ఫుట్బాల్ రాష్ట్రస్థాయి పోటీలకు దండు మల్కాపురం విద్యార్థినుల ఎంపిక
చౌటుప్పల్, ఆంధ్రప్రభ : ఫుట్బాల్ రాష్ట్రస్థాయి పోటీలకు చౌటుప్పల్ మండలం దండు మల్కాపురంలోని జిల్లా పరిషత్ ఉన్నత పాఠశాల విద్యార్థినులు ఎంపికయ్యారు. ఈ పాఠశాలలో 9వ తరగతి చదువుతున్న జి. భవ్య, 7వ తరగతి చదువుతున్న వై. రష్మిక తమ ప్రతిభతో రాష్ట్ర స్థాయి స్థానాన్ని దక్కించుకున్నారు. ఈనెల 3, 4, 5 తేదీల్లో నిజామాబాద్ జిల్లాలో నిర్వహించనున్న రాష్ట్ర స్థాయి ఫుట్బాల్ పోటీల్లో వీరు ఉమ్మడి జిల్లా తరఫున పాల్గొననున్నారు.
ఉమ్మడి నల్గొండ జిల్లా ఫుట్బాల్ అసోసియేషన్ ఆధ్వర్యంలో ఈనెల 2వ తేదీన నల్గొండ జిల్లా చర్లపల్లిలో సబ్ జూనియర్ (అండర్-14) బాలికల ఎంపిక పోటీలు నిర్వహించారు. ఈ పోటీల్లో దండు మల్కాపురం జెడ్పీ ఉన్నత పాఠశాల నుండి ఆరుగురు విద్యార్థినులు పాల్గొని అత్యుత్తమ క్రీడా నైపుణ్యాన్ని ప్రదర్శించారు. వారిలో భవ్య, రష్మికలు అద్భుత ఆటతీరుతో సెలెక్టర్లను ఆకట్టుకుని రాష్ట్ర స్థాయికి ఎంపికయ్యారు. రాష్ట్రస్థాయి పోటీలకు ఎంపికై పాఠశాల కీర్తిని చాటిన విద్యార్థినులను ప్రధానోపాధ్యాయురాలు ఆర్. శోభ, ఫిజికల్ డైరెక్టర్ భావన, పాఠశాల ఉపాధ్యాయ బృందం ప్రత్యేకంగా అభినందించి రాష్ట్ర స్థాయి పోటీల్లోనూ విజయం సాధించాలని ఆకాంక్షించారు.
