100%increasing | యువతను మింగేస్తున్న డ్రగ్స్ మాఫియా
100%increasing | యువతను మింగేస్తున్న డ్రగ్స్ మాఫియా
100%increasing | భయానక స్థాయికి చేరుతున్న డ్రగ్స్ వినియోగం
పెడ్లర్లుగా మారుతున్న యువత
కాలేజీలు, ఐటీ కారిడార్లు టార్గెట్
డ్రగ్స్ వల్ల పెరుగుతున్న దారుణ నేరాలు
ప్రభుత్వ చర్యలు… ఫలిస్తున్నాయా?
ప్రశ్నార్థకంగా యువత భవిష్యత్తు
100%increasing | ఆంధ్రప్రభ వెబ్ డెస్క్ : రానూ రానూ మాదకద్రవ్యాల వినియోగం భయానక స్థాయికి చేరుకుంటోంది. ఒకప్పుడు కొద్ది వర్గాలకు మాత్రమే పరిమితమైన డ్రగ్స్ ఇప్పుడు విద్యార్థులు, ఉద్యోగులు, ముఖ్యంగా యువతలో వేగంగా వ్యాపిస్తోంది. ఇది కేవలం ఒక అలవాటు మాత్రమే కాదు… అపాయకర మహమ్మారిలా మారుతోంది. మరింత ఆందోళనకరమైన విషయం ఏమిటంటే, డ్రగ్స్కు బానిసలవుతున్న యువత… తర్వాత అదే దందాలోకి దిగిపోతూ పెడ్లర్లుగా మారిపోతున్నారు. వేరేవారికి దారిచూపుతున్నారు…ఈ రొంపిలోకి దింపుతున్నారు.
మొదట వినియోగదారులుగా మొదలైన వీరి ప్రయాణం… ఆ తర్వాత కొద్ది కాలానికే అక్రమ వ్యాపారంగా మారుతోంది. తమ ఖర్చులను తీర్చుకోవడం కోసం చిన్న స్థాయిలో సరఫరా మొదలుపెట్టి… తర్వాత పూర్తిస్థాయి డ్రగ్ డీలర్లుగా మారిపోతున్నారు. ఆశ్చర్యకరంగా, ఈ దందాలో ఇంజినీరింగ్ విద్యార్థులు, ఐటీ ఉద్యోగులు కూడా ఉండటం చూస్తుంటే పరిస్థితి ఎంత తీవ్రంగా మారిందో చెప్పనక్కరలేదనిపిస్తోంది.. అతి తక్కువ సమయంలో ఎక్కువ డబ్బు సంపాదించాలనే ఆశ… వారిని చీకటి మార్గంలోకి నెడుతోంది.
ఒకప్పుడు పుస్తకాలు, నోట్బుక్స్ ఉండాల్సిన విద్యార్థుల బ్యాగుల్లో ఇప్పుడు మాదక ద్రవ్యాలు కనిపించడం సమాజాన్ని ఉలిక్కిపడేలా చేస్తోంది. కాలేజీ క్యాంపస్లు, ప్రైవేట్ హాస్టళ్లు… ఇవన్నీ ఇప్పుడు రహస్య డ్రగ్ కేంద్రాలుగా మారుతున్నాయన్న ఆరోపణలు తీవ్ర ఆందోళన కలిగిస్తున్నాయి.
డ్రగ్స్ ప్రభావంతో యువతలో హింసాత్మక స్వభావం పెరుగుతోంది. మత్తులో హత్యలు, అత్యాచారాలు, దాడులు వంటి దారుణ నేరాలు పెరుగుతున్నాయి. కుటుంబాలు కూలిపోతుంటే… సమాజంలో భద్రతపై భయాందోళనలు పెరుగుతున్నాయి. పోలీసుల గణాంకాలు కూడా ఇదే చెబుతున్నాయి — డ్రగ్స్ కేసులు మాత్రమే కాదు, వాటి ప్రభావంతో జరిగే నేరాల సంఖ్య కూడా గణనీయంగా పెరుగుతోంది.
యువతే టార్గెట్… డ్రగ్ నెట్వర్క్ విస్తరణ
డ్రగ్ మాఫియా ఇప్పుడు కాలేజీలు, హాస్టళ్లు, ఐటీ కారిడార్లను టార్గెట్ చేస్తోంది. సోషల్ మీడియా, మెసేజింగ్ యాప్ల ద్వారా గుప్తంగా ఆర్డర్లు తీసుకుని సరఫరా చేస్తోంది. ఫ్రెండ్ సర్కిల్స్, పార్టీ కల్చర్ పేరుతో మొదలైన పరిచయం… చివరికి వ్యసన బానిసత్వానికి దారి తీస్తోంది.
గంజాయి, MDMA, LSD వంటి సింథటిక్ డ్రగ్స్ వినియోగం పెరుగుతోంది. వీటి వల్ల యువతలో డిప్రెషన్, మానసిక అస్థిరత, సామాజిక దూరం వంటి తీవ్రమైన సమస్యలు తలెత్తుతున్నాయి.
ప్రభుత్వ చర్యలు…నామమాత్రమేనా?
డ్రగ్స్ నియంత్రణ కోసం ప్రభుత్వం “ఈగిల్స్” పేరుతో ప్రత్యేక బృందాన్ని ఏర్పాటు చేసింది. పోలీసులు, టాస్క్ ఫోర్స్, నార్కోటిక్స్ విభాగం కలిసి దాడులు, అండర్కవర్ ఆపరేషన్లు నిర్వహిస్తూ డ్రగ్ మాఫియాపై కఠిన చర్యలు తీసుకుంటున్నారు. విదేశాల నుంచి వచ్చే సింథటిక్ డ్రగ్స్పై ప్రత్యేక నిఘా పెట్టారు. విద్యాసంస్థల వద్ద తనిఖీలు, అవగాహన కార్యక్రమాలు కూడా కొనసాగుతున్నాయి.
ఇటీవల డ్రగ్స్ టెస్టుల్లో పాజిటివ్గా తేలిన అభ్యర్థులను ప్రభుత్వ ఉద్యోగాలకు అనర్హులుగా ప్రకటించే నిర్ణయం తీసుకోవడం కూడా కీలకమే. అయినప్పటికీ, ఈ చర్యలు ఉన్నా కొంతమంది యువతలో మార్పు కనిపించకపోవడం ఆందోళన కలిగిస్తోంది.
ప్రశ్నార్థకంగా మారుతున్న యువత భవిష్యత్తు
డ్రగ్స్ సమస్య కేవలం చట్టపరమైన అంశం కాదు… ఇది ఒక సామాజిక సంక్షోభం. కుటుంబాలు, విద్యాసంస్థలు, సమాజం కలిసి పనిచేయకపోతే… ఈ వ్యసనం భవిష్యత్తును మింగేస్తుంది.
విద్యార్థుల ప్రవర్తనలో మార్పులను గమనించి వెంటనే కౌన్సెలింగ్ అందించడం అవసరం. అవగాహన పెంచడం, సరైన మార్గనిర్దేశం చేయడం అత్యవసరం.
చదువుకున్న యువతే ఈ చీకటి బాటలోకి దిగడం నిజంగా ఆందోళనకర పరిణామం. కఠిన చట్టాలు, సమగ్ర అవగాహన, సమాజం సహకారం — ఈ మూడు కలిసొస్తేనే డ్రగ్స్ అనే ఈ మహా ముప్పును ఎదుర్కోవచ్చు.
లేదంటే… వ్యసనంగా మొదలైన ఈ ప్రయాణం… ఒక రోజు జీవితాన్నే నాశనం చేసే వ్యాపారంగా మారిపోతుంది.
ఇందులో కేవలం పోలీసులో, సంబంధిత అధికారులో మాత్రమే బాధ్యత వహించాలని ఏం లేదు. ప్రతి తల్లిదండ్రులూ తమ పిల్లల కదలికలను గమనిస్తూ, వారు ఆ రొంపిలోకి దిగకుండా కాపాడుకోవడం వారిదే బాధ్యత. అలాగే ఎక్కడ ఇలాంటి మాదకద్రవ్యాల ఉనికి కనిపించినా సంబంధిత అధికారులకు సమాచారం చేరవెయ్యడం ద్వారా ఎక్కడికక్కడ ఈ విషవృక్షాన్ని విస్తరించకుండా నిర్మూలించడంలో పౌరులుగా మన బాధ్యత నెరవేర్చినవాళ్ళమవుతాం.
