2300soldiers | రష్యాకు ఉత్తరకొరియా సాయం
2300soldiers | రష్యాకు ఉత్తరకొరియా సాయం
2300soldiers | ఉక్రెయిన్ పై యుద్ధానికి భారీగా ఆర్మీ దళాలు
యద్ధ రంగంలో చావు దెబ్బతీసిన ఉక్రెయిన్
ఇప్పటికే 2300 మంది కొరియన్ సైనికులు హతం
మూడు వేలకు మందికి పైగా గాయాలు..
2300soldiers | సెంట్రల్ డెస్క్, ఆంధ్రప్రభ : వేలాది మైళ్ల దూరంలో ఉన్న దేశాల మధ్య యుద్ధం కోసం ఉత్తర కొరియా తన సైనికులను పంపడం, అందులో ఇంత భారీ సంఖ్యలో మరణాలు సంభవించడం అంతర్జాతీయ స్థాయిలో సంచలనం సృష్టిస్తోంది. ఈ తాజా పరిణామం ద్వారా రష్యా-ఉక్రెయిన్ యుద్ధం కేవలం రెండు దేశాల మధ్యే కాకుండా ఒక ‘గ్లోబల్ వార్’గా రూపుదాల్చుతోందని స్పష్టం అవుతోంది. కిమ్ జోంగ్ ఉన్ స్వయంగా స్మారకం వద్ద నివాళులర్పించడం, ఆ సైనికుల త్యాగాలను అధికారికంగా గుర్తించడాన్ని సూచిస్తోంది.
ఉత్తర కొరియా సైన్యం భారీ మూల్యం
రష్యాకు మద్దతుగా ఉక్రెయిన్ గడ్డపై పోరాడుతున్న ఉత్తర కొరియా సైన్యం భారీ మూల్యాన్ని చెల్లించుకుంటోంది. యుద్ధ రంగంలో ఇప్పటి వరకు కనీసం 2,300 మంది ఉత్తర కొరియా జవాన్లు ప్రాణాలు కోల్పోయినట్లు తాజా నివేదికలు స్పష్టం చేస్తున్నాయి. ప్యాంగ్యాంగ్లో నూతనంగా నిర్మించిన స్మారక చిహ్నాల వద్ద కిమ్ జోంగ్ ఉన్ నివాళులర్పించిన దృశ్యాలు ఈ మరణాలను ధృవీకరిస్తున్నాయి.
ఉపగ్రహ చిత్రాల సాక్ష్యం బీబీసీ దర్యాప్తు
ఉత్తర కొరియా తన సైనిక నష్టాలను రహస్యంగా ఉంచడానికి ప్రయత్నించినప్పటికీ, సాంకేతికత ద్వారా అసలు నిజం బయటపడింది. రాజధాని ప్యాంగ్యాంగ్లో యుద్ధ వీరుల కోసం నిర్మించిన స్మారక చిహ్నం వద్ద పెరిగిన సమాధులు , కిమ్ నివాళులర్పించిన ఫొటోల ఆధారంగా బీబీసీ ఈ విశ్లేషణ చేసింది. యుద్ధ రంగంలో ఉన్న మొత్తం 11,000 మంది ఉత్తర కొరియా సైనికుల్లో దాదాపు 2,300 మంది (అంటే సుమారు 20% మంది) మరణించినట్లు అంచనా వేస్తున్నారు. అలాగే సుమారు మూడు వేలకు మందికి పైగా సైనికులు కూడా గాయపడ్డారు.. వారందర్నీ యుద్ధ క్షేత్రం నుంచి తొలగించారు.. రష్యాలోనే వారికి చికిత్స అందిస్తున్నారు.
రష్యా – ఉత్తర కొరియా మధ్య ‘గివ్ అండ్ టేక్’
కాగా,కిమ్ జోంగ్ ఉన్ తన సైనికులను మృత్యువులోకి నెట్టడం వెనుక బలమైన ఆర్థిక, సాంకేతిక కారణాలు ఉన్నాయి. సైనిక సహకారానికి బదులుగా మాస్కో నుంచి ఉత్తర కొరియాకు భారీగా నగదు, ఆహార ధాన్యాలు అందుతున్నాయి. తీవ్ర ఆహార సంక్షోభంలో ఉన్న ఆ దేశానికి ఇది ఊరటనిస్తోంది. క్షిపణి, అంతరిక్ష సాంకేతికతలో రష్యా నుంచి ఉత్తర కొరియాకు అత్యున్నత స్థాయి సాంకేతిక సహకారం అందుతోందని నిపుణులు చెబుతున్నారు.
యుద్ధ రంగంలో ఉత్తర కొరియా పాత్ర
ఈ సైనికులు ప్రధానంగా వ్యూహాత్మక ప్రాంతాల్లో రష్యాకు మద్దతుగా పనిచేస్తున్నారు. ఉక్రెయిన్ స్వాధీనం చేసుకున్న రష్యాలోని కుర్స్క్ ప్రాంతాన్ని తిరిగి దక్కించుకునేందుకు జరుగుతున్న పోరాటంలో ఉత్తర కొరియా సైనికులు కీలక పాత్ర పోషిస్తున్నారు. ఈ యుద్ధం ద్వారా ఉత్తర కొరియా సైన్యం ఆధునిక యుద్ధ తంత్రాలను, డ్రోన్ టెక్నాలజీని నేర్చుకుంటుందని, ఇది భవిష్యత్తులో ఆ దేశ సైనిక సామర్థ్యాన్ని పెంచుతుందని విశ్లేషకులు భావిస్తున్నారు. తమ దేశం కాని దేశంలో, వేరే దేశ ప్రయోజనాల కోసం ఉత్తర కొరియా సైనికులు బలికావడం మానవతావాదులను కలవరపెడుతోంది. కేవలం ఆహారం, డబ్బు ,సాంకేతికత కోసం ఇంత భారీ సంఖ్యలో యువ సైనికులను యుద్ధానికి పంపడం కిమ్ ప్రభుత్వ నిరంకుశత్వానికి నిదర్శనం. ఈ పరిణామం రాబోయే రోజుల్లో కొరియా ద్వీపకల్పంలో కూడా ఉద్రిక్తతలను పెంచే అవకాశం ఉందని అంటున్నారు.
