ప్రధాని అపాయింట్ కోరిన తల్లిదండ్రులు
ముందస్తుగా గృహనిర్భంధం
( కర్నూలు, ఆంధ్రప్రభ బ్యూరో) : దేశ ప్రధాని నరేంద్ర మోదీ కర్నూలు పర్యటన సందర్భంగా అపాయింట్‌మెంట్ కోరిన సుగాలి ప్రీతి (Sugali Preethi) తల్లిదండ్రులను కూటమి ప్రభుత్వం గృహ నిర్బంధంలో ఉంచిన ఘటన గురువారం చర్చనీయాంశంగా మారింది. ప్రధాని పర్యటన సందర్భంగా కర్నూలు జిల్లాలో భద్రతా చర్యలు కట్టుదిట్టం చేసిన నేపథ్యంలో ఈ ఘటన చోటుచేసుకుంది. ప్రధానిని కలసి తమ కుమార్తెకు న్యాయం చేయాలని, కేసు దర్యాప్తు వేగవంతం చేయాలని కోరిన ప్రీతి తల్లిదండ్రులను పోలీసులు ఇంట్లోనే నిర్బంధించి బయటకు రావడాన్ని నిరోధించారు.
దీనిపై స్థానికంగా తీవ్ర ఆందోళన వ్యక్తమవుతోంది. ప్రజా సంఘాలు, మహిళా హక్కుల సంస్థలు ఈ చర్యను తీవ్రంగా ఖండించాయి. ప్రధానిని కలవడం కూడా ప్రజాస్వామ్యంలో నేరమా? అని వారు ప్రశ్నిస్తున్నాయి. మరోవైపు, పోలీసులు మాత్రం భద్రతా కారణాల దృష్ట్యా తాత్కాలికంగా ఆచరణలో భాగంగా ఈ చర్య చేపట్టినట్లు వివరణ ఇచ్చారు.ప్రధాని పర్యటన సందర్భంలో సుగాలి ప్రీతి కుటుంబాన్ని గృహ నిర్బంధం చేయడం కూటమి ప్రభుత్వానికి మరో వివాదంగా మారింది.
