OG-2 | పవన్ ఫ్యాన్స్కు గుడ్న్యూస్.. సీక్వెల్కు గ్రీన్ సిగ్నల్
OG-2 | పవన్ ఫ్యాన్స్కు గుడ్న్యూస్.. సీక్వెల్కు గ్రీన్ సిగ్నల్
- పవన్ కళ్యాణ్ టీమ్ అధికారిక ప్రకటన..
- విదేశాల నుంచి దర్శకుడు సుజీత్ రాగానే చర్చలు
ఆంధ్రప్రభ వెబ్డెస్క్: పవర్ స్టార్ అభిమానులు ఎంతగానో ఎదురుచూస్తున్న ‘ఓజీ 2’ (OG-2 )పై ఆసక్తికర అప్డేట్ వచ్చింది. ‘దే కాల్ హిమ్ ఓజీ’ (They Call Him OG) చిత్రానికి సీక్వెల్ రానుందా లేదా అనే సందేహాలకు తెరదించుతూ పవన్ కళ్యాణ్ అధికారిక సోషల్ మీడియా బృందం కీలక ప్రకటన చేసింది.
“ముందు చెప్పినట్లుగానే ఆయన (పవన్ కళ్యాణ్) తప్పకుండా చేస్తారు. అయితే సమయం ఎప్పుడు అనేది ఆయనే చెబుతారు. దర్శకుడు సుజీత్ విదేశాల నుంచి తిరిగి వచ్చిన తర్వాత ‘ఓజీ 2’ గురించి చర్చిస్తాం” అని పవన్ టీమ్ వెల్లడించింది. ఈ ప్రకటనతో ‘ఓజీ 2’పై అభిమానుల్లో మరింత ఉత్సాహం నెలకొంది. ముఖ్యంగా ఓజస్ గంభీర (Ojas Gambheera) పాత్రలో పవన్ కళ్యాణ్ను మరోసారి చూడాలని అభిమానులు ఆసక్తిగా ఎదురుచూస్తున్నారు.
ఇప్పటికే ఖరారైన ‘ఓజీ యూనివర్స్’
వాస్తవానికి ‘ఓజీ’ సీక్వెల్ చర్చలు కొత్తవి కావు. 2025 సెప్టెంబరులో జరిగిన ‘ఓజీ’ విజయోత్సవ వేడుకల్లోనే దర్శకుడు సుజీత్, సంగీత దర్శకుడు థమన్, పవన్ కళ్యాణ్ కలిసి ‘ఓజీ యూనివర్స్’ ప్రకటించారు. సీక్వెల్లతో పాటు ప్రీక్వెల్ను కూడా రూపొందించే ఆలోచన ఉందని అప్పుడే వెల్లడించారు. అదే కార్యక్రమంలో సీక్వెల్ను సుజీత్కు తాను ఇచ్చే బహుమతిగా భావిస్తున్నానని పవన్ కళ్యాణ్ చెప్పడం అభిమానుల్లో మరింత ఆసక్తిని పెంచింది.
‘ఓజీ’ ఎందుకు ప్రత్యేకమైంది?
సుజీత్ దర్శకత్వంలో తెరకెక్కిన ‘ఓజీ’ ఒక క్రైమ్ యాక్షన్ డ్రామా. ఇందులో పవన్ కళ్యాణ్ మాఫియా డాన్ ఓజస్ గంభీర పాత్రలో కనిపించారు. 1990ల ముంబై నేపథ్యంలో సాగే ఈ కథలో ప్రత్యర్థి మాఫియా గ్యాంగ్లపై ఓజస్ గంభీర సాగించిన పోరాటం ప్రేక్షకులను ఆకట్టుకుంది. ఈ చిత్రం పవన్ కళ్యాణ్ కెరీర్లోనే అత్యధిక వసూళ్లు సాధించిన సినిమాగా నిలవడమే కాకుండా, 2025లో అత్యధిక కలెక్షన్లు సాధించిన తెలుగు చిత్రాల్లో ఒకటిగా రికార్డు సృష్టించింది.
‘ఓజీ’ ఘన విజయం, ఓజస్ గంభీర పాత్రకు వచ్చిన ఆదరణ కారణంగా ‘ఓజీ 2’ ప్రస్తుతం టాలీవుడ్లో అత్యంత ఆసక్తిగా ఎదురుచూస్తున్న సీక్వెల్స్లో ఒకటిగా మారింది. అయితే దర్శకుడు సుజీత్ ప్రస్తుతం విదేశాల్లో ఉండటంతో సినిమా టైమ్లైన్, షూటింగ్ షెడ్యూల్, విడుదల తేదీ వంటి వివరాలు వెల్లడికావడానికి మరికొంత సమయం పట్టే అవకాశం ఉంది. అయినప్పటికీ పవన్ టీమ్ ఇచ్చిన తాజా అప్డేట్ అభిమానుల్లో కొత్త ఉత్సాహాన్ని నింపింది.
