టీబీ రహిత భారత్ లక్ష్యం..
- ఢిల్లీ ప్రభుత్వంతో ఉన్నతస్థాయి సమావేశం..
- టీబీ నిర్మూలన, డెంగ్యూ నివారణ చర్యలపై సమీక్ష
ఆంధ్రప్రభ, వెబ్డెస్క్ : కేంద్ర ఆరోగ్య శాఖ మంత్రి జేపీ నడ్డా బుధవారం ఢిల్లీ ప్రభుత్వ అధికారులతో ఉన్నతస్థాయి సమీక్ష సమావేశం నిర్వహించారు. ‘టీబీ ముక్త్ భారత్ అభియాన్’ అమలు తీరుతో పాటు వర్షాకాలం నేపథ్యంలో డెంగ్యూ నివారణకు చేపట్టాల్సిన చర్యలపై సమగ్రంగా చర్చించారు.
దేశంలో క్షయవ్యాధి (Tuberculosis) నిర్మూలన లక్ష్యంగా చేపట్టిన కార్యక్రమాల పురోగతి, కేసుల గుర్తింపు, రోగులకు చికిత్స అందించడం, ప్రజల్లో అవగాహన పెంపు వంటి అంశాలను సమావేశంలో సమీక్షించారు. అలాగే ఢిల్లీలో డెంగ్యూ వ్యాప్తిని అరికట్టేందుకు ముందస్తు చర్యలు, ఆసుపత్రుల సన్నద్ధత, దోమల నివారణ చర్యలు, ప్రజారోగ్య వ్యవస్థ సిద్ధతపై అధికారులకు పలు సూచనలు చేశారు.
ఈ ఏడాది మార్చిలో ప్రపంచ క్షయవ్యాధి దినోత్సవం సందర్భంగా కేంద్ర ప్రభుత్వం ‘టీబీ ముక్త్ భారత్ అభియాన్ – 100 రోజుల ప్రత్యేక ప్రచారం’ ప్రారంభించింది. అదే సమయంలో టీబీ ముక్త్ భారత్ యాప్, టీబీ ముక్త్ అర్బన్ వార్డ్ ఇనిషియేటివ్ కార్యక్రమాలను కూడా ప్రారంభించింది. వీటి ద్వారా క్షయవ్యాధి కేసులను వేగంగా గుర్తించడం, చికిత్సను మరింత సమర్థవంతంగా అమలు చేయడం, పట్టణ ప్రాంతాల్లో సేవలను విస్తరించడం లక్ష్యంగా పెట్టుకుంది. ప్రధాని నరేంద్ర మోదీ సంకల్పించిన ‘టీబీ రహిత భారత్’ లక్ష్యాన్ని సాధించేందుకు కేంద్ర ప్రభుత్వం అన్ని రాష్ట్రాలతో సమన్వయం చేసుకుంటూ చర్యలు కొనసాగిస్తోందని కేంద్ర ఆరోగ్య శాఖ పేర్కొంది.
