TG Police Jobs | త్వరలో 7,437 పోలీసు ఉద్యోగాల భర్తీ నోటిఫికేషన్

పోలీసు, అగ్నిమాపక, జైళ్ల శాఖల్లో భారీ స్థాయిలో నియామకాలకు రంగం సిద్ధం
ఖాళీల భర్తీ ప్రక్రియను వేగవంతం చేసిన తెలంగాణ ప్రభుత్వం..
త్వరలో అధికారిక నోటిఫికేషన్

TG Police Jobs | ఆంధ్ర‌ప్ర‌భ వెబ్‌డెస్క్ : తెలంగాణలో ప్రభుత్వ ఉద్యోగాల కోసం ఎదురుచూస్తున్న నిరుద్యోగ యువతకు రాష్ట్ర ప్రభుత్వం శుభవార్త చెప్పింది. పోలీసు శాఖతో పాటు అగ్నిమాపక, జైళ్ల శాఖల్లో మొత్తం 7,437 పోస్టుల భర్తీకి తెలంగాణ పోలీసు నియామక మండలి (రిక్రూట్‌మెంట్ బోర్డు) సన్నాహాలు ప్రారంభించింది. ఇందుకు సంబంధించిన అధికారిక నోటిఫికేషన్ త్వరలో విడుదల కానుంది.

తెలంగాణలో భారీ స్థాయిలో పోలీసు నియామకాలకు ప్రభుత్వం కసరత్తు వేగవంతం చేసింది. రాష్ట్ర పోలీసు నియామక మండలి (పోలీస్ రిక్రూట్‌మెంట్ బోర్డు) త్వరలో మొత్తం 7,437 పోస్టుల భర్తీకి నోటిఫికేషన్ విడుదల చేయనున్నట్లు ప్రకటించింది. ఈ ప్రకటనతో ప్రభుత్వ ఉద్యోగాల కోసం సిద్ధమవుతున్న వేలాది మంది నిరుద్యోగ అభ్యర్థుల్లో కొత్త ఆశలు చిగురించాయి.

ప్రాథమికంగా అందుబాటులో ఉన్న సమాచారం ప్రకారం, పోలీసు శాఖలో సుమారు 5,000 పోస్టులు, అగ్నిమాపక శాఖలో 790 పోస్టులు, జైళ్ల శాఖలో 223 పోస్టులు భర్తీ చేయనున్నారు. మిగిలిన ఖాళీలు ఇతర అనుబంధ విభాగాల్లో ఉండే అవకాశం ఉందని తెలుస్తోంది. పోస్టుల విభజన, కేటగిరీల వారీ ఖాళీలు, అర్హతలు, వయోపరిమితి, ఎంపిక విధానం తదితర పూర్తి వివరాలు అధికారిక నోటిఫికేషన్‌లో వెల్లడికానున్నాయి.

రాష్ట్రంలో శాంతిభద్రతలను మరింత బలోపేతం చేయడం, ఖాళీగా ఉన్న పోస్టులను భర్తీ చేయడం, శాఖల పనితీరును మెరుగుపరచడం లక్ష్యంగా ఈ నియామక ప్రక్రియ చేపట్టినట్లు అధికారులు పేర్కొంటున్నారు. పోటీ పరీక్షలకు సిద్ధమవుతున్న అభ్యర్థులు అధికారిక నోటిఫికేషన్ వెలువడే వరకు పోలీసు నియామక మండలి ప్రకటించే సమాచారాన్ని మాత్రమే విశ్వసించాలని, అనధికారిక ప్రచారాలను నమ్మొద్దని అధికారులు సూచిస్తున్నారు. ఈ నియామకాల ద్వారా రాష్ట్రంలోని వేలాది మంది యువతకు ప్రభుత్వ ఉద్యోగ అవకాశాలు లభించే అవకాశం ఉండటంతో, త్వరలో విడుదలయ్యే నోటిఫికేషన్‌పై నిరుద్యోగుల్లో ఆసక్తి నెలకొంది.