రోడ్డు ప్రమాదాల నివారణకు ప్రాధాన్యం

రోడ్డు ప్రమాదాల నివారణకు ప్రాధాన్యం

రూ.15 లక్షల విలువైన భద్రతా కిట్ల పంపిణీ

గంజాయి నిర్మూలనకు ప్రత్యేక పరీక్షా కిట్లు.. మద్యం సేవించి వాహనాలు నడిపితే కఠిన చర్యలు

తిరుపతి ప్రతిని, ఆంధ్రప్రభ : జిల్లాలో రోడ్డు ప్రమాదాల నివారణకు సమన్వయంతో చర్యలు చేపడుతున్నామని జిల్లా కలెక్టర్ డాక్టర్ ఎస్. వెంకటేశ్వర్ తెలిపారు. బుధవారం తిరుపతి జిల్లా పోలీస్ కార్యాలయంలో జిల్లా ఎస్పీ ఎల్. సుబ్బారాయుడుతో కలిసి జాతీయ రహదారి, పోలీసు సిబ్బందికి రోడ్డు భద్రతా కిట్లను పంపిణీ చేశారు.

మొత్తం రూ.15 లక్షల విలువైన ఈ కిట్లలో ప్రతిబింబించే జాకెట్లు, ట్రాఫిక్ హెచ్చరిక లైట్లు, ట్రాఫిక్ కోన్లు, ప్రతిబింబించే టేపులు వంటి పరికరాలు ఉన్నాయని కలెక్టర్ తెలిపారు.

జిల్లాలో పోలీసు శాఖ ఆధ్వర్యంలో రెవెన్యూ, రవాణా, జాతీయ రహదారుల శాఖల సమన్వయంతో రోడ్డు ప్రమాదాల నివారణపై గత కొన్ని నెలలుగా ప్రత్యేక చర్యలు కొనసాగుతున్నాయని చెప్పారు. ఇటీవల జిల్లా ఎస్పీతో కలిసి బస్సు యాత్ర నిర్వహించి ప్రమాదాలు అధికంగా జరిగే బ్లాక్ స్పాట్లను పరిశీలించినట్లు వెల్లడించారు.

జిల్లాలో మొత్తం 43 బ్లాక్ స్పాట్లను గుర్తించామని, అందులో 20 ప్రాంతాల్లో పనులు పూర్తయ్యాయని తెలిపారు. మిగిలిన పనులను జూన్ నెలాఖరులోపు పూర్తి చేయాలని అధికారులకు ఆదేశాలు జారీ చేసినట్లు చెప్పారు.

జాతీయ రహదారులపై నిలిపివేసిన వాహనాలను ఢీకొట్టడం వల్ల ప్రమాదాలు ఎక్కువగా జరుగుతున్నాయని కలెక్టర్ పేర్కొన్నారు. ట్రాఫిక్ నిబంధనలు ఉల్లంఘించే వారిపై చర్యలు తీసుకునేందుకు ప్రత్యేక వాహనాలను ఏర్పాటు చేసినట్లు తెలిపారు.

ప్రమాదాల్లో గాయపడిన వారికి అత్యవసర వైద్యం అందించేందుకు ప్రత్యేక వాహనాలతో పాటు నియంత్రణ కేంద్రాన్ని ఏర్పాటు చేసినట్లు చెప్పారు. రాత్రి వేళల్లో తనిఖీలు నిర్వహించడం, వాహనాల వేగ నియంత్రణలో భద్రతా పరికరాలు ఉపయోగపడతాయని వివరించారు.

గంజాయి, మాదక ద్రవ్యాల నిర్మూలనపై రాష్ట్ర ప్రభుత్వం ప్రత్యేక దృష్టి పెట్టిందని కలెక్టర్ తెలిపారు. ఇటీవల తనిఖీల్లో పట్టుబడిన సుమారు 4,500 కిలోల గంజాయిని దహనం చేసినట్లు వెల్లడించారు. గంజాయిని సరఫరా చేసినా, వినియోగించినా, నిల్వ ఉంచినా కఠిన చర్యలు తీసుకుంటామని హెచ్చరించారు.

రాష్ట్రంలో తొలిసారిగా తిరుపతి జిల్లాలోనే 10 వేలకుపైగా గంజాయి వేగవంత పరీక్షా కిట్లను వినియోగిస్తున్నామని తెలిపారు. ఈ కిట్ల ద్వారా మూత్ర పరీక్ష చేసి ఐదు నిమిషాల్లో ఫలితాలు తెలుసుకోవచ్చన్నారు. ప్రతి ఉపవిభాగం పరిధిలో ఈ కిట్లను అందుబాటులో ఉంచుతున్నట్లు పేర్కొన్నారు.

గత రెండేళ్లలో గంజాయి, రౌడీషీటర్లు, ఎర్రచందనం అక్రమ రవాణా కేసుల్లో 37 నిర్బంధ చట్టం కేసులు నమోదు చేసినట్లు కలెక్టర్ వెల్లడించారు. మహిళల భద్రత, శాంతిభద్రతల పరిరక్షణ, ఎర్రచందనం అక్రమ రవాణా అరికట్టడంపై ప్రభుత్వం ప్రత్యేక దృష్టి పెట్టిందన్నారు.

జిల్లా ఎస్పీ ఎల్. సుబ్బారాయుడు మాట్లాడుతూ రోడ్డు ప్రమాదాల నివారణ ప్రధాన లక్ష్యంగా పని చేస్తున్నామని తెలిపారు. తిరుమల దర్శనానికి ప్రతిరోజూ లక్షలాది మంది భక్తులు జిల్లాకు వస్తుండటంతో రహదారి భద్రతపై ప్రత్యేక దృష్టి పెట్టామని చెప్పారు.

ఇటీవల బస్సు యాత్ర నిర్వహించి ప్రమాదాలు ఎక్కువగా జరిగే ప్రాంతాలను గుర్తించినట్లు తెలిపారు. రాత్రి సమయంలో రహదారులపై నిలిపివేసిన వాహనాల వల్ల ప్రమాదాలు జరుగుతున్నందున వాటిని తొలగించే చర్యలు చేపడుతున్నామని పేర్కొన్నారు.

మద్యం సేవించి వాహనాలు నడపడం, అతివేగంగా ప్రయాణించడం వంటి ఉల్లంఘనలపై కఠిన చర్యలు తీసుకుంటున్నామని ఎస్పీ హెచ్చరించారు. హెల్మెట్‌, సీటు బెల్ట్‌ తప్పనిసరిగా వినియోగించాలని ప్రజలకు సూచించారు.

రాత్రి వేళల్లో నిలిపివేసిన వాహనాలు స్పష్టంగా కనిపించేందుకు ప్రతిబింబించే స్టిక్కర్లు అవసరమని తెలిపారు. ఇటీవల శ్రీకాళహస్తి సమీపంలో నిలిపివేసిన లారీని అంబులెన్స్ ఢీకొన్న ఘటనలో ఐదుగురు మృతి చెందిన విషయాన్ని ప్రస్తావించారు. ఇటువంటి ప్రమాదాలు నివారించేందుకు ప్రతిబింబించే స్టిక్కర్ల పంపిణీ చేపట్టామని చెప్పారు.

నిబంధనలకు విరుద్ధంగా ఉన్న నంబర్ ప్లేట్లతో వాహనాలు నడపడం చట్టవిరుద్ధమని, అలాంటి వాహనాలను స్వాధీనం చేసుకుంటున్నామని ఎస్పీ స్పష్టం చేశారు. ప్రజల్లో బాధ్యతాయుత మార్పు రావడం ద్వారానే ప్రమాదాలను తగ్గించవచ్చని తెలిపారు.

ఈ కార్యక్రమంలో అదనపు ఎస్పీ రవి మనోహరాచారి, రహదారులు భవనాల శాఖ ప్రత్యేక ప్రధాన ఇంజనీర్ రాజానాయక్, ఉపాధికారి స్థాయి అధికారులు, మోటార్ వెహికల్ ఇన్స్పెక్టర్ శ్రీనివాస్ తదితరులు పాల్గొన్నారు.