19kg | కమర్షియల్ గ్యాస్ ధర పెంపుతో డీలా

19kg |ఆంధ్ర‌ప్ర‌భ వెబ్‌డెస్క్ : పశ్చిమాసియాలో ఉద్రిక్త పరిస్థితులతో అంతర్జాతీయంగా ఇంధన ధరలు మండిపోతున్న వేళ కమర్షియల్ గ్యాస్ వినియోగదారులకు చమురు సంస్థలు భారీ షాక్ ఇచ్చాయి. 19 కిలోల కమర్షియల్ LPG సిలిండర్ ధరను ఏకంగా 993 రూపాయల మేర పెంచుతూ చమురు సంస్థలు నిర్ణయం తీసుకున్నాయి. అయితే గృహ వినియోగానికి వాడే డొమెస్టిక్ వంట గ్యాస్ సిలిండర్ ధరల్లో ఎలాంటి మార్పు లేదని అధికారిక వర్గాలు స్పష్టంచేశాయి.

ఈ ఏడాది కమర్షియల్ సిలిండర్ ధరల్లో ఇది వరుసగా మూడోసారి పెంపు కావడం ఆందోళన కలిగిస్తోంది. మార్చి 7న రూ.144, ఏప్రిల్ 1న రూ.200 పెంచిన చమురు సంస్థలు.. ఇప్పుడు భారీగా రూ.993 పెంచడం వ్యాపార రంగాన్ని తీవ్రంగా ప్రభావితం చేసే అవకాశం ఉంది. హోటళ్లు, రెస్టారెంట్లు, చిన్న వ్యాపారులు ఈ పెంపుతో ధరలు పెంచాల్సిన పరిస్థితి ఏర్పడింది

క‌మర్షియల్ గ్యాస్ సిలిండర్ ధరలు పెరగడంతో చిన్న, మధ్య తరహా వ్యాపారాలపై నేరుగా ప్రభావం చూపుతోంది. ముఖ్యంగా హోటళ్లు, రెస్టారెంట్లు, బేకరీలు, టీ స్టాళ్లు వంటి వ్యాపారాలు ఈ పెంపుతో ఆర్థిక ఒత్తిడిని ఎదుర్కొంటున్నాయి. గ్యాస్ ఎక్కువ‌గా వినియోగించే హోటళ్లు, టిఫిన్ సెంటర్లు ఖర్చులు గణనీయంగా పెరిగాయి. ఒక సిలిండర్ ధర పెరగడం అంటే నెలకు వేల రూపాయల అదనపు వ్యయం.

ఖర్చులు పెరగడంతో వ్యాపారులు ఇడ్లీ, దోసె, కర్రీలు వంటి ఆహార పదార్థాల ధరలను పెంచాల్సి వస్తోంది. దీంతో వినియోగదారులపై భారం పడుతోంది. ధరలు పెంచితే కస్టమర్లు తగ్గే అవకాశం ఉండటంతో వ్యాపారుల లాభాలు తగ్గుతున్నాయి. పెద్ద హోటళ్లు కొంతవరకు భరించగలిగినా, చిన్న టీ స్టాళ్లు, ఫాస్ట్ ఫుడ్ సెంటర్లు మాత్రం నష్టాల్లోకి వెళ్లే ప్రమాదం ఉంది. కొంతమంది వ్యాపారులు ఇండక్షన్ స్టవ్స్, ఎలక్ట్రిక్ కుకింగ్ వైపు మొగ్గు చూపుతున్నారు. కానీ విద్యుత్ ఖర్చులు కూడా పెరగడం మరో సమస్య. గ్యాస్ ధరల పెంపు వల్ల మొత్తం ఆహార రంగంలో ధరలు పెరిగి, ద్రవ్యోల్బణంపై ప్రభావం చూపుతోంది. ఇది సాధారణ ప్రజల ఖర్చులను పెంచుతోంది. మొత్తం మీద, కమర్షియల్ గ్యాస్ ధరల పెంపు వ్యాపారాల ఖర్చులను పెంచి, చివరకు వినియోగదారుల జేబుపై కూడా భారం మోపుతోంది.