politics | సంకల్పం, శ్రమ, సాంకేతికతలకు మారుపేరు

politics | సంకల్పం, శ్రమ, సాంకేతికతలకు మారుపేరు

politics | ఆంధ్రప్రభ, వెబ్ డెస్క్: భారత రాజకీయాల్లో ముందు చూపు ఉన్న నాయకుడు(విజనరీ) అనగానే వెంటనే గుర్తుకొచ్చే అతికొద్ది మంది నాయకులలో నారా చంద్రబాబు నాయుడు ఒకరు. సామాన్య రైతు కుటుంబంలో పుట్టి, దేశ రాజకీయాలను శాసించే స్థాయికి ఎదిగిన ఆయన ప్రస్థానం, వ్యక్తిత్వం ఎందరికో ఆదర్శం. కాలం మారొచ్చు, తరాలు మారొచ్చు.. కానీ తెలుగు రాష్ట్రాల అభివృద్ధి ప్రస్థానంలో ఎప్పటికీ చెరిగిపోని ఒకే ఒక్క సంతకం ‘నారా చంద్రబాబు నాయుడు’. ఒక సామాన్య రైతు బిడ్డ స్థాయి నుంచి, ప్రపంచ స్థాయి ఐటీ దిగ్గజాలను తెలుగు నేల వైపు చూసేలా చేసిన అసాధారణ ప్రయాణం ఆయనది. ఓటమిని చూసి కుంగిపోకుండా, సంక్షోభాలను సైతం అవకాశాలుగా మలచుకునే అపర చాణక్యుడు, నిరంతర శ్రమకు మారుపేరుగా నిలిచిన ఆ దార్శనికుడి పుట్టినరోజు నేడు.

అతి చిన్న వయసులోనే పాలిటిక్స్ లోకి..

చిత్తూరు జిల్లా నారావారి పల్లెలో జన్మించిన చంద్రబాబు నాయుడు, తిరుపతి శ్రీ వేంకటేశ్వర యూనివర్సిటీలో చదువుకునే రోజుల నుంచే నాయకత్వ లక్షణాలను అలవర్చుకున్నారు. విద్యార్థి నాయకుడిగా మొదలైన ఆయన ప్రస్థానం, అతి చిన్న వయసులోనే ఎమ్మెల్యేగా, మంత్రిగా ఎదిగేలా చేసింది. రాజకీయాల్లో ఎత్తుగడలు వేయడంలో ఆయనకంటూ ఒక ప్రత్యేక శైలిని సృష్టించుకున్నారు.

ఐటీలో విప్లవం..

చంద్రబాబు నాయుడు అనగానే అందరికీ ముందుగా గుర్తొచ్చేది ‘హైటెక్ సిటీ’. 1990ల దశకంలో, ఐటీ రంగం ప్రాధాన్యతను దేశంలో అందరికంటే ముందుగా గుర్తించిన నాయకుడు ఆయనే. మైక్రోసాఫ్ట్ అధినేత బిల్ గేట్స్‌ను ఒప్పించి, అమెరికా బయట మొట్టమొదటి మైక్రోసాఫ్ట్ డెవలప్‌మెంట్ సెంటర్‌ను హైదరాబాద్‌కు తీసుకురావడం ఆయన కెరీర్‌లో ఒక మైలురాయి.సైబరాబాద్ నిర్మాణం, ఐటీ కంపెనీలకు రాయితీలు ఇవ్వడం ద్వారా ఉమ్మడి ఆంధ్రప్రదేశ్‌ను ఐటీ హబ్‌గా మార్చారు. ముఖ్యమంత్రిగా కాకుండా తనను తాను రాష్ట్రానికి ‘సీఈఓ’ గా అభివర్ణించుకుంటూ, కార్పొరేట్ తరహాలో పాలన సాగించిన మొదటి రాజకీయ నాయకుడు ఆయనే.

పరిపాలనలో టెక్నాలజీ – సంస్కరణలు..

టెక్నాలజీని సామాన్యులకు చేరువ చేయడంలో ఆయన ఎప్పుడూ ముందుంటారు. ఈ-సేవ కేంద్రాలను ప్రారంభించి, పౌర సేవలను ఆన్‌లైన్ చేశారు. డ్వాక్రా గ్రూపుల ద్వారా లక్షలాది మంది మహిళలను ఆర్థికంగా బలోపేతం చేసి, వారిని పొదుపు సంఘాల వైపు మళ్లించిన ఘనత ఆయనదే.2014లో రాష్ట్ర విభజన జరిగినప్పుడు, లోటు బడ్జెట్‌తో ఉన్న నవ్యాంధ్రప్రదేశ్ బాధ్యతలు తీసుకున్నారు. ఎలాంటి మౌలిక సదుపాయాలు లేని రాష్ట్రానికి అమరావతి అనే ఒక ప్రపంచ స్థాయి రాజధానిని ప్లాన్ చేశారు. కియా మోటార్స్ వంటి భారీ పరిశ్రమలను రాష్ట్రానికి రప్పించారు. ప్రకృతి విపత్తులు (హుద్‌హుద్, తిత్లీ తుఫానులు) వచ్చినప్పుడు గ్రౌండ్ జీరోలో ఉండి, అధికారులను పరుగులు పెట్టించి రోజుల్లోనే రాష్ట్రాన్ని సాధారణ స్థితికి తీసుకువచ్చిన ఆయన క్రైసిస్ మేనేజ్‌మెంట్ స్కిల్స్ దేశవ్యాప్తంగా ప్రశంసలు పొందాయి.

నిరంతర శ్రామికుడు..

ఏడు పదుల వయసు దాటినా రోజుకు 16 నుంచి 18 గంటలు పనిచేసే నిరంతర శ్రామికుడు. టెక్నాలజీ విషయంలో ఆయనొక నిరంతర విద్యార్థి. ఒకప్పుడు కంప్యూటర్ల గురించి మాట్లాడిన ఆయన, నేడు ఆర్టిఫిషియల్ ఇంటెలిజెన్స్ (AI), బ్లాక్ చైన్ టెక్నాలజీల గురించి మాట్లాడుతుంటారు. కాలానుగుణంగా అప్‌డేట్ అవ్వడం ఆయన స్పెషాలిటీ. రాజకీయాల్లో ఎన్నో దారుణమైన ఓటములను, కుట్రలను, జైలు జీవితాన్ని ఎదుర్కొన్నప్పటికీ… ఎక్కడా క్రుంగిపోకుండా ఒక ఫీనిక్స్ పక్షిలా మళ్లీ మళ్లీ బలంగా పైకి లేచే ఆయన మనోధైర్యం అసామాన్యం.ఎన్ని రాజకీయ విమర్శలు ఉన్నప్పటికీ, తెలుగు రాష్ట్రాల అభివృద్ధిలో ఆయన వేసిన ముద్ర చెరిగిపోనిది. భవిష్యత్తు తరాల కోసం ఆలోచించే అరుదైన నాయకుడు నారా చంద్రబాబు నాయుడుకి హృదయపూర్వక జన్మదిన శుభాకాంక్షలు!