hyd | అబిడ్స్ పోలీసుల అదుపులో ఐదుగురు

hyd | ఆంధ్రప్రభ, వెబ్‌డెస్క్‌ : హైదరాబాద్‌లోని బషీర్‌బాగ్ ప్రాంతంలో ఓ యువతిని వేధించినట్లు ఆరోపణలు ఎదుర్కొంటున్న ఐదుగురిని అబిడ్స్ పోలీసులు అదుపులోకి తీసుకున్నారు. సీసీఎస్ (సెంట్రల్ క్రైమ్ స్టేషన్) కార్యాలయం సమీపంలో ఈ ఘటన చోటుచేసుకున్నట్లు పోలీసులు తెలిపారు.

యువతి ఫిర్యాదుతో కేసు నమోదు…
పోలీసుల వివరాల ప్రకారం.. యువతి రోడ్డుపై వెళ్తుండగా కొందరు వ్యక్తులు ఆమె పట్ల అసభ్యంగా ప్రవర్తించి, చేయి పట్టుకునేందుకు ప్రయత్నించినట్లు ఆరోపణలున్నాయి. దీంతో యువతి గట్టిగా కేకలువేయగా, సమీపంలో ఉన్న స్థానికులు అక్కడికి చేరుకుని నిందితులను అడ్డుకున్నారు.

ఐదుగురిపై ఈవ్‌టీజింగ్ కేసు…
సునీల్, ఉమేష్, లక్ష్మణ్, పురుషోత్తం, రామ్ అనే ఐదుగురిని పోలీసులు గుర్తించారు. వీరు స్థానికంగా ఓ ఫుడ్ క్యాటరింగ్/ఫాస్ట్‌ఫుడ్ కేంద్రంలో పనిచేస్తున్నట్లు ప్రాథమిక విచారణలో వెల్లడైంది. యువతి ఫిర్యాదు మేరకు కేసు నమోదు చేసి దర్యాప్తు చేపట్టినట్లు అబిడ్స్ పోలీసులు తెలిపారు. నిందితులను కోర్టులో హాజరుపరచనున్నట్లు సమాచారం. వారి జాతీయత, ఇతర వివరాలను కూడా పోలీసులు పరిశీలిస్తున్నారు.