సీఎం పర్యటనకు పకడ్బందీ ఏర్పాట్లు

• అంజనపురం పామాయిల్ ఫ్యాక్టరీ ప్రారంభోత్సవానికి సర్వం సిద్ధం చేయాలి
• రైతులు, ప్రజలకు ఇబ్బందులు లేకుండా సౌకర్యాలు కల్పించాలి
• అధికారులకు జిల్లా కలెక్టర్ దివాకర టీఎస్ ఆదేశం

ఉమ్మడి ఖమ్మం బ్యూరో, ఆంధ్రప్రభ : ముఖ్యమంత్రి రేవంత్ రెడ్డి జిల్లా పర్యటన నేపథ్యంలో పకడ్బందీ భద్రతా ఏర్పాట్లు చేపట్టాలని జిల్లా కలెక్టర్ దివాకర టీఎస్ అధికారులను ఆదేశించారు. వైరా నియోజకవర్గం కొణిజర్ల మండలం అంజనపురం గ్రామంలో నూతనంగా నిర్మించిన గోద్రెజ్ పామాయిల్ ఫ్యాక్టరీ ప్రారంభోత్సవానికి ముఖ్యమంత్రి రానున్న నేపథ్యంలో ప్రతి ఏర్పాటును ముందుగానే పూర్తిచేయాలని స్పష్టం చేశారు.

బుధవారం పోలీసు కమిషనర్ సునీల్ దత్, అదనపు కలెక్టర్ పి. శ్రీనివాసరెడ్డితో కలిసి ఫ్యాక్టరీ వద్ద జరుగుతున్న ఏర్పాట్లను కలెక్టర్ క్షేత్రస్థాయిలో పరిశీలించారు. ఫ్యాక్టరీ ప్రాంగణం, సభా వేదిక, హెలిప్యాడ్, పార్కింగ్ ప్రాంతాలు, రాకపోకల మార్గాలు, భద్రతా చర్యలతో పాటు ప్రజలకు కల్పించాల్సిన సౌకర్యాలను పరిశీలించి అధికారులు, గోద్రెజ్ సంస్థ ప్రతినిధులకు పలు సూచనలు చేశారు.

రైతులు, ప్రజలకు ఇబ్బందులు కలగొద్దు

ఈ సందర్భంగా కలెక్టర్ మాట్లాడుతూ.. ముఖ్యమంత్రి పర్యటన ప్రతిష్ఠాత్మక కార్యక్రమమని, ఏర్పాట్ల విషయంలో ఎలాంటి లోపాలకు తావివ్వొద్దని సూచించారు. ప్రారంభోత్సవానికి పెద్ద సంఖ్యలో రైతులు, ప్రజలు తరలివచ్చే అవకాశం ఉన్నందున వారికి ఎలాంటి ఇబ్బందులు కలగకుండా అవసరమైన అన్ని సౌకర్యాలు కల్పించాలని ఆదేశించారు.

సభా ప్రాంగణంలో ప్రవేశ, నిష్క్రమణ మార్గాలను పక్కాగా ఏర్పాటు చేయాలన్నారు. వీఐపీలు, ప్రజాప్రతినిధులు, రైతులు, మహిళలు, మీడియా ప్రతినిధులు, సాధారణ ప్రజల కోసం ప్రత్యేక మార్గాలు, కూర్చునే ఏర్పాట్లు చేయాలని సూచించారు. బ్యారికేడింగ్, సూచిక బోర్డులు, తగినంత వెలుతురు, తాగునీరు, తాత్కాలిక మరుగుదొడ్లు, పారిశుధ్య నిర్వహణకు అత్యంత ప్రాధాన్యం ఇవ్వాలని తెలిపారు.

బహుస్థాయి భద్రతా చర్యలు చేపట్టాలి

ముఖ్యమంత్రి పర్యటనలో ఎలాంటి అవాంఛనీయ ఘటనలకు తావులేకుండా బహుస్థాయి భద్రతా చర్యలు చేపట్టాలని పోలీసు శాఖను కలెక్టర్ ఆదేశించారు. సభా ప్రాంగణం, హెలిప్యాడ్, వీఐపీ మార్గాలు, పార్కింగ్ ప్రాంతాలతో పాటు ప్రజల రాకపోకలపై నిరంతర పర్యవేక్షణ ఉండాలని సూచించారు.

హెలిప్యాడ్ నుంచి సభా ప్రాంగణం వరకు ముఖ్యమంత్రి ప్రయాణించే మార్గాన్ని ముందుగానే పూర్తిస్థాయిలో పరిశీలించాలన్నారు. రహదారుల మరమ్మతులు, శుభ్రత, ట్రాఫిక్ నియంత్రణ చర్యలను పూర్తి చేయాలని తెలిపారు. ట్రాఫిక్ అంతరాయం తలెత్తకుండా ప్రత్యామ్నాయ మార్గాలను సిద్ధం చేసి, ప్రజలకు ముందస్తుగా సమాచారం అందించాలని సంబంధిత అధికారులను ఆదేశించారు.

వైద్య బృందాలు.. అగ్నిమాపక వాహనాలు సిద్ధంగా ఉండాలి

వైద్య ఆరోగ్య శాఖ ఆధ్వర్యంలో అంబులెన్సులు, వైద్య బృందాలు, అత్యవసర చికిత్స కేంద్రాలను సిద్ధంగా ఉంచాలని కలెక్టర్ సూచించారు. అగ్నిమాపక శాఖ వాహనాలను అందుబాటులో ఉంచాలని, విద్యుత్ శాఖ నిరంతర విద్యుత్ సరఫరాకు చర్యలు తీసుకోవాలని ఆదేశించారు.

తాగునీటి సరఫరా, పారిశుధ్యం, వ్యర్థాల తొలగింపు, పరిశుభ్రమైన వాతావరణం కల్పించేందుకు అన్ని శాఖలు సమన్వయంతో పనిచేయాలని సూచించారు. ప్రతి విభాగాన్ని సంబంధిత అధికారులు స్వయంగా పరిశీలించి, లోపాలు గుర్తిస్తే వెంటనే సరిదిద్దాలని స్పష్టం చేశారు.

పామాయిల్ రైతులకు మరింత ప్రయోజనం

అంజనపురంలో పామాయిల్ ఫ్యాక్టరీ ప్రారంభం రాష్ట్రంలో పామాయిల్ సాగు అభివృద్ధికి ప్రోత్సాహకరంగా నిలుస్తుందని కలెక్టర్ పేర్కొన్నారు. ఈ ఫ్యాక్టరీ ద్వారా రైతులకు మార్కెటింగ్, ప్రాసెసింగ్ సౌకర్యాలు మరింత మెరుగుపడతాయని తెలిపారు. అందుకు అనుగుణంగా కార్యక్రమానికి తరలివచ్చే రైతుల సౌకర్యాలపై ప్రత్యేక దృష్టి సారించాలని అధికారులను ఆదేశించారు.

ముఖ్యమంత్రి పర్యటనను విజయవంతం చేయడంలో ప్రతి శాఖ బాధ్యతాయుతంగా వ్యవహరించాలని, అప్పగించిన పనులను నిర్దేశిత గడువులోగా పూర్తిచేయాలని కలెక్టర్ దివాకర టీఎస్ స్పష్టం చేశారు.

ఈ పరిశీలనలో పోలీసు ఉన్నతాధికారులు, అదనపు కలెక్టర్లు, ఆర్ అండ్ బీ, పంచాయతీరాజ్, రెవెన్యూ, విద్యుత్, వైద్య ఆరోగ్య, అగ్నిమాపక, రవాణా, మున్సిపల్, వ్యవసాయ, ఉద్యాన, పరిశ్రమల శాఖల అధికారులు, గోద్రెజ్ సంస్థ ప్రతినిధులు తదితరులు పాల్గొన్నారు.