గణ ఆగమనం ! ప్రతి వీధిలో భక్తి ఉత్సవం..

• భక్తి వైభవానికి సిద్ధమవుతున్న భాగ్యనగరం

ఆంధ్ర‌ప్ర‌భ : మరో నెల రోజుల్లో దేశవ్యాప్తంగా గణేష్‌ చతుర్థి మహోత్సవాలు ప్రారంభం కానున్నాయి. సెప్టెంబర్‌ 14న ప్రారంభమయ్యే వినాయక చవితి వేడుకలకు ఇప్పటికే సందడి మొదలైంది. విఘ్నాలను తొలగించే గణనాథుడి రాక కోసం భక్తులు ఎంతో ఆసక్తిగా ఎదురుచూస్తున్నారు. దేశంలోని ప్రతి ప్రాంతం గణపయ్య ఆరాధనకు సిద్ధమవుతోంది. గల్లీ గల్లీలో వినాయక విగ్రహాలు కొలువుదీరనున్నాయి.

చిన్న చిన్న పందిళ్ల నుంచి భారీ మండపాల వరకు ఎక్కడ చూసినా గణపతి సందడి కనిపించనుంది. తొమ్మిది రోజుల పాటు దేశమంతా భక్తి భావంతో పరవశించనుంది. వినాయకుడి స్తోత్రాలు, భజనలు, భక్తి గీతాలతో వీధులు మార్మోగనున్నాయి. “గణపతి బప్పా మోరియా” అంటూ భక్తులు చేసే నినాదాలు ప్రతి ప్రాంతంలో ఆధ్యాత్మిక వాతావరణాన్ని నింపనున్నాయి.

ఇప్పటికే మండపాల ఏర్పాట్లు, అలంకరణ పనులు, విద్యుత్‌ దీపాల ఏర్పాటు, పూజా కార్యక్రమాల ప్రణాళికలు ప్రారంభమయ్యాయి. యువత ఉత్సవాల నిర్వహణలో చురుగ్గా పాల్గొంటూ ఈ వేడుకలను సామాజిక ఐక్యతకు వేదికగా మారుస్తున్నారు. హిందూ సంప్రదాయంలో వినాయకుడికి ప్రత్యేకమైన స్థానం ఉంది. ఏ శుభకార్యమైనా ముందుగా గణపతిని పూజించడం ఆనవాయితీ.

జ్ఞానం, విజయం, శుభానికి ప్రతీకగా భావించే గణనాథుడి జన్మదినాన్ని గణేష్‌ చతుర్థిగా జరుపుకుంటారు. వినాయకుడిని ఆరాధించడం ద్వారా జీవితంలోని అడ్డంకులు తొలగిపోతాయని, కొత్త ప్రయత్నాల్లో విజయాలు లభిస్తాయని భక్తుల విశ్వాసం. అందుకే ప్రతి సంవత్సరం ఈ పండుగను ప్రజలు ఎంతో వైభవంగా నిర్వహిస్తారు. భక్తి, సంప్రదాయం, సామాజిక ఐక్యత కలయికగా గణేష్‌ చతుర్థి దేశవ్యాప్తంగా ప్రత్యేక గుర్తింపు పొందింది.

చిన్నారుల సందడి ప్రత్యేకం..

గణపతి నవరాత్రుల సమయంలో భాగ్యనగరం మొత్తం భక్తి శోభతో కళకళలాడుతుంది. గల్లీ గల్లీలో వినాయక మండపాలు కొలువుదీరుతాయి. భారీ విగ్రహాలు, ఆకట్టుకునే అలంకరణలు, భక్తి కార్యక్రమాలతో నగరం సందడిగా మారుతుంది. అయితే, పెద్ద పెద్ద మండపాల మధ్య చిన్న చిన్న గల్లీల్లో చిన్నారులు ఏర్పాటు చేసే గణపతి మండపాలు ప్రత్యేక ఆకర్షణగా నిలుస్తాయి. ఇతర పండుగలకు భిన్నంగా పెద్ద‌ల స‌హాయం లేకుండానే వినాయక చవితి వేడుకల్లో పిల్లలు ముందుండి బాధ్యతలు తీసుకోవడం కనిపిస్తుంది.

పండుగకు కొన్ని రోజుల ముందే చిన్నారుల్లో ఉత్సాహం మొదలవుతుంది. స్నేహితులంతా కలిసి ఒక బృందంగా ఏర్పడి ఇంటింటికీ తిరుగుతూ చందాలు సేకరిస్తారు. ఎవరు ఇచ్చినా.. ఎంత ఇచ్చినా.. భక్తితో స్వీకరిస్తారు. ఆ మొత్తంతో వినాయకుడి విగ్రహం కొనుగోలు చేయడం, మండపం ఏర్పాటు చేయడం, అలంకరణలు చేయడం వంటి పనులను ఎంతో ఉత్సాహంగా చేపడతారు.

కొంతమంది పిల్లలు తమ జేబు ఖర్చును కూడా పక్కన పెట్టి గణపయ్య పూజ కోసం అందిస్తారు. ఖాళీ ప్రదేశాల్లో చిన్న మండపాలు ఏర్పాటు చేసి రంగురంగుల కాగితాలు, పూలు, దీపాలతో అందంగా అలంకరిస్తారు. పెద్దల సహకారంతో విద్యుత్‌ దీపాలను ఏర్పాటు చేసి తమ గణపతి మండపాన్ని ప్రత్యేకంగా తీర్చిదిద్దుతారు.

వినాయకుడి విగ్రహాన్ని తీసుకొచ్చే వేళ చిన్నారుల ఆనందానికి అవధులు ఉండవు. అందరూ కలిసి వెళ్లి తమకు నచ్చిన గణపయ్య విగ్రహాన్ని ఎంపిక చేసుకుని తీసుకొస్తారు. డప్పుల చప్పుళ్లు, భక్తి గీతాలు, నినాదాల మధ్య ఊరేగింపుగా తీసుకొచ్చి మండపంలో ప్రతిష్ఠిస్తారు.

విఘ్నరాజు రాకతో వీధి వీధిలో వెలుగులు

హైదరాబాద్‌ గణేష్‌ ఉత్సవాలకు ప్రత్యేక గుర్తింపు తెచ్చే ఖైరతాబాద్‌ గణపతి ఈసారి మరింత వైభవంగా భక్తులకు దర్శనమివ్వనున్నాడు. దేశవ్యాప్తంగా భక్తులను ఆకర్షించే ఈ భారీ వినాయకుడిని దర్శించుకునేందుకు వేలాది మంది తరలివస్తారు. ఎత్తైన విగ్రహం, ప్రత్యేకమైన రూపకల్పనతో ఖైరతాబాద్‌ గణపతి ప్రతి ఏడాది భక్తులను ఆకట్టుకుంటాడు. ఈ ఏడాది ఖైరతాబాద్‌ గణనాథుడు 69 అడుగుల ఎత్తులో రూపుదిద్దుకుంటున్నాడు.

2026 గణేష్‌ చతుర్థి సందర్భంగా ఖైరతాబాద్‌లో ఏర్పాటు చేయనున్న గణపతి “పంచముఖ సంకటహర మహాగణపతి” రూపంలో కొలువుదీరనున్నాడు. భక్తుల కష్టాలను తొలగించి, వారికి రక్షణ కల్పించే సంకటహర గణపతిగా ఈసారి విగ్రహాన్ని తీర్చిదిద్దుతున్నారు. ఐదు ముఖాలతో ఉండే ఈ ప్రత్యేక రూపం ఆధ్యాత్మికంగా విశిష్టతను సంతరించుకోనుంది. గణపతి విగ్రహానికి ఇరువైపులా ఏర్పాటు చేసే ప్రత్యేక ఆకర్షణలు భక్తులను ఆకట్టుకోనున్నాయి.

గణపతి కుడివైపు 15 అడుగుల ఎత్తైన సోమనాథ జ్యోతిర్లింగ ప్రతిరూపం, ఎడమవైపు కాళికా మాత విగ్రహం ప్రత్యేక ఆకర్షణగా నిలవనున్నాయి. భారీ విగ్రహమైనప్పటికీ పర్యావరణ పరిరక్షణకు ప్రాధాన్యం ఇస్తూ నిర్మాణ పనులు చేపడుతున్నారు. మట్టి, ఉక్కు, ఎండుగడ్డి, కలప వంటి పదార్థాలను ఉపయోగించి విగ్రహాన్ని రూపొందిస్తున్నారు.

పర్యావరణానికి హాని కలగకుండా ఉత్సవాలు నిర్వహించేందుకు నిర్వాహకులు ప్రత్యేక చర్యలు తీసుకుంటున్నారు. సెప్టెంబర్‌ 14 నుంచి ప్రారంభమయ్యే ఉత్సవాలు సెప్టెంబర్‌ 25 వరకు 11 రోజుల పాటు కొనసాగనున్నాయి. చివరి రోజు హుస్సేన్‌ సాగర్‌లో జరిగే నిమజ్జనంతో ఉత్సవాలు ముగియనున్నాయి.

పర్యావరణ హిత వినాయకుడిపై దృష్టి

గణేష్‌ చతుర్థి వేడుకల్లో భక్తితో పాటు పర్యావరణ పరిరక్షణకు కూడా ప్రాధాన్యం పెరుగుతోంది. ప్రకృతికి ఎలాంటి హాని కలగకుండా పండుగను నిర్వహించాలని అధికారులు ప్రజలకు విజ్ఞప్తి చేస్తున్నారు. మట్టి వినాయక విగ్రహాలను ప్రతిష్ఠించి పర్యావరణాన్ని కాపాడాలని సూచిస్తున్నారు. గతంలో ప్లాస్టర్‌ ఆఫ్‌ పారిస్‌తో తయారు చేసిన విగ్రహాల వినియోగం ఎక్కువగా ఉండేది. అయితే వాటి వల్ల నీటి వనరులు కలుషితమయ్యే అవకాశం ఉండటంతో ప్రస్తుతం మట్టి విగ్రహాల వినియోగంపై అవగాహన పెరుగుతోంది.

చెరువులు, నదులు పరిశుభ్రంగా ఉండేందుకు ప్రతి ఒక్కరూ సహకరించాలని అధికారులు కోరుతున్నారు. మట్టి వినాయక విగ్రహాలు సహజంగా నీటిలో కలిసిపోవడంతో పాటు పర్యావరణానికి మేలు చేస్తాయని చెబుతున్నారు. సహజ రంగులతో తయారు చేసిన విగ్రహాలు, పర్యావరణ హిత అలంకరణలకు ప్రాధాన్యం ఇవ్వాలని సూచిస్తున్నారు. భక్తి భావానికి ఎలాంటి లోటు లేకుండా.. ప్రకృతిని పరిరక్షిస్తూ గణపయ్యను ఆరాధిద్దాం అనే సందేశంతో అధికారులు, స్వచ్ఛంద సంస్థలు ప్రజల్లో అవగాహన కల్పిస్తున్నాయి. గణనాథుడికి పూజలు చేస్తూనే ప్రకృతిని కాపాడటం ప్రతి ఒక్కరి బాధ్యత అని పిలుపునిస్తున్నారు.