US-Iran War Escalates -Iran Strikes Gulf States, Hormuz Strait Closure-Sparks Global Oil Fears| భీకర పోరాటాలకు అమెరికా, ఇరాన్ రెడీ.. హోర్ముజ్ మూసివేతతో ప్రపంచానికి కొత్త ముప్పు

US-Iran War Escalates -Iran Strikes Gulf States, Hormuz Strait Closure-Sparks Global Oil Fears| భీకర పోరాటాలకు అమెరికా, ఇరాన్ రెడీ.. హోర్ముజ్ మూసివేతతో ప్రపంచానికి కొత్త ముప్పు

అమెరికా–ఇరాన్ యుద్ధం మరింత ఉధృతం
అమెరికా మూడో విడత దాడులకు ఇరాన్ ప్రతీకారం..
ఖతార్, కువైట్, బహ్రెయిన్, జోర్డాన్‌పై ఇరాన్ దాడులు
హోర్ముజ్ జలసంధి మూసివేత
గల్ఫ్ దేశాలకు విస్తరించిన యుద్ధం
గల్ఫ్ దేశాల్లో హై అలర్ట్
ప్రపంచ చమురు సరఫరాపై ప్రభావం
ప్రపంచ ఆర్థిక వ్యవస్థపై ఆందోళన

US-Iran War Escalates -Iran Strikes Gulf States, Hormuz Strait Closure-Sparks Global Oil Fears| ఆంధ్రప్రభ వెబ్‌, అంతర్జాతీయ ప్రతినిధి: పశ్చిమాసియాలో యుద్ధ మేఘాలు మరింత ఉధ‌`త‌మవుతున్నాయి. అమెరికా, ఇరాన్ మధ్య జరుగుతున్న దాడులు, ప్రతిదాడులతో పరిస్థితి రోజురోజుకూ ప్రమాదకరంగా మారుతోంది. ఇరు దేశాల మధ్య మొదలైన ఘర్షణలు ఇప్పుడు గల్ఫ్ దేశాలకు విస్తరించడంతో మొత్తం ప్రాంతం హై అలర్ట్‌లోకి వెళ్లింది. భీకర యుద్ధం దిశగా పరిణామాలు వేగంగా మారుతుండటంతో ప్రపంచ దేశాలు తీవ్ర ఆందోళన వ్యక్తం చేస్తున్నాయి.

అమెరికా దాడులు.. ఇరాన్ ప్రతీకారం

ఇరాన్‌పై అమెరికా మూడో విడత వైమానిక దాడులు నిర్వహించగా, ప్రతీకారంగా ఖతార్‌లోని అమెరికా వైమానిక స్థావరంతో పాటు బహ్రెయిన్, కువైట్, జోర్డాన్, ఒమాన్‌లపై క్షిపణులు, డ్రోన్లతో దాడులు చేసినట్లు ఇరాన్ ప్రకటించింది. మరోవైపు యునైటెడ్ అరబ్ ఎమిరేట్స్ తమ గగనతలంలోకి వచ్చిన క్షిపణులు, డ్రోన్లను అడ్డుకున్నట్లు వెల్లడించింది.

హోర్ముజ్ జలసంధి వద్ద ఉద్రిక్తత

అమెరికా సెంట్రల్ కమాండ్ తెలిపిన వివరాల ప్రకారం, హోర్ముజ్ జలసంధి గుండా వెళ్తున్న సైప్రస్ జెండా కలిగిన కంటైనర్ నౌకపై ఇరాన్ విప్లవ గార్డ్ దాడి చేసింది. ఈ ఘటనలో నౌక ఇంజిన్ గది తీవ్రంగా దెబ్బతినగా, ఒక సిబ్బంది గల్లంతయ్యారు. ఈ ఘటన అనంతరం అధ్యక్షుడు డొనాల్డ్ ట్రంప్ ఆదేశాలతో అమెరికా మూడో విడత దాడులు చేపట్టింది.

గల్ఫ్‌కు విస్తరించిన ఘర్షణలు

అమెరికా దాడులకు ప్రతీకారంగా గల్ఫ్ దేశాలపై ఇరాన్ దాడులు చేయడంతో ప్రాంతీయ భద్రతపై తీవ్ర ఆందోళనలు వ్యక్తమవుతున్నాయి. బహ్రెయిన్, కువైట్, ఖతార్, జోర్డాన్, ఒమాన్‌లలో అప్రమత్త పరిస్థితులు నెలకొన్నాయి. యుద్ధం మరింత విస్తరించే ప్రమాదం ఉందని రక్షణ నిపుణులు హెచ్చరిస్తున్నారు.

హోర్ముజ్ జలసంధి మూసివేత

ఇరాన్ ఇస్లామిక్ రివల్యూషనరీ గార్డ్ కార్ప్స్ హోర్ముజ్ జలసంధిని తాత్కాలికంగా మూసివేస్తున్నట్లు ప్రకటించింది. అనుమతి లేని మార్గంలో ప్రయాణించిన ఓ నౌకపై హెచ్చరిక కాల్పులు జరిపినట్లు వెల్లడించింది. ఇరాన్ ప్రభుత్వ మీడియా ప్రకారం బందర్ అబ్బాస్, సిరిక్, చాబహార్, జాస్క్, అసలూయెహ్ సహా పలు ప్రాంతాల్లో భారీ పేలుళ్లు చోటుచేసుకున్నాయి.

భీకర పోరాటాలకు సిద్ధమైన అమెరికా, ఇరాన్

అమెరికా అధ్యక్షుడు డొనాల్డ్ ట్రంప్ ఇరాన్‌ను హెచ్చరిస్తూ, అవసరమైతే వెయ్యి క్షిపణులతో దాడి చేసేందుకు సిద్ధంగా ఉన్నామని ప్రకటించినట్లు అంతర్జాతీయ మీడియా పేర్కొంది. దీనికి ప్రతిస్పందనగా ఇరాన్ కూడా ఎలాంటి దాడినైనా తిప్పికొట్టేందుకు సిద్ధంగా ఉన్నామని ప్రకటించింది. ఇరు దేశాలు వెనక్కి తగ్గే సూచనలు కనిపించకపోవడంతో పరిస్థితి మరింత ఉద్రిక్తంగా మారుతోంది.

చమురు సరఫరాపై ప్రభావం.. ప్రపంచానికి కొత్త ముప్పు

ప్రపంచ చమురు రవాణాలో కీలకమైన హోర్ముజ్ జలసంధి మూసివేతతో అంతర్జాతీయ మార్కెట్లపై తీవ్ర ప్రభావం పడే అవకాశం ఉందని ఆర్థిక, భద్రతా నిపుణులు హెచ్చరిస్తున్నారు. చమురు సరఫరాలో అంతరాయం ఏర్పడితే ఇంధన ధరలు భారీగా పెరగడమే కాకుండా ప్రపంచ ఆర్థిక వ్యవస్థ మాంద్యంలోకి వెళ్లే ప్రమాదం ఉందని విశ్లేషిస్తున్నారు.

పాకిస్తాన్, సౌదీ ఆందోళన

పశ్చిమాసియాలో వేగంగా మారుతున్న పరిస్థితులపై పాకిస్తాన్, సౌదీ అరేబియా తీవ్ర ఆందోళన వ్యక్తం చేశాయి. పాకిస్తాన్ విదేశాంగ మంత్రి ఇషాక్ దార్, సౌదీ విదేశాంగ మంత్రి ప్రిన్స్ ఫైసల్ బిన్ ఫర్హాన్ టెలిఫోన్‌లో మాట్లాడి ప్రాంతీయ శాంతి, భద్రతపై చర్చించారు. అమెరికా–ఇరాన్ ఘర్షణలు మరింత విస్తరించకుండా దౌత్యపరమైన ప్రయత్నాలు అవసరమని అభిప్రాయపడ్డారు.