Yemmiganur | పర్యటనకు సీఎం చంద్రబాబు
Yemmiganur | పర్యటనకు సీఎం చంద్రబాబు
- గ్రామ సభ, రైతులతో భేటీ, కేడర్ సమావేశం
Yemmiganur | కర్నూలు బ్యూరో, ఆంధ్రప్రభ ; ఆంధ్రప్రదేశ్ ముఖ్యమంత్రి నారా చంద్రబాబు నాయుడు ఈ నెల 6వ తేదీన గుంటూరు మరియు కర్నూలు జిల్లాల్లో పర్యటించనున్నట్లు ముఖ్యమంత్రి కార్యాలయం విడుదల చేసిన అధికారిక వైర్లెస్ సందేశంలో వెల్లడించింది. ఈ పర్యటనలో ముఖ్యంగా కర్నూలు జిల్లా ఎమ్మిగనూరు మండలం కలుగొట్ల గ్రామంలో పలు కార్యక్రమాలకు ముఖ్యమంత్రి హాజరవుతారు.
ఉదయం హెలికాప్టర్ ద్వారా ప్రయాణం
ఫిబ్రవరి 6న ఉదయం 10:10 గంటలకు గుంటూరు జిల్లా తాడేపల్లి మండలం ఉండవల్లి గ్రామంలోని ముఖ్యమంత్రి నివాసం హెలిప్యాడ్ నుంచి హెలికాప్టర్ ద్వారా ముఖ్యమంత్రి బయలుదేరనున్నారు. ఉదయం 11:25 గంటలకు కర్నూలు జిల్లా ఎమ్మిగనూరు మండలం కలుగొట్ల గ్రామ హెలిప్యాడ్కు చేరుకుంటారు. అక్కడ ప్రజాప్రతినిధులు, అధికారులు, ఇతర ప్రముఖులు ముఖ్యమంత్రికి స్వాగతం పలకనున్నారు.
గ్రామ సభలో పాల్గొననున్న సీఎం
అనంతరం ఉదయం 11:35 గంటలకు హెలిప్యాడ్ నుంచి రోడ్డు మార్గంలో గ్రామ సభ ప్రాంగణానికి చేరుకుంటారు. ఉదయం 11:40 గంటల నుంచి మధ్యాహ్నం 1:30 గంటల వరకు గ్రామ సభలో పాల్గొంటారు. ఈ సందర్భంగా గ్రామ అభివృద్ధి, సంక్షేమ పథకాల అమలు, స్థానిక సమస్యలపై సమీక్ష జరిపే అవకాశం ఉంది. గ్రామ సభ అనంతరం మధ్యాహ్నం 1:30 నుంచి 2:00 గంటల వరకు రైతులకు పట్టాదారు పాస్బుక్స్ (PPBs) పంపిణీ చేసి ప్రజలను ఉద్దేశించి ముఖ్యమంత్రి ప్రసంగించనున్నారు.
రైతులతో ప్రత్యక్షంగా చర్చలు
మధ్యాహ్నం 2:05 గంటలకు కలుగొట్ల గ్రామంలోని వ్యవసాయ పొలాలకు చేరుకుని రైతులతో ప్రత్యక్షంగా మాట్లాడనున్నారు. రైతుల సమస్యలు, సాగు పరిస్థితులు, నీటి వనరులు, ప్రభుత్వ పథకాల అమలు వంటి అంశాలపై చర్చించనున్నట్లు సమాచారం. ఈ కార్యక్రమం మధ్యాహ్నం 2:35 గంటల వరకు కొనసాగుతుంది.
పార్టీ కేడర్ సమావేశం
అనంతరం మధ్యాహ్నం 2:40 గంటలకు కలుగొట్లలో ఏర్పాటు చేసిన పార్టీ కేడర్ సమావేశానికి ముఖ్యమంత్రి హాజరవుతారు. సాయంత్రం 4:10 గంటల వరకు జరిగే ఈ సమావేశంలో పార్టీ కార్యకర్తలకు దిశానిర్దేశం చేసే అవకాశం ఉంది. రాబోయే ఎన్నికలు, పార్టీ వ్యూహాలు, ప్రభుత్వ పనితీరుపై చర్చ జరిగే అవకాశం ఉందని రాజకీయ వర్గాలు భావిస్తున్నాయి.
తిరుగు ప్రయాణం
సాయంత్రం 4:15 గంటలకు కేడర్ సమావేశం నుంచి బయలుదేరి 4:20 గంటలకు హెలికాప్టర్ ద్వారా ఉండవల్లి నివాసానికి తిరుగు ప్రయాణం చేస్తారు. సాయంత్రం 5:35 గంటలకు ఉండవల్లి హెలిప్యాడ్కు చేరుకుంటారు.
కట్టుదిట్టమైన భద్రతా ఏర్పాట్లు..
ముఖ్యమంత్రి చంద్రబాబు నాయుడు 2 ప్లస్ భద్రతా వర్గానికి చెందినవారు కాగా, నేషనల్ సెక్యూరిటీ గార్డ్ (NSG) రక్షణలో ఉన్నారు. ఆయన రక్త గ్రూప్ ‘ఓ పాజిటివ్’గా అధికారికంగా పేర్కొన్నారు. పర్యటన సందర్భంగా ముఖ్యమంత్రి మరియు ఆయన బృందానికి భద్రత, రవాణా తదితర ఏర్పాట్లు నిబంధనల ప్రకారం చేయాలని సంబంధిత అధికారులకు ఆదేశాలు జారీ చేశారు.
ఈ పర్యటన ద్వారా గ్రామీణాభివృద్ధి, రైతు సంక్షేమం, పార్టీ బలోపేతం వంటి అంశాలపై ప్రభుత్వం దృష్టి సారిస్తున్నట్లు తెలుస్తోంది.
