ఇంద్రకీలాద్రిపై ఉగాది మహోత్సవ వైభవం
ఇంద్రకీలాద్రిపై ఉగాది మహోత్సవ వైభవం
- కనకదుర్గమ్మ సన్నిధిలో భక్తి సందడి
- వేదఘోషల మధ్య గ్రామోత్సవం
- పల్లకీ సేవలో ఆలయాధికారుల భాగస్వామ్యం
- వసంత నవరాత్రులకు ఆధ్యాత్మిక శ్రీకారం
ఇంద్రకీలాద్రి, ఆంధ్రప్రభ : విజయవాడలోని ఇంద్రకీలాద్రిపై విరాజిల్లుతున్న శ్రీ దుర్గ మల్లేశ్వర స్వామి వార్ల దేవస్థానం లో ఉగాది పర్వదినాన్ని పురస్కరించుకుని ‘శ్రీ పరాభవ’ నామ సంవత్సర ఆరంభ వేడుకలు అపూర్వమైన వైభవంతో ప్రారంభమయ్యాయి.
శక్తి స్వరూపిణి కనక దుర్గ అమ్మవారి సన్నిధి ఆధ్యాత్మిక కాంతులతో కళకళలాడుతూ, భక్తి పరిమళాలతో నిండిన పవిత్ర క్షేత్రంగా రూపుదిద్దుకుంది. ఉగాది సంధ్యను ఆహ్వానిస్తూ ఆలయ ప్రాంగణమంతా మామిడి తోరణాలు, సుగంధ పుష్పాలతో శోభాయమానంగా అలంకరించబడింది.
గర్భగుడి నుండి మహామండపం వరకు ప్రతి మూల కూడా ఆధ్యాత్మిక సౌందర్యంతో దర్శనార్థులను ఆకట్టుకుంది. తెల్లవారుజామునే సుప్రభాత సేవతో ప్రారంభమైన పూజా కార్యక్రమాలు స్నపనాభిషేకం, ప్రభాత అర్చనలతో శాస్త్రోక్తంగా నిర్వహించబడుతూ భక్తుల్లో దైవానుభూతిని కలిగించాయి. ఈ వేడుకల్లో భాగంగా నిర్వహించిన గ్రామోత్సవం భక్తి ప్రపాతం సృష్టించింది. ఆలయ చైర్మన్ బొర్రా రాధాకృష్ణ (గాంధీ), ఈవో శీనా నాయక్ తదితర అధికారులు స్వయంగా పాల్గొని అమ్మవారిని, స్వామివారిని పల్లకిపై భుజాల మీద మోస్తూ ఊరేగించడం విశేషంగా నిలిచింది.
వేద మంత్రోచ్ఛారణల మధ్య సాగిన ఈ పల్లకీ సేవ భక్తులకు కనులపండువగా నిలిచి, భక్తి భావాన్ని మరింత ఉద్ధీపింపజేసింది. సాయంత్రం ఆలయ ధర్మపథ కళావేదికపై పంచాంగ శ్రవణం నిర్వహించేందుకు ఏర్పాట్లు చేశారు. ప్రముఖ పండితులు నూతన సంవత్సర ఫలితాలను వివరిస్తూ ధార్మిక సందేశాలను అందించనున్నారు. ఈ కార్యక్రమం భక్తులకు ఆధ్యాత్మిక మార్గదర్శకత్వాన్ని అందించనుంది. ఇదే సమయంలో వసంత నవరాత్రి ఉత్సవాలకు కూడా ఘనంగా శ్రీకారం చుట్టినట్లు ఆలయ అధికారులు తెలిపారు. మార్చి 28 వరకు కొనసాగనున్న ఈ వేడుకల్లో ప్రతిదినం విశేష పూజలు, అలంకరణలు నిర్వహించబడనున్నాయి.
మార్చి 27న శ్రీరామనవమి సందర్భంగా ప్రత్యేక కార్యక్రమాలు వైభవంగా నిర్వహించనున్నట్లు వెల్లడించారు. ఇంద్రకీలాద్రిపై ఉగాది ఉత్సవాలు భక్తి, సంప్రదాయం, ఆధ్యాత్మికతల సమన్వయంగా నిలిచి, భక్తజనాలకు దివ్యానుభూతిని ప్రసాదిస్తున్నాయి.
