యాదాద్రి క్షేత్రంలో అరుదైన ఆధ్యాత్మిక దృశ్యం..
యాదగిరికొండ, ఆంధ్రప్రభ : ప్రపంచ ప్రఖ్యాతిగాంచిన ప్రముఖ పుణ్యక్షేత్రమైన యాదాద్రి లక్ష్మీనరసింహస్వామి వారి దివ్య సన్నిధిలో ఒక అరుదైన, అత్యంత భక్తిమయమైన ఘట్టం ఆవిష్కృతమైంది. లౌకిక ప్రపంచానికి దూరంగా, కఠినమైన ఆధ్యాత్మిక సాధనలోనే కాలం గడిపే నాగ సాధువుల బృందం… కొండపై వెలిసిన స్వయంభూ నారసింహుడిని దర్శించుకోవడానికి ప్రత్యేకంగా యాదాద్రి క్షేత్రానికి చేరుకుంది.
సాధారణంగా మారుమూల పర్వత ప్రాంతాలలో, కుంభమేళా వంటి పవిత్ర ఉత్సవాల్లో మాత్రమే కనిపించే నాగ సాధువులు ఈ విధంగా యాదాద్రి కొండపైకి రావడం స్థానిక భక్తులను, అర్చకులను విశేషంగా ఆకట్టుకుంది. నాగ సాధువుల రాకతో యాదాద్రి ఆలయ ప్రాంగణం ఒక్కసారిగా సరికొత్త ఆధ్యాత్మిక శోభను సంతరించుకుంది.
కాషాయ వస్త్రాలు ధరించి, దైవ చింతనతో వారు ప్రధాన ఆలయ ప్రాంగణంలో నడుస్తూ వెళ్తున్న అరుదైన దృశ్యం కండ్లకు కట్టినట్టుగా తిలకించారు. కొండపైకి చేరుకున్న అనంతరం వారు ఆలయంలో లక్ష్మీనరసింహస్వామి వారిని అత్యంత భక్తిశ్రద్ధలతో దర్శించుకుని ప్రత్యేక పూజలు ఆచరించారు.
స్వామివారి దివ్య మంగళరూపాన్ని కళ్లారా వీక్షించి, నారసింహుడి కృపాకటాక్షాలను పొందారు. దర్శనానంతరం యాదాద్రి క్షేత్ర విశిష్టతను, ఇక్కడి కృష్ణశిలా శిల్పకళా వైభవాన్ని వారు నిశితంగా పరిశీలించి అభినందించారు. ఈ దివ్య పుణ్యక్షేత్రం యొక్క ప్రశాంతత, ఆధ్యాత్మిక శక్తి తమను ఎంతగానో ఆకట్టుకున్నాయని వారు వ్యక్తపరిచారు.
నిరంతరం దైవనామ స్మరణలో ఉండే నాగ సాధువులను కొండపైన నేరుగా దర్శించుకునే భాగ్యం కలగడంతో, ఆలయానికి వచ్చిన సామాన్య భక్తులు సైతం ఎంతో పులకించిపోయారు. ఈ అరుదైన పర్యటనతో యాదాద్రి లక్ష్మీనరసింహస్వామి వారి దివ్య క్షేత్ర మహిమ మరోసారి చాటిచెప్పబడినట్లయింది.
