఉన్న ప్రతికూలతలు మరియు రిస్కులు క్రికెట్ ఉనికినే ప్రశ్నార్థకం చేసేలా ఉన్నాయి. ఆ విశ్లేషణాత్మక అంశాలు ఇవే:

క్రికెటర్లు యంత్రాలు కాదు. ఇప్పటికే అంతర్జాతీయ మ్యాచ్‌లు, టెస్ట్ సిరీస్‌లు, లీగ్‌లతో వారు సతమతమవుతున్నారు. మ్యాచ్‌లు పెరిగితే విశ్రాంతి తగ్గుతుంది.

ముఖ్యంగా ఫాస్ట్ బౌలర్ల వెన్ను, మోకాళ్లపై తీవ్ర ప్రభావం పడి, వారి కెరీర్ కాలాన్ని తగ్గించేస్తుంది. నిరంతర ప్రయాణాలు ఆటగాళ్లలో మానసిక ఒత్తిడికి దారితీస్తాయి.

ఏదైనా సరే పరిమితికి మించి ఉంటే దానిపై ఆసక్తి తగ్గుతుంది. ఐపీఎల్ రెండు నెలల పాటు జరిగితే అదొక పండుగ. కానీ, అది మూడు నెలలకు చేరితే.. రోజూ టీవీలో వచ్చే సీరియల్ లాగా మారిపోయి తన విశిష్టతను కోల్పోతుంది.

మొక్కుబడి మ్యాచ్‌లు పెరిగితే ప్రేక్షకులు క్రమంగా మొహం చాటేస్తారు. ఇదే ‘వ్యూయర్ ఫెటీగ్’ అనే సమస్య.

ఐపీఎల్ విండో 90 రోజులకు చేరితే, మిగతా దేశాల మధ్య జరిగే ద్వైపాక్షిక సిరీస్‌లు దాదాపు తుడిచిపెట్టుకుపోతాయి. స్టార్ ఆటగాళ్లందరూ ఐపీఎల్ కాంట్రాక్టులకే ప్రాధాన్యత ఇస్తే, దేశం తరపున ఆడే టెస్ట్ క్రికెట్ ఆత్మ దెబ్బతింటుంది.

ఇది అంతర్జాతీయ క్రికెట్ ఉనికికే ప్రమాదకరంగా మారుతుంది.

పెట్టుబడిదారులు ఇప్పుడు లాభాల్లో ఉన్నా, భవిష్యత్తులో అది ‘ఓవర్ శాచురేషన్‘కు దారి తీయవచ్చు. మ్యాచ్‌లు ఎక్కువై ప్రేక్షకులు టీవీలకు అతుక్కుపోవడం తగ్గిస్తే, వ్యూయర్‌షిప్ పతనమవుతుంది.

అప్పుడు యాడ్ రేట్లు పడిపోయి, ఫ్రాంచైజీలు మరియు బ్రాండ్‌లు భారీ ఆర్థిక సంక్షోభంలో పడే అవకాశం ఉంది.

మ్యాచ్‌ల సంఖ్య పెరిగే కొద్దీ, పర్యవేక్షణ (Monitoring) కష్టమవుతుంది. గ్రౌండ్ లెవల్‌లో జరిగే పిచ్ క్యూరేషన్ నుండి ఆటగాళ్ల వరకు అందరినీ అవినీతి పరులు ప్రలోభపెట్టే అవకాశాలు పెరుగుతాయి.

ఇది ఆట యొక్క నిజాయితీని ప్రమాదంలో నెట్టవచ్చు.

“బంగారు గుడ్లు పెట్టే బాతు కదా అని.. పొట్ట కోసి అన్ని గుడ్లు ఒకేసారి తీయాలనుకోవడం మూర్ఖత్వమే అవుతుంది. ఐపీఎల్ విషయంలో బీసీసీఐ కేవలం ‘డబ్బు‘ అనే కళ్లద్దాలతో కాకుండా, ‘క్రికెట్ భవిష్యత్తు‘ అనే కోణంలో ఆలోచించాల్సిన సమయం ఆసన్నమైంది.