2–3 cups | ఈ అలవాట్లు ఆరోగ్యాన్ని దెబ్బతీస్తాయి

మితంగా, సరైన సమయంలో తాగితేనే టీ ప్రయోజనాలు..
లేదంటే అసిడిటీ నుంచి నిద్రలేమి వరకు పలు సమస్యలు

2–3 cups | వెబ్‌డెస్క్, ఆంధ్ర‌ప్ర‌భ : టీ ఆరోగ్యానికి మేలు చేస్తుందనేది నిజమే. అయితే దానిని తాగే విధానం, సమయం కూడా అంతే ముఖ్యమని ఆరోగ్య నిపుణులు చెబుతున్నారు. టీ తాగేటప్పుడు కొన్ని జాగ్రత్తలు పాటించకపోతే గుండెల్లో మంట, అసిడిటీ, నిద్రలేమి, ఐరన్ లోపం వంటి సమస్యలు వచ్చే అవకాశం ఉందని వైద్యులు హెచ్చరిస్తున్నారు.

రోజువారీ జీవితంలో టీ ఒక భాగంగా మారిపోయింది. ఉదయం నిద్రలేవగానే, పనిలో ఒత్తిడి తగ్గించుకోవడానికి, సాయంత్రం సేదతీరడానికి, కొందరు రాత్రి పడుకునే ముందు కూడా టీ తాగుతుంటారు. అయితే టీని అధికంగా లేదా సరికాని సమయంలో తాగడం ఆరోగ్యంపై ప్రతికూల ప్రభావం చూపుతుంది.

1. ఖాళీ కడుపుతో టీ తాగొచ్చా?
   మిల్క్ టీ, బ్లాక్ టీ, గ్రీన్ టీల్లో కెఫిన్ ఉంటుంది. ఇది కడుపులో ఆమ్ల ఉత్పత్తిని పెంచుతుంది. ఖాళీ కడుపుతో టీ తాగితే అసిడిటీ, గుండెల్లో మంట, అజీర్ణం వంటి సమస్యలు వచ్చే అవకాశం ఎక్కువ.
2. చాలా వేడిగా టీ తాగడం ప్రమాదకర‌మా?
   చాలామంది టీ చల్లారకముందే తాగేస్తుంటారు. కానీ అత్యంత వేడిగా ఉండే పానీయాలు గొంతు, అన్నవాహిక లోపలి పొరలను దెబ్బతీయవచ్చు. ఈ అలవాటు దీర్ఘకాలం కొనసాగితే అన్నవాహికకు హాని కలిగే ప్రమాదం ఉందని కొన్ని అధ్యయనాలు సూచిస్తున్నాయి.
3. ఎలాంటి టీ బ్యాగులు ఎంపిక చేసుకోవాలి..?
   కొన్ని ప్లాస్టిక్ పూత ఉన్న టీ బ్యాగులను వేడి నీటిలో ఉపయోగించినప్పుడు సూక్ష్మ ప్లాస్టిక్ కణాలు పానీయంలోకి చేరే అవకాశం ఉందని కొన్ని పరిశోధనలు పేర్కొన్నాయి. అందుకే సాధ్యమైనంత వరకు నాణ్యమైన టీ ఆకులతో తయారుచేసిన టీని ఎంచుకోవడం మంచిది.
4. భోజనం చేసిన వెంటనే టీ తాగొచ్చా?
   టీలో ఉండే టానిన్లు శరీరం ఐరన్‌ను గ్రహించే సామర్థ్యాన్ని తగ్గిస్తాయి. ముఖ్యంగా భోజనం చేసిన వెంటనే టీ తాగే అలవాటు ఉంటే ఐరన్ శోషణ తగ్గి, కొందరిలో రక్తహీనత ప్రమాదం పెరగవచ్చు.
5. రోజుకు ఎక్కువ కప్పులు తాగొచ్చా..?
   రోజంతా పదేపదే టీ తాగడం వల్ల కెఫిన్ అధికమై అసిడిటీ, ఆందోళన, గుండె వేగం పెరగడం వంటి సమస్యలు తలెత్తవచ్చు. రోజుకు 2–3 కప్పులకు పరిమితం చేయడం మంచిది.
6. రాత్రి సమయంలో టీకి దూరంగా ఉండాలా?
   రాత్రిపూట టీ తాగితే అందులోని కెఫిన్ నిద్రను ప్రభావితం చేస్తుంది. దీంతో గాఢ నిద్ర తగ్గి మరుసటి రోజు అలసటగా అనిపించవచ్చు. రాత్రి వేళల్లో హెర్బల్ టీ లేదా కెఫిన్ లేని పానీయాలను తీసుకోవడం ఉత్తమం.
   టీ తాగేటప్పుడు గుర్తుంచుకోవాల్సిన విషయాలు..
   టీ కొద్దిగా చల్లారిన తర్వాతే తాగండి. రోజుకు 2–3 కప్పులకే పరిమితం అవ్వండి. ఖాళీ కడుపుతో టీ తాగకండి. భోజనం చేసిన వెంటనే టీ తాగకుండా కనీసం గంట విరామం ఇవ్వండి. నాణ్యమైన టీ ఆకులను ఉపయోగించండి. రాత్రి సమయంలో కెఫిన్ లేని పానీయాలను ఎంచుకోండి. టీలో యాంటీఆక్సిడెంట్లు వంటి ప్రయోజనకరమైన పదార్థాలు ఉన్నప్పటికీ, మితంగా, సరైన సమయంలో తాగితేనే పూర్తి ఆరోగ్య ప్రయోజనాలు పొందవచ్చని నిపుణులు సూచిస్తున్నారు.