33 కేవీ విద్యుత్ తీగ తగిలి యువకుడు తీవ్రగాయాలు..
33 కేవీ విద్యుత్ తీగ తగిలి యువకుడు తీవ్రగాయాలు..
ఇంద్రవెల్లి, ఆంధ్రప్రభ : ఆదిలాబాద్ జిల్లా ఇంద్రవెల్లి మండల పరిధిలో విషాదకర ఘటన చోటుచేసుకుంది. 33 కేవీ హైటెన్షన్ విద్యుత్ తీగ తగిలి ఓ యువకుడు తీవ్రంగా గాయపడడంతో స్థానికంగా ఆందోళన నెలకొంది. కష్టపడి జీవనం సాగిస్తున్న ఓ యువ కార్మికుడు ఒక్కసారిగా మృత్యువుతో పోరాడాల్సిన పరిస్థితి ఏర్పడటం అందరినీ కలచివేసింది.
స్థానికులు తెలిపిన వివరాల ప్రకారం.. గుడిహత్నూర్ మండలానికి చెందిన సయ్యద్ అఖిబ్ తాపీ మేస్త్రిగా పనిచేస్తున్నాడు. ఈ క్రమంలో ధనురాభి గ్రామానికి చెందిన మేశ్రం శంకర్ నూతనంగా నిర్మిస్తున్న ఇంటిపై సెంట్రింగ్ పనులు నిర్వహిస్తున్న సమయంలో ఈ ప్రమాదం చోటుచేసుకుంది. పని నిమిత్తం ఇంటి పైభాగంలో ఉండగా ప్రమాదవశాత్తూ సమీపంలో ఉన్న 33 కేవీ హైటెన్షన్ విద్యుత్ తీగకు అతడు అత్యంత సమీపానికి వెళ్లినట్లు తెలుస్తోంది.
దీంతో ఒక్కసారిగా భారీ విద్యుత్ షాక్కు గురైన అఖిబ్ తీవ్రంగా కాలిన గాయాలతో కిందపడిపోయాడు. ఈ దృశ్యాన్ని చూసిన సహచర కార్మికులు, స్థానికులు భయాందోళనకు గురయ్యారు. వెంటనే అప్రమత్తమైన గ్రామస్తులు యువకుడిని రక్షించి సమీప ఆసుపత్రికి తరలించారు.
అఖిబ్ పరిస్థితి విషమంగా ఉండటంతో వైద్యులు మొదట అదిలాబాద్ రిమ్స్ ఆసుపత్రికి రిఫర్ చేసినట్లు సమాచారం. అక్కడ ప్రాథమిక చికిత్స అనంతరం ఆరోగ్య పరిస్థితి మరింత ఆందోళనకరంగా మారడంతో మెరుగైన వైద్యం కోసం హైదరాబాద్కు తరలించినట్లు తెలిసింది. ప్రస్తుతం అతడు వైద్యుల పర్యవేక్షణలో చికిత్స పొందుతున్నాడు. అతని ఆరోగ్య పరిస్థితిపై కుటుంబ సభ్యులు, బంధువులు తీవ్ర ఆందోళన వ్యక్తం చేస్తున్నారు.
రోజువారీ కూలి పనులు చేస్తూ కుటుంబాన్ని పోషిస్తున్న యువకుడు ఇలాంటి ప్రమాదానికి గురికావడం స్థానికులను కలచివేసింది. ఈ ఘటనతో గ్రామంలో విషాద ఛాయలు అలుముకున్నాయి.
